Yoobu 11

1Sofaa Naamagii u Yoobu wisa u nɛɛ, 2a tamaa wunɛn gari dabi nini kpuro nu ǹ koo wisibu wa? A tamaa tɔnu u ko n sãa gemgii win gari yɛ̃run sɔ̃? 3Wunɛn gari saari nini nu koo de tɔmba kun nun gãanu wisa? Kaa yaako gari gere goo u kun nun taarɛ wɛ̃? 4A gerua a nɛɛ, ye a gerua kpuro ya ra n sãawa gem, a maa dɛɛre Gusunɔn wuswaaɔ. 5Na ra n kĩwa Gusunɔ u nɔɔ wukia, kpa u nun wisi. 6U nun win bwisi bɛkɛn asiri sɔ̃ɔsi, kpa a gia ma u ku ra nun sɛɛyasie nge mɛ̀n nɔɔ wunɛn toranu nɛ. 7A tamaa kaa kpĩ a Gusunɔn bwisikunu tubu? A tamaa kaa kpĩ a wi, Dam kpurogii gia mam mam? 8Win yɛ̃ru ta wɔllu gunum kere. Ǹ n mɛn na, mba kaa ko. Ta maa gɔribun wãa yeru dukum kere. Ǹ n mɛn na, mba kaa tubu mi. 9Ta tem kpãaru kere, ta maa nim wɔ̃ku yasum kere. 10Gusunɔ ù n sarɔ, ma u tɔn kɔ̃so mwa u ka da siri yerɔ, wara u koo nùn ye yinari. 11Domi u tɔnu kam yɛ̃. U ra maa tɔn kɔ̃sobu tubu mii mii. 12Adama tɔnu u ra bwisikuwa nge gari bɔkɔ, domi ba nùn marawa nge kɛtɛku gbeekun buu. 13Yen sɔ̃, wunɛ, a wunɛn gɔ̃ru wesio Yinni Gusunɔn mi gia. Kpa a nɔma yiiya a nùn kana. 14A kɔ̃sa derio, kpa ya kun maa wãa wunɛn yɛnuɔ. 15Saa ye sɔɔra kaa wiru seeya a n dɛɛre. Kaa n tãsa, kpa a kun maa gãanun bɛrum mɔ. 16A ǹ maa wunɛn wahala yeni yaayamɔ, ya koo doonawa nge nim mɛ mu koka. 17Wunɛn wãara koo wuramawa nge sɔ̃ɔ wii wɔllun sɔ̃ɔ. Kpa yam wɔ̃ku te ta raa nun wãasi, tu gɔsia yam bururam. 18Kaa n sɔ̃ ka toro sindu domi kaa n yĩiyɔbu mɔ. Kpuro koo nun koora dee dee kpa a wɛ̃ra bɔri yɛndu sɔɔ. 19À n kpĩ, goo kun nun baasimɔ. Tɔmbu kpuro ba koo wunɛn nɔnu geu kasu. 20Adama tɔn kɔ̃sobu ba koo nɔni swãaru wa. Ba ǹ kuku yeru wasi. Gɔɔ baasi, ba ǹ ko n maa gãanu ganu yĩiyɔ.

will be added

X\