Yoobu 22

1Yera Elifasi, Temagii u Yoobu wisa u nɛɛ, 2tɔnu u ko n arufaani mɔ Gusunɔn mi? Aawo! Tɔnu ù n sãa dee dee, win tiin arufaaniwa. 3A tamaa yèn sɔ̃ a sãa gemgii, Gusunɔ u yen are waamɔ? À n sĩimɔ dee dee arufaani yerà u waamɔ. 4A tamaa yèn sɔ̃ a nùn mɛm nɔɔwammɛ, yen sɔ̃na u nun sɛɛyasiamɔ? A tamaa yèn sɔ̃ a nùn nasie, yen sɔ̃na u nun sirimɔ? 5Aawo. Wunɛn tora dabinun sɔ̃na u nun sɛɛyasiamɔ. Wunɛn kɔ̃sa ya maa kpã. 6Domi a wunɛn berusebun yãnu tɔruba mwa, ma a bu deri tereru. 7A ǹ wi nim nɔru ga mɔ̀ nim kã u nɔ. Mɛya a ǹ maa wi gɔ̃ɔra mɔ̀ dĩanu kã u di. 8A raa sãawa damgii ka bɛɛrɛgii, ma a tem mɛ kpuro mɔ. 9A gɔminibu girawa ba doona nɔm dira, a ǹ bu somi. Ma a gobekuban dam bua. 10Yen sɔ̃na yɛ̃ri nun wãasi beri berika, ma bɛrum nun mwa subaru sɔɔ. 11Ma yam wɔ̃kura nun wukiri nge nim bwee bakaru, a ǹ maa yam waamɔ. 12Sa yɛ̃ ma Gusunɔ u wãa wɔllɔ. A mɛɛrio a wa sere mi kperi wãa. 13Ka mɛ, a gerumɔ a mɔ̀, mba Gusunɔ u yɛ̃. U ǹ kpɛ̃ u tɔnu siri guru wiru sɔɔ. 14Guru wiru ta sinum mɔ, u ǹ kpɛ̃ u gãanu wa min di. U sirenɛwa wɔllu mi tɔna. 15Yoobu, a yɔ̃rariwa a kɔ̃san kowobun yira ye swĩi? 16A ǹ yɛ̃ ma ba bu go ben gɔɔn saa yu sere turi? Ba doona nge gana ye ya nim diira. 17Tɔn ben bweseru ba ra raa Gusunɔ sɔ̃wa bu nɛɛ, u bu derio sɛ̃ɛ. Mba wi Dam kpurogii u koo kpĩ u bu kua. 18N deema Gusunɔ wiya u raa ben yɛnun dukia kuurasia. Adama ba ǹ nùn saawara kue, ye ba ben himba yiimɔ. 19Be ba gem swĩi ba koo yɛ̃ɛri, bà n tɔn kɔ̃so wa u kam kua. Be ba ǹ taarɛ mɔ, ba koo yɛ̃ɛwa bu nɛɛ, 20wee, bɛsɛn yibɛrɛ u kam kua, win dukia ye u mɔ kpuro, ya dɔ̃ɔ mwaara. 21Yoobu, a ka Gusunɔ doro, kpa ye kpuro yu nun sanɔ kua. À n kua mɛ, wunɛn nuku dobu koo wurama. 22A win sɔ̃ɔsiru swaa dakio kpa a tu nɛnɛ gɔ̃ruɔ. 23À n ka kɔ̃sa tonda ma a wurama, Dam kpurogii koo nun wunɛn yellun wãaru wesia. 24A wunɛn wura ye a mɔ kɔ̃ɔwɔ temɔ. Kpa a wunɛn kpee gobigiru deri daarun toraɔ, 25kpa Dam kpurogii u ko wunɛn wura ka wunɛn sii geesu. 26Saa yera kaa n nuku dobu mɔ Gusunɔ Dam kpurogiin mi. Kpa a nùn naanɛ ko, a nùn wunɛn wuswaa sɔ̃ɔsi. 27À n nùn kana u koo nun wisi, kpa a wunɛn nɔɔ mwɛɛnu yibia. 28Ye a nia kua kpuro, ya koo koorawa. Wunɛn swɛɛ yi a swĩi kpuro, yi ko n dɛɛrewa. 29À n wãa nɔni swãaru sɔɔ, kaa tii kawa a nɛɛ, tii suaba bu nun tu kpɛ̃ɛ. Kpa Gusunɔ u nun wɔlle sua. 30U koo mam taarɛgii yara kɔ̃san di, wunɛn dɛɛrarun sɔ̃.

will be added

X\