Yeremi 7

1Yinni Gusunɔ u Yeremi sɔ̃ɔwa u nɛɛ, 2a doo a yɔ̃ra nɛn sãa yerun kɔnnɔwɔ a nɛɛ, yeniwa nɛ, Yinni Gusunɔ na gerua. Na nɛɛ, be Yudaba, be, be ba ra gesi du saa kɔnnɔ minin di bu ka man sã, bu swaa dakio bu nɔ. 3Nɛ, Gusunɔ Isireliban Yinni, nɛ wi na wɔllu ka tem mɔ, na gerua na nɛɛ, bu ben sanu sanusu ka ben daa kɔsio. Saa yera kon de ba n wãa tem mɛ sɔɔ. 4Bu ku ben naanɛ doke dii teni sɔɔ ba n mɔ̀, nɛ, Yinni Gusunɔn sãa yera mi! 5Bà n ben sanu sanusu ka ben daa kɔsa, ma ba gea kuanammɛ, 6ma ba kun sɔbu ka gɔminibu ka gobekuba dam dɔremɔ, ma ba kun maa tɔnu wi u kun gãanu kuen yɛm yarimɔ, ma ba kun bũnu sãamɔ ni nu koo de bu kam ko, 7saa yera kon de ba n wãa tem mɛ sɔɔ mɛ na ben baababa wɛ̃, ba n mɔ sere ka baadommaɔ. 8Adama wee gari weesugiiya ba naanɛ sãa yi yi ǹ arufaani gaa mɔ. 9Ba ra n gbɛnimɔ, ba ra n tɔmbu goomɔ, ba ra n sakararu mɔ̀, kpa ba n nɔɔ mwɛɛ weesuginu mɔ̀, kpa ba n bũu wi ba mɔ̀ Baali turare dɔ̃ɔ dokeammɛ, kpa ba n maa bũu sãaru mɔ̀ te ba ku ra raa ko. 10Kɔ̃si yiniwa ba ra n mɔ̀, kpa bu sere na bu yɔ̃ra dii tèn mi ba ra man sã ba n mɔ̀, sa yakiara yibɛrɛban nɔman di. 11Ba tamaa dii tèn mi ba ra man sã ta sãawa gbɛnɔbun wãa yeru? Domi mɛsuma na waamɔ. 12Ǹ n mɛn na, bu doo Siloɔ bu yam mi na raa gɔsa bu ka man sã mɛɛri. Kpa bu wa nge mɛ na mu kua nɛn tɔmbu Isireliban daa kɔ̃san sɔ̃. 13Tɛ̃, yèn sɔ̃ ba kookoo sinin bweseru kua, ma na bu gerusi kpeetim sari adama ba ǹ man swaa daki, na bu soka ma ba ǹ man wurari, 14yen sɔ̃na kon nɛn sãa yee tè sɔɔ ba ben naanɛ doke ka tem mɛ na be ka ben baababa wɛ̃ kam koosia nge mɛ na Silo kua. 15Kon bu gira bu tonda nɛn wuswaan di nge mɛ na ben mɛro bisibu Isireliba gira. 16Wunɛ Yeremi, a ku man suuru kana Yudaban sɔ̃. A ku bu kanaru garu kua. Domi na ǹ nun swaa dakimɔ. 17A ǹ waamɔwa ye ba mɔ̀ Yudaban wuu marosɔ ka sere Yerusalɛmun swɛɛ sɔɔ? 18Bibu ba dãa guramɔ bũu yãkunun sɔ̃. Ma ben baababa ba ka ye dɔ̃ɔ sɔ̃rumɔ bũu sãa yenɔ. Tɔn kurɔba pɛ̃ɛ som burimɔ bu ka kiranu ko ni ba koo ka bũu wi ba mɔ̀ Asitaate ka sere maa bũnu ganu sã, kpa bu ka man torari. 