Yoobu 1

1Durɔ goo wãa Usiɔ, win yĩsira Yoobu. Durɔ wi, u sãawa wi u ra Gusunɔ mɛm nɔɔwɛ. U sãa gemgii, ma u Gusunɔ nasie. U ku ra kɔ̃sa kã. 2Bii tɔn durɔbu nɔɔba yiruwa u mara, tɔn kurɔbu maa ita. 3Sabe ni u maa mɔ, ni wee, yãanu nɔrɔbun suba nɔɔba yiru (7.000), ka yooyoosu nɔrɔbun suba ita (3.000), ka naa wuku nɔrɔbu (1.000), ka kɛtɛku ninu nɛɛra wunɔbu (500), ka sɔm kowo dabi dabinu. Durɔ wiya u dukia bo sɔ̃ɔ yari yerun bera mi gia. 4Win bii tɔn durɔ be, ba ra n tɔ̃ɔ baka dim sokunamɔwa, kpa bu ben sesubu ita ye soku bu na bu ka di bu nɔ. 5Bà n tɔ̃ɔ bakaru di ba kpa mɛ, Yoobu u ra bu sokuwa kpa u bu sãrasia, kpa u se buru buru yellu u yãku dɔ̃ɔ mwaararuginu ko ben baawuren sɔ̃. Domi u ra tii sɔ̃wa u nɛɛ, sɔrɔkudo nɛn bibu ba ko n Gusunɔ toraru garu kue ben gɔ̃ruɔ. Nge mɛya u ra ko saa kpuro. 6Yera sɔ̃ɔ teeru Yinni Gusunɔn gɔradoba ba na ba yɔ̃ra win wuswaaɔ. Ma Setam tii u maa na u yɔ̃ra ben suunu sɔɔ. 7Ma Yinni Gusunɔ u nùn bikia u nɛɛ, man diya a wee. Ma u nùn wisa u nɛɛ, na tem bɔsu bɔsu na ka sikerenɛwa, yera na den gɔsirama na wee. 8Ma Yinni Gusunɔ u maa Setam bikia u nɛɛ, a nɛn sɔm kowo Yoobu wa mi? Goo sari wi u ka nùn weenɛ handunia sɔɔ. Durɔ wi, u ra man mɛm nɔɔwɛ, kpa u n sĩimɔ gem sɔɔ. Mɛya u ku ra kɔ̃sa kã. U maa man nasie. 9Ma Setam u Gusunɔ wisa u nɛɛ, a tamaa kama Yoobu wi, u ka nun nasie? 10N ǹ wuna a nùn kɔ̃su wi ka win yɛnugibu ka sere win ye u mɔ ro? Ma a win sɔma kpuro domaru kua. A dera win yaa sabenu nu tɛrie tem mɛ sɔɔ. 11Tɛ̃, a win ye u mɔ nɔmu dokeo a wa. Na yɛ̃ kam kam ma u koo nun bɔ̃rusi wunɛn tiin wuswaaɔ. 12Ma Yinni Gusunɔ u Setam wisa u nɛɛ, ye Yoobu u mɔ kpuro, na nun ye nɔmu bɛria. Adama a ku win tii baba. Yen biru Setam u doona Yinni Gusunɔn wuswaan di. 13Sɔ̃ɔ teeru Yoobun bii be kpuro ba mɛnnɛ ba dimɔ ba nɔrumɔ ben tɔnweron yɛnuɔ. 14Yera Yoobun sɔm kowo goo u na win mi, u nùn sɔ̃ɔwa u nɛɛ, wee sanam mɛ sa ka nɛɛ yi wukumɔ, ma kɛtɛkunu nu yakasu dimɔ, 15Sabegibu ba na ba wunɛn yaa sabe ni wɔri, ba mwɛɛra. Ma ba wunɛn sɔm kowobu go go ka takobi. Nɛ turowa na kpĩa na bu kisirari. Yen sɔ̃na na na n nun sɔ̃. 16Durɔ wi, u ka gari yi gere u kpe, win sɔm kowobun turo maa na u nùn sɔ̃ɔwa u nɛɛ, wee guru gbãa ya wunɛn yãanu wɔri, ka wunɛn sɔm kowobu ma ya bu di. Nɛ turowa na yara min di. Yen sɔ̃na na na n nun ye sɔ̃. 17Saa ye sɔɔ, win tii u gari gerumɔ u ǹ kpa, win sɔm kowo goo maa ka tunuma. U nùn sɔ̃ɔwa u nɛɛ, wee Kaladeban wuuru ita gaa ya na ya wunɛn yooyoosu wɔri ya mwɛɛra. Ma ba wunɛn sɔm kowobu mwɛɛra ba go ka takobi. Nɛ turowa na bu kisirari. Yera na na n nun ye sɔ̃. 18Saa yè sɔɔ wini maa gari gerumɔ u ǹ kpa, kpao maa ka tunuma. U nùn sɔ̃ɔwa u nɛɛ, wunɛn biba sɔ̃ ba dimɔ ba nɔrumɔ ben tɔnweron dirɔ, 19yera woo damguu gaga na saa gbaburun bera giɔn di. Ma ga dii ten goonu nnɛ swee, ma dii te, ta be kpuro wɔri ta go. Wee nɛ turowa na yara min di. Yera na na n nun ye sɔ̃. 20Ye Yoobu u yeniba kpuro nua, yera u seewa u win yaberu nɛnua u karana, ma u tii wii pɔɔru woka nuku sankiranun sɔ̃. Ma u yiira u siriru tem girari u nɛɛ, 21wee na yarawa tereru nɛn mɛron nukurun di. Terera ba koo maa man sike. Yinni Gusunɔwa u raa man ye kpuro wɛ̃, wiya u maa ye kpuro sua. Yen sɔ̃, kon nùn siara. 22Ka yen de kpuro Yoobu kun Gusunɔ kɔ̃sa gaa mani. U ǹ maa nùn torari.

will be added

X\