Yoobu 2

1Sɔ̃ɔ teeru, Yinni Gusunɔn gɔradoba ba kpam na ba yɔ̃ra win wuswaaɔ. Ma Setam tii u maa na u yɔ̃ra ben suunu sɔɔ. 2Yinni Gusunɔ u Setam bikia u nɛɛ, man diya a wee. Ma u nùn wisa u nɛɛ, na tem bɔsu bɔsu na ka sikerenawa. Yera na den gɔsirama na wee. 3Yinni Gusunɔ u maa Setam bikia u nɛɛ, a nɛn sɔm kowo Yoobu wa mi? Goo sari wi u ka nùn weenɛ handunia sɔɔ. U ra man mɛm nɔɔwɛ. U sĩimɔ gem sɔɔ. U ku ra kɔ̃sa kã. U maa man nasie. Yera a swaa kasu n ka nùn kɔ̃sa kua u kun man gãanu kue? 4Ma Setam u wisa u nɛɛ, a ǹ yɛ̃ ye tɔnu u mɔ kpuro, yera u koo wɛ̃ u ka win wãaru yakia? 5À n sikin na, a nùn nɔma dokeo a wa. Na yɛ̃ kam kam ma u koo nun bɔ̃rusi wunɛn tiin wuswaaɔ. 6Ma Yinni Gusunɔ u Setam sɔ̃ɔwa u nɛɛ, wee na nun nùn nɔmu bɛria, adama a ku nùn go. 7Ma Setam u doona Yinni Gusunɔn min di. Yen biru u da u Yoobu bwisi kɔ̃sunu wisi saa win wirun di sere win naasɔ. 8Ma Yoobu u da u sina torom sɔɔ u siru kɛ̃ka sua u ka gɔ̃ramɔ. 9Yera win kurɔ u nùn sɔ̃ɔwa u nɛɛ, sere ka tɛ̃, Gusunɔ wiya a ka yɔ̃ra mɛ? A nùn wɔnwɔ kpa a gbi. 10Adama Yoobu u kurɔ wi wisa u nɛɛ, a gari mɔ̀wa nge gari bɔkɔ. A tamaa sà n gea waamɔ Gusunɔn min di, sa ǹ maa kɔ̃sa wasi win min di? Ka yen de kpuro, Yoobu kun Gusunɔ gari kam gerusi. 11Yoobun bɔrɔba ita yeni, Elifasi Temagii, ka Bilida Suagii, ka Sofaa Naamagii ba wahala ye kpuro nua ye ya Yoobu deema, ma ben baawure u seema saa win tem di. Ba wesiana bu ka na Yoobun mi, kpa bu nùn nukuru yɛmiasia. 12Ye ba wee ba nùn wa sarun di, yera ba ǹ nùn tuba. Adama ye ba nùn turuku kua ba nùn tuba ma be kpuro ba wuri nɔɔ kpɛ̃ɛ. Yera ba ben yabenu nɛnua ba gɛ̃ɛka, ma ba tii tua wisi wirɔ nuku sankiranun sɔ̃. 13Ma ba sina ka wi tem mi, sɔ̃ɔ sɔɔ nɔɔba yiru ka wɔ̃kuru nɔɔba yiru. Goo kun nùn gãanu sɔ̃ɔwa. Domi ba wa ma win nɔni swãa te, ta kpã.

will be added

X\