Yoobu 16

1Yoobu u Elifasi wisa u nɛɛ, 2na gari yin bweseru nɔɔre nɔn dabinu. Bɛɛ, i sãawa nuku yɛmiasio be ba nɛn wahala sosimɔ. 3Domma kaa wunɛn gari saari kamgii nini kpe. Mban sɔ̃na a ka man sikirinamɔ. 4Ì n daa wãa nɛn ayerɔ, kpa na n maa wãa bɛɛgirɔ, kon bɛɛ gari saarisi n wii gimanu koosi. 5Nɛn gari yi koo bɛɛ dam kɛ̃, kpa n bɛɛ nukuru yɛmiasia ka nɛn gari yi. 6Nà n gari mɔ̀, nɛn wahala ya ǹ kpeemɔ. Nà n maa maari, ya ǹ doonɔ. 7Wee tɛ̃, Gusunɔ u dera na dam dwiiya. Ma u nɛn yɛnun yãnu kpuro gura. 8Na woora, nɛn gɔna gaware. Ya sɔ̃ɔsimɔ ma na tora. 9Gusunɔ u kua nɛn yibɛrɛ, u maa man gire ka mɔru u nɔɔ dɔnnɛ. Ma u man nɔni girari u kasu u nɛn wasi kasuku nge gbeeku yaa. 10U dera tɔmba man yaa kasikimɔ ka ben gari saarinu. Ba man wɔmmɔ, ba man baari soomɔ. Be kpurowa ba man naa swĩi. 11Gusunɔ u man be ba ǹ win bɛɛrɛ yɛ̃ nɔmu sɔndia. U man tɔn kɔ̃sobu nɔmu bɛria. 12Na raa wãa bɔri yɛndu sɔɔ ma u man burisina. U man nɛnua birun di, ma u man kɔsuka. U man kua nge tũburu te u tweemɔ. 13Win sɛ̃ɛnu man kooro bure. U nɛn gabu swii yabura ka wɔnwɔndu sariru. Ma u nɛn yɛ̃sɔ kɔra u yari temɔ. 14U man wɔrima nge tabu durɔ. Ma u man soomɔ u mɛɛra mɔ̀. 15Na saaki deewa, ma na nɛn wiru tua wisi nuku sankiranun sɔ̃. 16Na wuri kua sere nɛn nɔni swɛ̃ra, ma na gɔɔ nɔnu tera. 17N ǹ mɔ na kɔ̃sa gaa kua. Nɛn kanaru ta ra n maa dɛɛrewa baadomma. 18Wunɛ tem, a ku nɛn yɛm bere. A de nɛn kuuki yi nɔɔra baama kpuro. 19Domi na yɛ̃ kam kam ma na seedagii mɔ wɔllɔ. U wãa mi, u ka man yinamɔ. 20Nɛn kpaasibu ba man yaakoru mɔ̀. Adama Yinni Gusunɔwa na kanamɔ ka swĩi. 21Nɛn seedagii wi, u sun sirio nɛ ka Gusunɔ nge mɛ ba ra tɔnu ka win beruse sirie handunia sɔɔ. 22Domi nɛn wãarun tɔ̃nu nu kpeema. Ma na dɔɔ ka swaa yèn min di ba ku ra maa wuramɛ.

will be added

X\