Yoobu 13

1Wee nɛn nɔni yi ye kpuro wa, nɛn swasu su maa ye kpuro nua, ma na ye laakari kua. 2Ye i yɛ̃, yera nɛn tii na maa yɛ̃. I ǹ man bwisi kere. 3Adama Yinni Gusunɔ Dam kpurogiiwa na kĩ n gari sɔ̃. Wiya kon weeweenu koosi. 4Domi bɛɛ, weesa i ra n sekumɔ. I sãawa tim nɛmɔ weesugibu. 5N daa buram bo i n maari, kpa bu bɛɛ garisi nge bwisigibu. 6Tɛ̃, i nɛn weeweenu swaa dakio, kpa i nɔ ye na gerumɔ. 7I tamaa i ko i Gusunɔn biru yɔ̃ra ka weesu? I ko i nùn mɔru bara ka gari weesugii? 8Bɛɛya i ko i ka nùn yina? Bɛɛya i ko i nùn weeweenu kua? 9Ù n bɛɛ wɛ̃ɛra i ko i nùn wɛ̃re? I ko i nùn nɔni wɔ̃ke nge tɔnu? 10Baa ì n win biru yɔ̃ra asiri sɔɔ, ka mɛ, u koo bɛɛ taarɛ wɛ̃. 11Win kpãaru ta ǹ bɛɛ bɛrum mɔ̀? I ǹ nandamɔ win sɔ̃? 12Bɛɛn gari saarinu nu sãawa nge torom. Ye i gerumɔ ya ǹ dam mɔ nge weke te ba ka sɔndu mɔma. 13I mario, kpa i de n gari gere, kpa n man deema ye n ko n man deema. 14Wee na sɔɔru kpa, baa nà n kon nɛn wãaru bian na. 15Gusunɔ ù n kĩ, u man goowo. Ka mɛ, wiya na naanɛ sãa. Kon ka tii yina win wuswaaɔ. 16Ya koo kpĩ yu ka man faaba naawa. Domi tɔn kɔ̃so kun kpɛ̃ u tera win wuswaaɔ. 17I swaa dakio i nɛn gari nɔ. I swaa tem kpĩiyɔ i nɔ ye kon gere. 18Wee na sɔɔru kpa n ka nɛn gari gere. Na maa yɛ̃ ma na gem mɔ. 19Wara u koo ka man sikirina nɛn gem sɔɔ. Na sɔɔru kpa nà n taarɛ mɔ n ka nɔɔ mari kpa n kpuna n gbi. 20Gusunɔ, a man gãanu yiru yeni kuo, kpa n ku maa nun kukua. 21A man wunɛn nɔmu swɛnyario, kpa na kun maa nande. 22A man sokuo, kpa n nun wurari. Nà n nun kana, a man wisio. 23Toranu nyewa na nun torari. A de n nu gia. 24Mban sɔ̃na a man biru kisi, ma a man kua nge wunɛn yibɛrɛ. 25Wara a naa gire. Wuru ge ga ka woo doonɔ? Wara a naa swĩi. Yaka gbebusu? 26Mban sɔ̃na a man wahala baka yeni kpɛ̃ɛ, ma a man sɛɛyasiamɔ nɛn aluwaasirun toranun sɔ̃. 27Mban sɔ̃na a man yɔ̃rasia nge wìn naasu ba bɔkua ka sii yɔni, ma a nɛn kookoosu kpuro mɛɛra, ma a nɛn naa dabusanun geeru yi. 28Wee nɛn wasi yi dam dwiiya yi sankira nge yabe te kɔkɔnu di.

will be added

X\