Yoobu 18

1Bilida Suagii u Yoobu wisa u nɛɛ, 2sere domma kaa gari yini saarinu kpe. A den mario kpa su maa gere. 3Mban sɔ̃na a sun mɛɛra gari bakasu. Mban sɔ̃na a sun mɛɛra nge yaa saberu. 4Wunɛ Yoobu, wunɛn mɔruwa ya nun wahala mɔ̀. A tamaa ya koo de tɔmbu bu yarina kpa wuu gu ko bansu, kpa kpenu nu doona nin ayerun di? 5A n yɛ̃ ma tɔn kɔ̃son yam bururama mu koo gbi. Mɛn dɔ̃ɔ yari kun maa ballimɔ. 6Yam bururam mu koo gɔsia yam wɔ̃kuru win wãa yerɔ. Domi u koo gbi nge fitila. 7U ǹ maa sĩimɔ ka toro sindu. Win tiin bwisi koo nùn sura. 8Domi u koo da yina gia, kpa win naasu su yen wɛ̃ɛ wuronu wɔri. 9Yina koo nùn mwa naa tokurɔ, kpa yen wɛ̃ɛ yi nùn tɛ̃ke. 10Ba nùn taa bɛrie temɔ, win swaa sɔɔ. 11N wee nɔni swãara nùn mara ta ka sikerenɛ. Ma ta nùn swĩi birun di. 12Gɔ̃ɔra nùn wɔri, ta win dam kpa. Ma sãara nùn deema. 13Ta koo win wasin gɔna di beri berikan di. Kpa bara bakaru tu nùn mwa. 14Ba koo nùn wuna win wãa yerun di, tè sɔɔ u raa dam mɔ. Kpa bu ka nùn da gɔɔn sina kpaa bakarɔ. 15Wigiba koo yarina. Win arumanin tii ya koo kam ko. Kpa sɔ̃ɔ bisu su win yɛnu dɔ̃ɔ mɛni. 16Tɔn kɔ̃so wi, u ko n sãawa nge dãa. Win gbini yi koo gbera temɔ. Kpa bu win kãasi bɔɔri wɔllɔ. 17Ba koo win gari duari handunia sɔɔ. Ba ǹ maa win yĩsiru yaayamɔ. 18Domi ba nùn yara yam bururam di, ba sure yam wɔ̃kuru sɔɔ. Ma ba nùn gira handunian di. 19Win bii goo kun nùn bibu maruammɛ. Domi win yɛnugibu kpuro ba koo gbi. 20Tɔn be ba wãa tɛ̃ ba koo bɛrum soora. Kpa be ba koo marura win biru bu biti soora win kam koo bin sɔ̃. 21Nge mɛya tɔn kɔ̃sobu ka be ba ǹ Gusunɔ yɛ̃n wãa yeru ta ko n sãa.

will be added

X\