Yoobu 10

1Wãara man tusa. Na ǹ nɛn weeweenu yɔ̃rasiamɔ. Kon gerewa wahala ye na mɔ̀. 2Kpa n Gusunɔ sɔ̃ n nɛɛ, a ku man taarɛ wɛ̃. A de n gia yèn sɔ̃ a man nɔni swãaru kpɛ̃ɛ. 3Yinni Gusunɔ, n nun wɛ̃re a ka man kɔ̃sa kua, nɛ wi na sãa wunɛn nɔman taka koora, kpa a sere de gari yi tɔn kɔ̃soba bɔkua yi koora? 4Tɔnun nɔniya a mɔ? A ra yam wawa nge tɔnu? 5Wunɛn wãarun tɔ̃nu nu ko n sãawa nge tɔnuginu? Wunɛn wãarun wɔ̃su, su nɔru mɔwa nge tɔnugisu? 6Mban sɔ̃na a kasu a ka nɛn kɔ̃sa gia. Mban sɔ̃na a hania mɔ̀ a ka nɛn toraru wa. 7A yɛ̃ ma na ǹ sãa tɔn kɔ̃so. Goo kun maa kpɛ̃ u man wɔra wunɛn nɔman di. 8Wunɛn nɔma ya man mɔma ya taka kua mam mam. Yera kaa man kpeerasia? 9A yaayo ma wuna a man mɔma nge mɛ ba ra gãanu mɔm ka sɔndu. Yera a kĩ a man kpeerasia, n gɔsia tua? 10Wuna a man mɔma nɛn mɛron nukurɔ nge mɛ bom mu ra sinum ko gbɛ̃ɛru sɔɔ mu gɔsia gasaru. 11Wuna a nɛn wasin kukunu ka yin sĩinu kua, ma a nu yaa baasi ka gɔna wukiri. 12A man wãaru wɛ̃ wunɛn durom sɔ̃. Ma a tu nɛnusi a kɔ̃su. 13Adama ye a raa man beruammɛ wunɛn gɔ̃ruɔ, na ye gia. 14Nà n tora, a ra n man mɛɛra, a ku ra man yen suuru kue. 15Nà n sãan na tɔn kɔ̃so, na kua bɔ̃ruro. Nà n maa dɛɛren na, na ǹ maa wiru seeyamɔ, domi sekura man mɔ̀, ma na nɔni swãaru nɔɔramɔ. 16Nà n wiru seeya, a ra man naa gire nge gbee sunɔ, kpa a man so a sura ka wunɛn sɔm maamaakigia. 17A maa man nɔni swãaru suremɔ a sɔnnamɔ, ma a wunɛn mɔru sosimɔ. A dera yibɛrɛba ba na ba man tabu wɔri. 18Mban sɔ̃na a man yara nɛn mɛron nukurun di. N daa buram bo n gbi mi, kpa goo u kun man wa. 19Kpa na n sãa nge wi u kun daa wãa, domi na kon daa duawa siki wɔruɔ sanam mɛ na yara nɛn mɛron nukurun di. 20Wãa te ta man tie, ta ǹ maa kpã. Yen sɔ̃, a man derio n nuku dobu ko saa fiiko ye sɔɔ, 21n sere da gɔriɔ mi yam wɔ̃ku bakara wãa, mi nà n da, na ǹ maa wee. 22Tem mi, yam wɔ̃ku bakara ta wãa ka maa burisinaa. Yam bururam mɛ mu wãa mi, mu sãawa yam wɔ̃ku bakaru.


Copyrighted Material
Learn More

will be added

X\