Yeremi 8

1Yinni Gusunɔ u nɛɛ, yen tɔ̃ɔ te, ba koo Yudaban sinambu ka ben asakpɔbun kukunu sikia sikirun di ka ben yãku kowobuginu ka ben sɔmɔbuginu ka sere maa Yerusalɛmun tɔmbuginu. 2Sɔ̃ɔ sɔɔ, nu ko n sɔ̃ɔ soore. Wɔ̃kuru kpa nu n wãa suru ka kperin tarum sɔɔ. Ba ǹ maa nu guramɔ bu sike. Nu koo kowa taaki tem sɔɔ. Domi sɔ̃ɔ ka suru ka kperi yiya ba raa kĩa ma ba yiira ba yi sãwa. 3Be ba koo tiara be, Yuda daa kɔ̃sagii be sɔɔ, mi na bu yarinasia kpuro, gɔɔwa ba ko n kĩ n kere wãaru. Nɛ, Yinni Gusunɔwa na yeni gerua. 4Yinni Gusunɔ u Yeremi sɔ̃ɔwa u nɛɛ, a nɛn tɔmbu bikio a nɛɛ, tɔnu ù n wɔruma, u ku ra se? Goo ù n gɛra win swaan di, u ku ra wuramɛ? 5Ǹ n mɛn na, mban sɔ̃na nɛn tɔmbu Yudaba ba swaa kɔ̃sa swĩi ba dɔɔ. Ba yɔ̃rariwa dim dim ben weesu sɔɔ ba n bũnu sãamɔ. Ba ǹ kĩ bu gɔsirama nɛn mi. 6Na yɔ̃ sɛ̃ɛ na bu swaa daki ka laakari. Ba gari gerumɔ yi yi ǹ asansi gaa mɔ. Ben goo kun gɔ̃ru gɔsiamɔ win nuku kɔ̃surun di, u nɛɛ, mban sɔ̃na u yeni mɔ̀. Be kpuro ba ben tiin swaa swĩiwa nge duma ye ya wãa tabu sɔɔ. 7Baa tionko ka kpurabu ka kpaaru baniku nu yɛ̃ saa ye n weenɛ nu sĩ ka saa ye n weenɛ nu wurama nin wãa yerɔ. Adama nɛn tɔmbu ba ǹ nɛn wooda yɛ̃ ye na ka bu kpare. 8Yinni Gusunɔ u maa nɛɛ, amɔna ba koo ka kpĩ bu nɛɛ ba bwisi mɔ. Beya ba nɛ Gusunɔn wooda mɔ. Domi be ba wooda ye yorua, ba ye gɔsiawa. 9Wee bwisigiba nɛ, Yinni Gusunɔn gari gɛma. Ma ba yibɛrɛban yina mwaara ba wãa biti ka sekuru sɔɔ. Ǹ n mɛn na, bwisi yirà ba maa mɔ. 10Yen sɔ̃na nɛ, Yinni Gusunɔ, kon de yibɛrɛba bu ben kurɔbu ka ben gbea mwɛɛri. Domi saa ben bwɛ̃ɛbwɛ̃ɛbun di n ka girari ben damgibɔ, ben tii tiin arufaaniwa ba ra n naa gire ka taki. Nɛn sɔmɔbu ka yãku kowobu, weesa ba ra n mɔ̀. 11Ba ra n nɛn tɔmbun wahala atafiiru sãawa, ba n mɔ̀, alafia wãa, adama alafia gaa sari. 12N weenɛwa sekuru tu bu mwa kɔ̃sa ye ba mɔ̀n sɔ̃. Adama sekura ku ra bu mwɛ bu tuka. Ba ku ra maa ben toranu tubu. Yen sɔ̃na ba koo wɔruma bu gbi dɔma te kon bu sɛɛyasia. Nɛ, Yinni Gusunɔwa na yeni gerua. 13Yinni Gusunɔ u nɛɛ, gbaa wuko u ra win dĩanu gɛ̃wa u mɛnna. Adama wee, na kĩ n nɛn dĩanu mɛnna Isireliban mi, ma na deema ba sãawa nge resɛm ǹ kun mɛ nge figie ye ya wurusu dɛlla ya ǹ binu mɔ. Yen sɔ̃na kon bu deri swaa sarobun sɔ̃. 14Yudaba ba nɛɛ, mban sɔ̃na sa sɔ̃ mini. I de su mɛnna kpa su da wuu si su gbãranu mɔn mi, sa n gɔɔ mara. Domi Gusunɔ bɛsɛn Yinni u yiwa su gbi. U koo sun nim dɛ̃ɛgim nɔrusia, yèn sɔ̃ sa nùn torari. 15Wee, sa tamaa wãara koo kɔsi, adama ya ǹ koore. Sa tamaa saa gaa wee yè sɔɔ bɛsɛn nɔni swãaru ta koo kpe, adama nandaba bu sun deema. 16Wee sa yibɛrɛban dumin wɔkinu nɔɔmɔ Danun bera gia. Ma yi wuri mɔ̀, yi tem kpuro nɛni mu diirimɔ. Yibɛrɛ be, ba dĩanu guramɔ ba gbea mwaamɔ, ka sere Yerusalɛmu ka yen tɔmbu. 17Adama Yinni Gusunɔ u wisa u nɛɛ, na ǹ daa bɛɛ sɔ̃ɔwa mɛ ro? Wee kon bɛɛ wɛɛ dɛ̃ɛgii kparema yi yi ǹ dobo dobogibun gari nɔɔmɔ. Yi koo bɛɛ dwɛ̃ɛwa. 18Yeremi u nɛɛ, nɛn nuki sankira nɛn tɔmbun wahalan sɔ̃. Na kĩ n tii nukuru yɛmiasia, adama ya ǹ koorɔ. 19Wee, na nɛn tɔmbun weeweenu nɔɔmɔ baaman di. Ba mɔ̀, Yinni Gusunɔ u sariwa Siɔniɔ? Yen sunɔ u ǹ maa wãawa mi? Ma Yinni Gusunɔ u wisa u nɛɛ, mban sɔ̃na ba nɛn mɔru seeya ba bũnu sãamɔ nìn bwãarokunu ba waama tɔn tukobun min di. 20Ma Yeremi u nɛɛ, saa ye sa raa yĩiyɔ su faaba wa, ya doona nge gɛ̃ɛbun saa. Wee, sa ǹ faaba wa. 21Nɛn tɔmbu ba nɔni sɔ̃ɔre. Ben nɔni swãa te, ta man bɔkana. Na nande, na nuki sankire. 22Tibu sariwa Galadiɔ? Dokotoro goo sariwa mi? Nge mban sɔ̃na Isireliban bosu kun kpeemɔ. 23Nɛn wiru tà n daa nim yiba ma nɛn nɔni yi sãa nge bwii, kon daa wuri kowa sɔ̃ɔ sɔɔ ka wɔ̃kuru nɛn tɔn be ba gun sɔ̃.

will be added

X\