Yoobu 26

1Yoobu u Bilida wisa u nɛɛ, 2Bilida, wunɛn wisibu bu ǹ dam sarirugii somimɔ. Wunɛn dam kɛ̃ru ta ǹ arufaani gaa mɔ. 3Anna a bwisi kɛ̃ru wa te a wi u kun bwisi mɔ kɛ̃mɔ. Wunɛn bwisi yi, yi ǹ goo somimɔ. 4Wara a gari yini sɔ̃ɔmɔ. Wara u nun gari yini gerusia. 5Be ba gu ba wãa sere nim wɔ̃kun tem sɔɔwɔ, ba diirimɔ. 6Domi Gusunɔ u be kpuro waamɔ. Gãanu kun nùn ganua gɔribun wãa yeru mi. 7Wiya u sɔ̃ɔ yɛ̃san nɔm geu doke wom dirum sɔɔ. Ma u tem bwɛ̃ kam dirum sɔɔ. 8Ma u nim banisi guru winu sɔɔ. Ka mɛ, guru wii ni, nu ku ra gɛ̃ɛre nim bunum sɔ̃. 9Wiya u ra de guru winu nu win sina gɔna wukiri. 10Ma u bubenu kua nim wɔ̃kun wɔllɔ, mi yam bururam ka yam wɔ̃kura karanɛ. 11Gusunɔ ù n gbãra, wɔllun gbere ya ra diiriwa, kpa ya n wãa biti sɔɔ. 12Ka win dama u ra nim wɔ̃kun nim kɔsuku. Kpa u ka win bwisi yaa gɔba ye ba mɔ̀ Rahabu kamia. 13Ù n wom wura, wɔllu kpuro ta ra dɛɛrewa nge ba kura. Ka win nɔma u ra waa ye ya duka mɔ sɔkiri. 14Adama yeni kpuro ya sãawa win kookoo piiminu. Nin wɔkinun fiikowa sa ra n nɔɔmɔ. Ǹ n mɛn na, wara u koo kpĩ u win dam asansi tubu ù n gbãra nge gura.

will be added

X\