19Adama ka gem, n ǹ nɛ ba torarimɔ, beya ba tii sekuru dokemɔ. 20Yen sɔ̃na na nɛɛ, kon de nɛn mɔru yu wɔri nɛn sãa yee te sɔɔ, ka tɔmbu sɔɔ, ka yaa sabenu sɔɔ, ka dãaɔ ka sere maa dĩanu sɔɔ. Nɛn mɔru ye, ya ko n gbisimɔwa, ya ǹ suremɔ. 21Wee ye nɛ, Gusunɔ Isireliban Yinni, nɛ wi na wɔllu ka tem mɔ na gerua na nɛɛ, i ra yãkunu ko nìn sukum i ra di, ka yãku dɔ̃ɔ mwaararuginu, adama n buram bo i ni kpuro mɛnna i bɛɛyam di. 22Domi na ǹ bɛɛn baababa yãkuru garu yiire dɔma te na bu yara saa Egibitin di. 23Ye na bu yiire yera, bu nɛn gari nɔɔwɔ, kpa na n sãa ben Yinni, kpa be, ba n maa sãa nɛn tɔmbu. Bu nɛn wooda kpuro swĩiyɔ ye na bu wɛ̃, kpa ben wãaru tu wɛ̃ra. 24Adama ba ǹ swaa tem kpĩ bu nɛn gari nɔ. Ben tiin gɔ̃ru kĩra ba swĩi, ma ben daa kɔ̃sa ya sosi. 25Saa dɔma tèn di bɛɛn baababa ba yara Egibitin di sere n ka gisɔ girari, na ra n bɛɛ nɛn sɔmɔbu gɔriammɛwa saa baayere. 26Adama i swaa taaya i ǹ man swaa daki. Ma i kɔ̃sa kua n kere ye bɛɛn baababa ba kua. 27Wunɛ Yeremi, à n yeniba kpuro gerua, ba ǹ nun swaa dakimɔ. À n maa bu soka, ba ǹ nun wurarimɔ. 28Ka mɛ, a bu sɔ̃ɔwɔ a nɛɛ, ba sãawa bwese te ta ku ra Gusunɔ ten Yinnin gari nɔ. Tora tee teya ba ra n mɔ̀ baa ù n bu sɛɛyasia. Gem ku ra n maa wãa ben nɔsɔ. 29Yinni Gusunɔ u nɛɛ, Yudaba bu ben seri buro bu kɔ̃ yi yi sɔ̃ɔsimɔ ma ba sãa nɛgibu. Bu yɔɔwo guuru wɔllɔ, kpa bu gɔɔ swĩ. Wee ba nɛn mɔru seeya, ma na bu biru kisi. 30Domi be, Yudaba ba kɔ̃sa kua nɛn nɔni sɔɔ. Ba ka bũnu dua diru mi ba ra man sã, ba tu disi doke. 31Ma ba bũu turanu bana Tofɛtiɔ, Bɛni Hinɔmun wɔwaɔ bu ka ben bibu yãku dɔ̃ɔ mwaararuginu ko mi, yãku nìn bweseru na ǹ mam gɔ̃ru doke n bu sɔ̃ bu ko. 32Yen sɔ̃na tɔ̃nu ganu sisi nì sɔɔ ba ǹ maa wɔwa ye sokumɔ Tofɛti ǹ kun mɛ Bɛni Hinɔmu. Ba koo ye sokuwa tɔn goo yeru. Miya ba koo tɔmbu sike yèn sɔ̃ ayeru maa sari gam. 33Gunɔsu ka yɛɛ yi koo tɔn gonu di. Goo sari wi u koo yi yinari. 34Kon de Yerusalɛmu ka Yudaban wusu su mari sɔ̃ɔ sɔ̃ɔ, ba ǹ maa nuku dobun kuuki mɔ̀ wuu si sɔɔ. Mɛya ba ǹ maa kurɔ kpaarun womusu nɔɔmɔ mi. Domi tem mɛ, mu koo kowa bansu.

will be added

X\