Yoobu 17

1Yoobu u nɛɛ, na wɛ̃siamɔ ka wahala, nɛn wãara kpeeyɔ. Siki wɔru ga man mara. 2Tɔn yaako kowobu ba man kooro bure. Ba man nɔɔ kuurimɔ beri berika. 3Yinni Gusunɔ, a de wunɛn tii a man mɔru bara. Ma n kun mɔ wunɛ, wara u koo man sanna. 4A ben bwisi wuna. A ku de bu nasara wa. 5Ba sãawa nge tɔnu wi mɔn teni ta ka yã, te ta nɛɛ, u win kpaasibu dim soka, ma win bibu ba ka gɔ̃ɔru sɔ̃. 6Ba man womusu doke, ba man yãatam siemɔ. 7Nɛn nɔni yi ǹ maa do, nuku sankiranun sɔ̃. Ma nɛn wasi yi dam dwiiya, yi doonɔ nge saaru. 8Gemgibu ba biti soore nɛn wahala yenin sɔ̃. Taarɛ sarirugibu ba koo tɔn kɔ̃sobu seesi. 9Wi u sãa gemgii u koo yɔ̃rawa dim dim win swaa sɔɔ. Kpa wi u dɛɛre, u tii dam kɛ̃ u sosi. 10Adama bɛɛ nɛn kpaasibu kpuro, i wurama i maa gari saari nɛn wuswaaɔ. Ka mɛ, na ǹ goo wasi bɛɛ sɔɔ wi u bwisi mɔ. 11Nɛn wãaru ta kpa. Wee himba ye na raa sãa ye kpuro ya kam kua. 12Nɛn kpaasiba tamaa wɔ̃kura sãawa sɔ̃ɔ sɔɔ. Sɔ̃ɔ ù n duɔ, kpa bu nɛɛ, yam sãramawa. 13Gɔribun wãa yera na mara tu ko nɛn wãa yeru. Yam wɔ̃kuru sɔɔra kon nɛn kpin yeru yi. 14Kon siki wɔru sɔ̃ n nɛɛ, geya ga sãa nɛn tundo. Kpa n maa kɔkɔnu sɔ̃ n nɛɛ, niya nu sãa nɛn mɛro ka nɛn sesubu. 15Mana na maa yĩiyɔbu mɔ. Wara u koo kpĩ u bu wa. 16Ba koo sara gɔribun wãa yerɔ, kpa su da tua sɔɔ sannu.

will be added

X\