Yoobu 15

1Elifasi Temagii u Yoobu wisa u nɛɛ, 2wi u bwisi mɔ u koo tɔnu wisi ka gari yi yi ǹ arufaani mɔ? U ko n gari yaramɔ nge woo? 3Wee gari yi a gerua a ka tii yina mi, yi ǹ sãa gãanu. Gari yi a saara mini kpuro sɔɔ, sari yi yi koo tɔnu somi. 4Wunɛ, a mam Gusunɔn nasiaru tɛɛsimɔwa, ma a win bɛɛrɛ yɛ̃ru kpeerasiamɔ. 5Wunɛn kom kɔ̃suma mu sɔ̃ɔsiramɔ wunɛn nɔɔn di. Ma a gari gerumɔ ka bwisi. 6Wunɛn nɔɔn gariya yi nun taarɛ wɛ̃ɛmɔ, n ǹ mɔ nɛ. Gari yi a gerua mi kpuro, yiya yi wunɛn toranu sɔ̃ɔsimɔ. 7Wuna ba gbia ba taka kua handunia sɔɔ? Wuna a gbia a wãa ba sere gungunu kua? 8A Gusunɔn gari asirigii swaa daki? A win bwisi mwa kpuro, a yi wunɛn tiin sɔ̃? 9Mba a yɛ̃ ye bɛsɛn tii sa ǹ yɛ̃. Yɛ̃ɛ terà a mɔ te bɛsɛn tii sa ǹ mɔ. 10Bɛsɛn suunu sɔɔ, tɔmba wãa be ba seri burura ba tɔkɔnu kua n kere wunɛn tundo. 11A bɛsɛn gari yi sa nun sɔ̃ɔwa ka laakari mɛɛrawa gãa piiminu, yìn min di Gusunɔ u nun nukuru yɛmiasiamɔ? 12Mana wunɛn bwisikunu ka nun dɔɔ. Mba wunɛn nɔni gɔsikia ninin tubusianu. 13Gari yi a saarimɔ mini, Gusunɔwa a ka mɔru mɔ̀. 14Tɔnu u koo kpĩ u n dɛɛre? Wi ba mara, u koo kpĩ u n yiba Gusunɔn wuswaaɔ? 15Gusunɔ ù kun win gɔradoba naanɛ kue, ma u ǹ wɔllu mɛɛra ta dɛɛre, 16wunɛ tɔnu amɔna kaa ka kpĩ a n dɛɛre win wuswaaɔ, wunɛ wi a ra kɔ̃sa ko kiri kiri nge mɛ ba ra nim nɔ. 17Tɛ̃, Yoobu, a man swaa dakio kpa n nun gari sɔ̃. Kon nun sɔ̃wa ye na wa. 18Sɔ̃ɔsi te bwisigibu ba sɔ̃ɔsi, ba tu giawa ben sikadoban min di. 19Be tɔnawa Gusunɔ u raa tem mɛ wɛ̃, sɔɔ goo raa maa sari be sɔɔ. 20Adama tɔn kɔ̃so u ko n wãawa nɔni swãaru sɔɔ win wãarun tɔ̃ru kpuro sɔɔ. 21Kpa u n gbãsukunu nɔɔmɔ ni nu koo nùn bɛrum mwa. Wi u koo nùn kam koosia, u koo nùn wɔri subaru sɔɔ. 22Tɔn kɔ̃so wi, u ku ra n yĩiyɔ u yam wɔ̃kuru duka suuri. Domi takobi ra n nùn marawa. 23U ra n sirenɛwa baama, u n kasu ye u koo di. U yɛ̃ kɔ ma yam wɔ̃kura nùn mara. 24Ma u nande wahala ka nɔni swãarun sɔ̃, ye ya nùn wɔriɔ nge sina bokon tabu kowobu be ba tabun sɔɔru kpa. 25Domi u Gusunɔ seesi. U Dam kpurogii nɔɔ kuurimɔ. 26U kãka u Gusunɔ tabu wɔri, win tɛrɛrun sinum sɔ̃. 27Win wuswaa ballimɔ. Ma win gãanu nu yaa taasinɛ. 28U wãa wuu si ba kɔsuka sɔɔ, sìn dia ba deri, ma ya wɔrumam dɔɔ. 29U ǹ gobi mɔ. Win dukia kun maa kuuramɔ. U ǹ maa yĩsiru yarimɔ win temɔ. 30U ǹ kpɛ̃ u gɔɔn tɔ̃ru duka suuri. Win bweseru kpuro ta koo dɔ̃ɔ mwaarawa. Kpa Gusunɔ u nùn wom wure u go. 31Ù n kɔ̃sa naanɛ sãa u tii nɔni wɔ̃kuawa mi. Domi kɔ̃sa yen areya u koo wa. 32Are yi, yi koo nawa u sere gbi. Win bwese kɛra kun maa seemɔ, nge dãa kãasa ye ya ǹ maa kparamɔ. 33U ko n sãawa nge resɛm yèn bii birenu ba wɔka, ǹ kun mɛ nge olifin dãa tèn wɛ̃su ba dɛra. 34Tɔn kɔ̃so u ǹ bweseru wasi. Dɔ̃ɔ u koo wi u nɔm biran kɛ̃nu mwaamɔn yɛnu wɔri. 35Wi u kɔ̃sa bwisika, kɔ̃sa u koo ko. Domi bwisi kɔ̃si yiya yi ra n wãa win nukurɔ. Kpa yi n nùn nɔni wɔ̃kua.

will be added

X\