Yoobu 24

1Yoobu u maa nɛɛ, mban sɔ̃na Gusunɔ Dam kpurogii ku ra saa yi u ka tɔmbu siri. Mban sɔ̃na be ba nùn mɛm nɔɔwammɛ ba ku ra saa ye wa. 2Domi wee, gabu ba gabun tem gbɛnimɔ ba ka begim mɛnnamɔ. Ma gabu ba yãanu kpare ni ba gbɛna. 3Gaba maa gobekuban kɛtɛkunu mwɛɛrimɔ. Ma ba gɔminibun nɛɛ tɔruba mwaamɔ. 4Ba wɔnwɔndobu dam dɔremɔ ba giramɔ swaan di. Ma sãarobu ba swaa kasu bu kuke. 5Sãaro be, ba yaayaare mɔ̀ gbaburɔ nge gbeeku kɛtɛku, ba dĩanu kasu bu ben bibu wɛ̃. 6Be wee ba yakasu gɛ̃ɛmɔ ben yaa sabenun sɔ̃, ma ba dĩanu kunɔnu mɔ̀ tɔn kɔ̃son gberɔ. 7Adama ba ǹ bekuru mɔ te ba koo wukiri wɔ̃kuru puran sɔ̃. 8Be wee ba da ba baka kpee baaba sɔɔ yèn sɔ̃ ba ǹ wãa yeru mɔ. Miya gura bu waayamɔ. 9Tɔn kɔ̃so wi, u ra gobeku mwɛwa ka dam. Kpa u sãaron yabe tee te u mɔ tɔruba mwa. 10- 11Be wee, ba yɔ̃su basi tɔn kɔ̃son kara sɔɔ. Ba doo bɔka sɔɔwa, ma gɔ̃ɔra bu mɔ̀. Ba nùn gum kuammɛ, ba resɛm gamamɔ. Adama ba ǹ kãkɔ bu ye nɔ, baa mɛ nim nɔru ga bu mɔ̀. 12Wuu marosɔ gaba gɔɔ dɔɔ, ba wuri mɔ̀. Be ba mɛɛra kua ba weeweenu mɔ̀. Adama Gusunɔ kun yen gaa gara. 13Gabu ba yam bururam tusa. Ba ku ra n wãa mɛ sɔɔ. Domi ba ǹ yɛ̃ mi mu ka bu dɔɔ. 14Tɔn gowo u ra sewa buru buru yellu kpa u sãarobu go. Wɔ̃kuru kpa u gbɛni. 15Yam wɔ̃ku bere berera sakara kowo u ra n kasu. U ra nɛɛwa, goo kun nùn wasi. Kpa u win wuswaa sɔnditia wukiri. 16Yam wɔ̃kuru sɔɔra gbɛnɔ u ra dia kɔsuku. Sɔ̃ɔ sɔɔ, kpa u tii kɛnusi win yɛnuɔ. U ǹ yam bururam yɛ̃. 17Ben mi, bururu ta sãawa nge gɔɔn tiro. Ba ra n nandewa. 18Adama bɛɛ i nɛɛ, tɔn kɔ̃so u sãa nge nim yaka. Ba win tem bɔ̃rusi. U ǹ maa dɔɔ win resɛm gbaarɔ. 19Nge mɛ tem mu ra nim nɔ gbeburun saa sɔɔ, nge mɛya gɔribun wãa yeru ta ra durumgii mwɛ. 20Wi u tɔn kɔ̃so mara u ra nùn duariwa. U koo kowa kɔkɔnun dĩa geenu. Tɔmbu kpurowa ba koo nùn duari. Kpa u wɔruma u bɔɔra nge dãa. 21Tɔnu win bweseru u ra kurɔ wĩron yãnu gurewa. U ku ra gɔmini gea gaa kue. 22Adama Gusunɔwa u dam mɔ u ka tɔn kɔ̃so ben wãaru yɔ̃rasia. Ù n bu wɔri, ba ku ra n maa yɛ̃ nge ba ko n wãa. 23Gasɔ u ra bu yĩiyɔbu wɛ̃, ba n ka wãa bɔri yɛndu sɔɔ. Adama u ra n ben sanu sanusu mɛɛrawa. 24Bà n ka tii yina kpuro, subaru sɔɔ, ba kpawa. Ba ra wɔrumɛwa mii mii bu gbi nge tɔn diro. Kpa ba n sãa nge dobi yi ba bura. 25Ye na gerua mi, geema. Wara u koo man siri, kpa u nɛɛ, nɛn gari yi, yi ǹ asansi gaa mɔ.

will be added

X\