1 Yoobu u nɛɛ, tɔnu wi ba gesi mara, win wãara ku ra n dɛ̃u. Mɛya ta ra n maa nɔni swãaru yiba. 2 U ra sewa nge dãa wɛ̃su, kpa bu nùn bura. U ra doonɛwa nge saaru. 3 Tɔnu wiya a mɛɛra, ma a nùn siribu soka? 4 Wara u koo kpĩ u gãa kɔ̃sunun di gãa dɛɛranu yara. Goo sari. 5 À n tɔnun wãarun tɔ̃ru yi a ten suru gara, u ǹ maa saramɔ mɛ. 6 Ǹ n mɛn na, a ku maa nùn nɔni girari, adama a de u wɛ̃ra, kpa u win sɔmburu ko, u win kɔsiaru mwa ka nuku dobu. 7 Dãru ta ra n yĩiyɔbu mɔ ma ta koo se bà n tu bura. Domi ta koo kpara. 8 Ten gbini yì n maa tɔkɔ kua, ma ten kora wɔruma ta gu, 9 ten gbina gaa ra maa kparewa yà n nim wa kpa yu kpii pɔtura ko. 10 Adama tɔnu u ra gbiwa, kpa u kun maa wãa. Ù n gu, mana u ra n wãa. 11 Daa burerun nim mu ra gbere. Daa bakanun nim mu ra maa kpe. 12 Nge mɛya tɔnu u ra kpunɛ u kun maa seewe. U ǹ maa dom yandamɔ sere wɔllu tu ka kpe. 13 Gusunɔ, na kĩ a man bere gɔribun wãa yerɔ, na n kukua mi, sere wunɛn mɔru yu ka sure, kpa na n wãa mi sere dɔma te kaa man yaaya. 14 Tɔnu ù n koo raa se sanam mɛ u gu, na kon yĩiyɔbu mɔ nɛn wahala yeni sɔɔ sere nɛn wãaru tu ka kɔsi. 15 Saa ye sɔɔ, Gusunɔ, à n nɛn bɛkɛ barɔ, à n man soku, nɛ wi na sãa wunɛn taka koora, kon nun wurari. 16 Wee tɛ̃ a man swĩi mi na naasu wuka kpuro. Adama saa gaa sisi yè sɔɔ a ǹ maa nɛn durum garisimɔ. 17 Kaa nɛn toranu doke saaki sɔɔ a bɔke. Kpa a man nɛn durum kpuro wɔka. 18 Guunu koo wɔruku nu kam ko. Kpa kpenu nu swɛnya mi nu raa wãan di. 19 Nim mu koo kpenu kɔsuku, kpa mu maa ka tem kusanu doona. Nge mɛya a ra tɔnun yĩiyɔbu kam koosie win wãaru sɔɔ. 20 Kpa a nùn nɔni swãa dabinu kpɛ̃ɛ. À n deema u ǹ maa sãa nge yellu, kpa a nùn gira u doona. 21 Baa win bibu bà n yĩsiru yara, win tii u ǹ maa kpɛ̃ u n yɛ̃. Mɛya bà n maa wãa sekuru sɔɔ, u ǹ kpɛ̃ u n yɛ̃. 22 Win wahala tɔnawa ya koo nùn nɔni sɔ̃. Wi turowa u ko n nuki sankire win gɔ̃ruɔ.
