Yoobu 21

1Yoobu u nɛɛ, 2i nɛn gari nɔɔwɔ. Ì n wura i man swaa daki, i man nukuru yɛmiasiawa mi. 3I de n gari gere. Nà n gari gerua na kpa, ko i kpĩ i man yɛ̃ɛ. 4Tɔnuwa na weeweenu koosimɔ? Nge mban sɔ̃na kon tɛmana. 5I man mɛɛrio, kpa biti yu bɛɛ mwa kpa i bɛɛn nɔsu kɔre. 6Nà n nɛn wãaru bwisika, na ra nandewa, nɛn wasi yi n diirimɔ. 7Mban sɔ̃na Gusunɔ u ra de tɔn kɔ̃so u n wãa, kpa u n dam mɔ sere ka win tɔkɔrɔ. 8U ra bibu ma kpa be, bu maa se bu ma. Kpa u n be kpuro mɛɛra ba n kuuramɔ win nɔni sɔɔ. 9Bɔri yɛnda wãa ben yɛnusɔ, ba ǹ bɛrum mɔ. Gusunɔ kun maa bu sɛɛyasiamɔ pai. 10Saa kpuro, ben kɛtɛ kinɛru tà n ben nɛɛ yɔɔwa yi ra mawa. Yi ku ra nukuru yari. 11Ba ra ben bibu deri ba n duki mɔ̀ nge yãanu, kpa ba n dweebu mɔ̀, 12ba n bara kpãnu ka mɔrɔkunu soomɔ, ba n womusu mɔ̀, kpa ba n nuku dobu mɔ̀, ba n guunu soomɔ. 13Ba ra ben wãaru diwa nuku dobu sɔɔ, kpa bu gbi subaru sɔɔ. 14Wee ba ra raa yellu Gusunɔ sɔ̃ bu nɛɛ, a gɛɛro min di, sa ǹ kĩ su wunɛn swɛɛ gia. 15Wara ra n Gusunɔ Dam kpurogii su ka sere nùn yoru diiya. Arufaani yerà sa kon mɔ sà n nùn kanamɔ. 16Tɔn ben bweseru, ba ǹ doo nɔɔru mɔ ro? Adama nɛ, na ǹ tɔn kɔ̃sobun bwisi kɛ̃ru kĩ. 17Ka mɛ, a ra wa mi tɔn kɔ̃sobun yam bururam mu gbimɔ? A ra wa ba nɔni sɔ̃ɔre? Gusunɔ u ra bu sɛɛyasie win mɔrun sɔ̃? 18A ra wa ba sãa nge yakasu, ǹ kun mɛ nge doo sakosu si woo ga ka doona? 19Bɛɛ i gerumɔ i mɔ̀, tɔn ben bibun bwesera Gusunɔ u ra sɛɛyasie. Adama nɛ, na nɛɛ, ben tiiwa n weenɛ u sɛɛyasia, kpa bu gia ma beya ba tora, 20kpa ben tii bu ben kam kobu wa. Nge mɛya ba koo ka Gusunɔn mɔru denda bu wa. 21Domi bà n gu ba kpa, ben baaye ka ye ya koo ben bibu deema. 22Sa ko kpĩ su Gusunɔ keu sɔ̃ɔsi, wi, wi u sãa win gɔradoban siri kowo? 23- 24Gabun wãara ra dorewa, ba n wãa bɔri yɛndu sɔɔ. Kpa ba n wasi bwãa do, ba n dam mɔ nge aluwaasi sere bu da bu ka gbi. 25Adama gabu ba ra gbiwa wahala sɔɔ, ba kun doo nɔɔru wa baa fiiko. 26Be kpurowa ba koo gbi, kpa bu ko kɔkɔnun dĩanu. 27I bɛɛn tii laakari ko, na bɛɛn bwisikunu yɛ̃ ka kɔ̃sa ye i man manimɔ. 28Domi i nɛɛ, mana tɔn bokon yɛnu ga wãa, gè sɔɔ tɔn kɔ̃soba wãa. 29Adama i ǹ be ba sarɔ swaaɔ bikiare? I kĩ i sikiwa ye ba bɛɛ sɔ̃ɔwa tɔn kɔ̃son sɔ̃? 30Wahala yà n tɔn kɔ̃so deema u ra yariwa ye sɔɔn di. Baa Gusunɔ ù n ka nùn mɔru kua, u ra kisirewa ye sɔɔn di. 31Ǹ n mɛn na, wara u koo maa nùn gerusi. Wara u koo nùn win kɔ̃sa kɔsie. 32Domi ù n gu, siki wɔruɔra ba ka nùn dɔɔ. Kpa ba n siki te kɔ̃su. 33Tɔn dabira ta koo win goru swĩi bu ka da siku yerɔ. Kpa u kpin yee buraru wa temɔ. 34Ǹ n mɛn na, nuku yɛmia birà i man kua. Bɛɛn ye i man wisa mi kpuro, ya ǹ sãa dee dee. Weesa i mɔ̀.

will be added

X\