1 Yoobu u wisa u nɛɛ, 2 sere ka gisɔ na Gusunɔ weeweenu koosimɔ. Nɛn nɔni swãaru ta nɛn wuri kere. 3 Nà n daa yɛ̃ mi u wãa kon daa dawa sere win mi. 4 Kpa n nùn sɔ̃ ye ya man wãasi, ka maa yèn sɔ̃ na tii wɔramɔ. 5 Kpa n win wisibu nɔ. N nɔ ye n nùn nɛni. 6 U koo man dam sɔ̃ɔsi u ka man siri? Aawo, u koo yɔ̃rawa u man swaa daki. 7 Nɛ tɔn geowa kon kpĩ n ka nùn wesianɔ ko. Kpa wi, wi u sãa nɛn siri kowo, u man yakia sere ka baadommaɔ. 8 Adama nà n da sɔ̃ɔ yari yeru gia, u ku ra n wãa mi. Nà n maa da sɔ̃ɔ duu yerɔ, na ku ra nùn wa mi. 9 Aa, u sɔmburu garu mɔ̀wa sɔ̃ɔ yɛ̃san nɔm geu gia? Nà n da mi, u ku ra n wãa mi. U kukuawa sɔ̃ɔ yɛ̃san nɔm dwaru gia? Min tii, na ku ra nùn wa. 10 Ka mɛ, u nɛn swɛɛ kpuro yɛ̃ yi na swĩi. Ù n man kpɛ̃ɛ laakari mɛɛribu sɔɔ, kon yariwa min di, na n dɛɛre nge wura ye ba dɔ̃ɔ doke. 11 Na win yira swĩiwa dee dee. Na ǹ gɛre win swaan di. 12 Na ǹ win wooda sare. Ye u man sɔ̃ɔwa kpuro, na ye mɛm nɔɔwawa gɔ̃ruɔ. 13 Ù n gãanun himba yi, wara u koo ye sĩiya. Ye u kĩ yera u ra ko. 14 Ǹ n mɛn na, u koo ko ye u yi kpuro nɛn sɔ̃, kpa u maa man himba kpaa yiiya. 15 Yen sɔ̃na na nande wi Gusunɔn wuswaaɔ. Nà n bwisika na ra nandewa win sɔ̃. 16 Gusunɔ u nɛn wɔrugɔrun dam bua. Wi, Dam kpurogii u man bɛrum kpɛ̃ɛ. 17 Ka yen de kpuro, na ǹ nɔɔ mari, baa mɛ n sãare yam wɔ̃kura man wukiri.
