1 Sofaa Naamagii u Yoobu sɔ̃ɔwa u nɛɛ, 2 wee nɛn bwisikunu dera na burisinɛ. Yen sɔ̃na na sɛnde n ka nun wisi. 3 Na wunɛn gerusibu nua, bi bu man dua too. Adama nɛn bwisi koo de n nun wisi. 4 Saa mìn di ba tɔnu taka kua, 5 a ǹ yɛ̃ ma kɔ̃san kowon nasara ku ra tɛ? Mɛya maa win nuku dobu kun tɛɛmɔ. 6 Baa ù n kpã u wɔllu babamɔ, ǹ kun mɛ u guru winu dɛkamɔ, 7 u koo kam kowa nge swaa swĩi bi tɔnu u kua. Be ba raa nùn waamɔ, ba koo nɛɛ, mana u wãa. 8 Ba koo nùn duariwa nge dosu. U koo doonawa nge wɔ̃kurun kãsiru. 9 Be ba raa nùn waamɔ, ba ǹ maa nùn wasi. Mi u raa wãa ba ǹ maa nùn wasi mi. 10 Sãarobu ba koo win bibu wɔri. Nge mɛya u koo ka bu wesia ye u raa bu mwaari ka dam. 11 U dam mɔ, ma u sãa nge aluwaasi. Adama u koo ka ye kpuro kpunawa sikirɔ. 12 Kɔ̃sa ra n dowa win nɔɔ sɔɔ, kpa u n ye bɛri win yaraɔ, 13 ya n girari sere win daroɔ. U ku ra n kĩ u ye deri. 14 Adama ya koo de win dĩanu nu sosia win nukurɔ, kpa nu gɔsia nge waa dɛ̃ɛ. 15 Gabun dukia ye u mwɛɛ, u koo ye sia. Gusunɔwa u koo ye yara win nukurun di. 16 Ye u koo nɔ, ya ko n sãawa nge waa dɛ̃ɛ, kpa yu nùn go. 17 U kun tamaa tim ka bom mu koo nùn kokua nge nim tora. 18 U koo win dukia wesia ye u wa mi. U ǹ maa yen arufaani dimɔ. 19 Domi u sãarobu dam dɔre. Ma u ben yɛnusu mwɛɛra, u ǹ wiguu banɛ. 20 Win bɔsɔnu ku ra yibu. Adama baa ye u kĩru bo, u ǹ kpɛ̃ u ye tii yiiya. 21 Gãanu sari ni u ǹ tii koosi. Adama win dukia ya ǹ tɛɛmɔ. 22 Baa ù n ye mɔ ya kpã, u ko n nuki sankirewa. Sãaru ta koo nùn wɔriwa. 23 Wee sanam mɛ u win nukuru yibiamɔ, Gusunɔ u koo nùn wɔri ka mɔru baka. Kpa u de sɛ̃ɛnu nu nùn wisi nge gura. 24 Baa ù n tabu yãa sisuginu duka suurimɔ, ba koo nùn twee ka sii gandun tɛndu. 25 Baa ù n sɛ̃u teu wuna win wasin di, ǹ kun mɛ ù n yaasa wuka win woo sɔndun di, gɔɔn bɛrum koo nùn sura. 26 Asɔrɔ ya koo win dukia deema. Kpa dɔ̃ɔ wi tɔnun bii kun sɔ̃rua u nùn mwa, wi ka win yãnu. 27 Wɔllu ta koo win durum sɔ̃ɔsi, kpa tem mu nùn seesi. 28 Win dirun arumani kpuro koo kam ko Yinni Gusunɔn mɔrun tɔ̃ru sɔɔ. 29 Yeniwa Yinni Gusunɔ u tɔn kɔ̃sobu yiiye. Yera ya bu mara sia.
