Yoobu 12

1Yoobu u Sofaa wisa u nɛɛ, 2mɛya, bɛɛya i tɔmbun yɛ̃ru kpuro mɔ. Ì n gu, bwisi kpawa mi handuniaɔ. 3Adama nɛn tii na maa bwisi mɔwa mi nge bɛɛ. I ǹ man bwisi kere. Wara kun yeni kpuro yɛ̃ ye i saara mi. 4Baa mɛ na Gusunɔ kana, u man wisa, nɛn kpaasiba man yaakoru mɔ̀. Baa mɛ na ǹ taarɛ gaa mɔ, nɛn bɔrɔba ba man yɛ̃ɛmɔ. 5Be ba wãa bɔri yɛndu sɔɔ, ba ra n wɔnwɔndobu ka be ba sɛllamɔ gɛmawa. 6Gbɛnɔbun yɛnu ga ra n wãa alafia sɔɔ. Be ba Gusunɔ seesimɔ, ba ra n wãa bɔri yɛndu sɔɔ. Ba ra n ben tiin dam sãamɔ. 7A yɛɛ ka gunɔsu bikio, su koo nun sɔ̃. 8A tem bikio, mu koo nun bwisi kɛ̃. A de swɛ̃ɛ yi nun saaria. 9Taka koora ye kpuro sɔɔ, yen yerà ya ǹ yɛ̃ ma Yinni Gusunɔwa u ye kpuro mɔ̀. 10Wiya u taka koora kpuro ka hunde koni baayere kpuron wãaru nɛni. 11Yen sɔ̃na ba mɔndu kua ba nɛɛ, soowa ga ra garin dobu wunanɛ, kpa daro gu maa dĩanun dobu wunana. 12Wi u tɔkɔ kua u ra n yɛ̃ru mɔ. Wi u maa hunde dɛnya u ra n bwisi mɔ. 13Adama Yinni Gusunɔwa u bwisi ka laakari ka dam kpuro mɔ. 14Ye u sanka kpuro, goo kun kpɛ̃ u ye sɔmɛ. Wi u maa mwa u pirisɔm doke, goo kun kpɛ̃ u yɛ̃ro yara. 15Ù n gura yɔ̃rasia, kpuro ra gberewa. Ù n maa ye yɔ̃su, kpa tem mu sankira. 16Wiya u dam ka laakari mɔ. Wiya u maa tɔnu mɔ wi u tora ka wi u win winsim torasia. 17U ra be ba ra tem wunanɔsu ko mwɛɛri tereru. Kpa u de siri kowobu bu gɔsia wiirobu. 18U ra sinambu bandu yare, kpa u bu ko yobu. 19U ra yãku kowobu mwɛɛri tereru, kpa u ben damgibu suriri. 20U ra bèn nɔɔn gari ba ra naanɛ ko dɛre u kɔ̃, kpa u durɔ tɔkɔnun laakari kpeerasia. 21U ra wirugibu sekuru doke, kpa u sinambun dam bua. 22U ra ye ya berua yam wɔ̃kuru sɔɔ kpuro terasie, kpa u de yam bururam mu sɔ̃ɔsira mi yam wɔ̃kura raa wãa. 23Wiya u ra bwesenu dabiasie, kpa u maa nu kpeerasia. Wiya u ra de nu tɛria, kpa u maa nu kawa. 24U ra bwesenun wirugibun bwisi wunɛ, kpa u de ba n bɔsu gbaburɔ, mi swaa sari. 25U ra de ba n babi yam wɔ̃kuru sɔɔ, kpa u de ba n bɔsu nge be tam mu goomɔ.

will be added

X\