1 Yeremi u nɛɛ, nà n daa kuru mɔ gbaburɔ, kon daa dawa ten mi, n nɛn tɔmbu deri na n ka bu tondinɛ. Domi be kpuro ba sãawa nge sakara kowobu. Ma ba kua naanɛ sarirugibu. 2 Yinni Gusunɔ u gerua u nɛɛ, ba ra n nɔɔ dɛ̃ɛrawa bu ka weesu ko. Ba ku ra tem mɛ kpare dee dee gem sɔɔ, sere ka weesu. Wee siya su kua ben dam. Ba ra n nuku kɔ̃suru mɔ̀wa ba n dɔɔ. Mɛya ba ku ra nɛ, Yinni Gusunɔ wure. 3 Baawure u ra n win kpaasi taki dimɔwa. Ba ǹ naanɛ mɔɔsinɛ. Ba ra n kɔrumɔtɔnu kuanammɛwa, kpa ba n weesu sɔ̃ɔnamɔ. 4 Kpa ba n nɔni wɔ̃kunamɔ. Ba ku ra gem sɔ̃ɔnɛ, kpa ba n ben nɔɔ dɛ̃ɛrimɔ bu ka weesu ko. Mɛya ba ra n mɛɛrimɔ nge mɛ ba koo ka kɔ̃sa ko. 5 Ba ra tii wɛ̃ kɔ̃san kobu ka weesu sɔɔ sere ba yina bu man wura. 6 Nɛ, Gusunɔ, wɔllu ka tem Yinni, na nɛɛ, wee, kon bu sɔwa n ben laakari mɛɛri. Domi na ǹ yɛ̃ ye kon ka nɛn tɔn beni ko ben nuku kɔ̃surun sɔ̃. 7 Wee, tɔn ben yara ya sãawa nge sɛ̃ɛ dɛ̃ɛguu ge ga ra go. Weesa ba ra n mɔ̀, kpa ba n ben berusebu bɔri yɛndun gari sɔ̃ɔmɔ. Adama ben gɔ̃ruɔ, yina ba ra n bu bɛrie. 8 Yeniban sɔ̃, kon bu sɛɛyasia kpa n bu mɔru kɔsie. Nɛ, Yinni Gusunɔwa na yeni gerua. 9 Yeremi u nɛɛ, kon guunu ka mi ba ra raa yaa sabenu kpare swĩiya. Domi nu gbera, goo ku ra maa sare mi, ba ku ra maa yaa sabenun wuri nɔ mi. Ma gunɔsu ka gbeeku yɛɛ yi duki yakikira min di. Gãanu kun maa wãa mi. 10 Yinni Gusunɔ u nɛɛ, u koo de Yerusalɛmu yu ko bansu, kpa yu ko gbeeku bɔ̃nun wãa yeru. Mɛya u koo maa de Yudaban wusu su ko bansu. 11 Wara u bwisi mɔ u ka ye tubusia. Yinni Gusunɔ ù n ka yɛ̃ro gari kua, u geruo yèn sɔ̃ tem mɛ, mu kua bansu mi goo ku ra maa sare. 12 Yinni Gusunɔ u maa nɛɛ, yeni ya koorawa yèn sɔ̃ nɛn tɔmbu ba nɛn woodaba deri ye na bu wɛ̃, ma ba ǹ nɛn gere wure, ba ǹ ka ye sɔmburu kue. 13 Ma ba ben tiin kĩru swĩi ba bũu wi ba mɔ̀ Baali sãwa nge mɛ ben baababa ba bu sɔ̃ɔsi. 14 Yen sɔ̃na nɛ, Gusunɔ Isireliban Yinni, nɛ wi na wɔllu ka tem mɔ, na nɛɛ, wee, kon bu dãa kiku gagu ge ga sosu diisia, kpa n bu nim mɛ mu dɛ̃ɛ mɔ nɔrusia. 15 Kpa n de bu yarina bu da bwese tukunun suunu sɔɔ, mi be ka ben baababa ba ǹ daa yɛ̃. Kon de bu bu go ka takobi, kpa bu bu kam koosia mam mam. 16 Nɛ, Gusunɔ wɔllu ka tem Yinniwa na yeni gerua. Yeremi u nɛɛ, i doo i tɔn kurɔ be ba ra gɔɔ swĩ kasuma. I doo i yen goniba sokuma 17 bu na fuuku bu sun gɔɔ wuri kua, kpa bɛsɛn nɔni yĩresu su koku. 18 Domi wuri nɔɔra Siɔniɔ. Ba mɔ̀, wee, ba sun gura, seku bakara sun deema. N kua tilasi su ka bɛsɛn tem deri. Wee ba bɛsɛn yɛnusu kɔsuka. 19 Bɛɛ kurɔbu, i Yinni Gusunɔn gari nɔɔwɔ. Kpa i swaa daki i nɔ ye u gerumɔ. I bɛɛn wɔndiaba wuri sɔ̃ɔsio, i gɔɔ wuri sɔ̃ɔsinɔ. 20 Domi gɔɔ u sun kãasi saa fɛnɛntin di, ma u dua sere sina kpaarɔ. Mɛya u maa bii be ba bɔsu swɛɛ sɔɔ goomɔ, ka sere maa aluwaasiba mi ba ra gesi mɛnnɛ kpuro. 21 Yinni Gusunɔ u nɛɛ, tɔmba koo wɔruku bu gbisuku, kpa ben gonu nu n tɛrie yakasɔ nge naa bisu, ǹ kun mɛ nge dobi yi yi gea yina ba deri gberɔ. Ba ǹ maa yi suamɔ. 22 Yen sɔ̃, bwisigii u ku woo kana win bwisin sɔ̃. Damgii u ku maa woo kana win dam sɔ̃. Mɛya dukiagii u ku woo kana win dukian sɔ̃. 23 Adama wi u kĩ u woo kana, u woo kanɔ yèn sɔ̃ u bwisi mɔ u ka man tubu, ma u yɛ̃ ma nɛna na sãa Yinni Gusunɔ. Na sãawa naanɛgii wi u ra siri dee dee, kpa u de durom mu n wãa tem sɔɔ. Tɔn benin bwesera ba ra man wɛ̃re. Nɛ, Yinni Gusunɔwa na yeni gerua. 24 Wee tɔ̃ru gara sisi tè sɔɔ kon bu kam koosia be ba bango mɔ wasi sɔɔ ma ba ku ra nɛn arukawani yibie. 25 Beya Egibitigibu, ka Yudaba, ka Edɔmuba, ka Amɔniba, ka Mɔabuba, ka be ba ra ben wii baarun seri kɔni, ka sere be ba wãa gbaburɔ. Domi bwese tuku ni kpuro ka mam Isireliban tii, ba sãawa bango sariba ben gɔ̃rusɔ.
