Yeremi 5

1Yinni Gusunɔ u nɛɛ, bɛɛ Yerusalɛmugibu, i bɛɛn swɛɛ kpuro swĩiyɔ. I doo ka mi tɔmba ra mɛnnɛ i kasu ì n ko i goo wa wi u ra ko dee dee ma u ra gem gere. Ì n yɛ̃ro wa, saa ye sɔɔra nɛ, Yinni Gusunɔ, kon bɛɛn durum wɔka. 2Ma Yeremi u nɛɛ, wee, ba ra n bɔ̃rumɔ ba n mɔ̀, ka Yinni Gusunɔn wãaru, adama weesu sɔɔra ba bɔ̃ri yi mɔ̀. 3Yinni, n ǹ wi u gem swĩi, wiya a kasu? Wee, a bu sura adama ba nun atafiiru kua. A bu nɔni sɔ̃ɔwa, adama ka mɛ, ba ǹ gãanu gie. Ben gɔ̃ru ga bɔbiawa nge kperu. Ba yina bu wurama wunɛn mi. 4Ma na nɛɛ, ba sãawa nge bibu, ba mɔ̀wa nge gari bakasu. Domi ba ǹ wunɛn swɛɛ yɛ̃, ba ǹ maa wunɛn woodaba yɛ̃. 5Kon gɔsira n da be ba bukuren mi, kpa n ka bu gari ko. Domi be, ba wunɛn swɛɛ yɛ̃, ba maa wunɛn woodaba yɛ̃. Wee, ben tii ba nun yina nge yãa te ta wɛ̃ɛ yina ma ta yi kasuka. 6Yen sɔ̃na bà n dua dãa sɔ̃ɔwɔ, gbee sinansu su ra bu go. Bà n dua yakasɔ, gbeeku bɔ̃nu nu ra bu go. Ma musuku gbeeku ga ra bu yɔɔru bwɛ̃ɛyɛ ben wuun gbãrarun kɔnnɔwɔ, be ba yara min di, gu ka bu sɛ̃re gu kasuku. Domi ben toranu nu dabia. Ben naanɛ sariru ta kpã. 7Yinni Gusunɔ u nɛɛ, mban sɔ̃na kon nɛn tɔmbun durum wɔka. Domi wee, ba man deri ma ba bɔ̃rumɔ ka bũnun yĩsinu. Na bu debia, adama bũna ba ka arukawani bɔkua ba nu gasirimɔ. 8Ba sãawa nge dum dwɛɛ yi yi deba yi wuri mɔ̀ yi kurɔbu gire. Nge mɛya ba ra n ben berusebun kurɔbu naa gire, ba n kpeeki mɔ̀. 9Mban sɔ̃na na ǹ ko n bwese teni mɔru kɔsie, kpa n tu sɛɛyasia yenin sɔ̃. 10Nɛ, Yinni Gusunɔ, kon bu yibɛrɛba surema, be, be ba sãa nge nɛn resɛm gbaaru. Ba koo ten kara sura kpa bu ten dãa kãasi bɔɔri yi yi ǹ sãa nɛgii. Adama ba ǹ gbaa te kam koosiamɔ kpuro. 11Mɛya kon ko domi Isireliba ka Yudaba ba ǹ ka nɛ turo yɔ̃re. Nɛ, Yinni Gusunɔwa na yeni gerua. 12Yinni Gusunɔ u nɛɛ, Isireliba ba man siki ba nɛɛ, na ǹ dam gam mɔ. Kɔ̃sa kun maa bu deemamɔ. Ba ǹ tabu wasi, ba ǹ maa gɔ̃ɔru wasi. 13Nɛn sɔmɔbun gari yi maa sãawa nge wom dirum. Ben goo ku ra bu gari gee sɔ̃. Ba maa gerumɔ ba mɔ̀, sɔmɔ ben gari yi wɔri ben tii sɔɔ. 14Yen sɔ̃, nɛ, Gusunɔ, wɔllu ka tem Yinni, na nɛɛ, ye ba ka gerua mɛ, wee, nɛn gari yi ko n sãa nge dɔ̃ɔ wunɛ Yeremin nɔɔ sɔɔ, kpa nɛn tɔn be, ba n sãa nge dãa ye dɔ̃ɔ wi, u koo mwa. 15Tɛ̃ bɛɛ nɛn tɔmbu, Isireliba, kon bɛɛ bweseru garu surema tontonden di. Bwese te, ta dam mɔ ta raa maa wãawa saa yellun di. I ǹ maa ten barum nɔɔmɔ. 16Ba sãawa tabu durɔbu be kpuro. Ben sɛ̃ɛnun saabu, gonu ra n yibawa sikaɔ. 17Bwese te, ta koo bɛɛn dĩanu kam koosia, ka bɛɛn bibu, ka bɛɛn yaa sabenu, ka bɛɛn dãa marum, kpa bu bɛɛn wuu si su gbãranu mɔ tabu wɔri, bu kɔsuku, sì sɔɔ bɛɛn yĩiyɔbu wãa. 18Adama yen tɔ̃ɔ te, n ǹ bɛɛ kpuro kon kam koosia. 19Tɛ̃ Yeremi, bà n nɛɛ, mban sɔ̃na nɛ, Gusunɔ ben Yinni na bu yenin bweseru kuammɛ, kaa bu wisiwa a nɛɛ, ba man deri ba ka tɔn tukobun bũnu na ben temɔ ba sãamɔ. Nge mɛya ben tii ba koo da bu tɔn tukobu sã tem tukumɔ. 20Yinni Gusunɔ u nɛɛ, i Yakɔbun bweseru sɔ̃ɔwɔ, be, be ba sãa Yudaba, i nɛɛ, 21bu swaa dakio ye na bu sɔ̃ɔmɔ. Ba sãawa nge wɔ̃kobu, ba ǹ bwisi mɔ. Ba nɔni mɔ, adama ba ǹ yam waamɔ. Ba swasu mɔ, adama ba ǹ gari nɔɔmɔ. 22Ba ǹ koo man nasia? Ba ǹ koo diiri nɛn wuswaaɔ? Nɛna na dera yani sɛɛri yi nim wɔ̃kun nim gunua. Ma na nɛɛ, mu ǹ maa saramɔ mi na mɛn nɔɔ bura yeru yi mi. Miya mu ko n wãa sere ka baadommaɔ. Baa mɛ nim kurenu nu ra se, nu ǹ dam mɔ. Baa mɛ nu ra wɔki, mu ku ra gam de. 23Adama be, nɛn tɔmbu, ba sãawa mɛm nɔɔ sariba. Ba ra ka man mɔru ko kpa bu man deri. 24Ba ku ra tii sɔ̃ bu nɛɛ, bu nɛ, Yinni Gusunɔ nasia, nɛ wi na ra bu gura wɛ̃ wɔ̃ɔ ka wɔ̃ɔ yen saa sɔɔ, kpa n maa saa yi bu ka dĩanu gɛ̃. 25Ba n yɛ̃ ma ben durum ka ben toranun sɔ̃na ba ku ra maa doma ten bweseru wa. 26Domi ben suunu sɔɔ tɔn kɔ̃soba wãa. Ba ra tɔmbu yɛ̃ri bɛriewa bu ka bu mwɛɛri nge be ba ra gunɔsu taa yinuɛ. 27Takiwa ya ra n yiba ben yɛnusɔ, nge mɛ gunɔ taason gunɔ diru ta ra n gunɔsu yiba. Nge mɛya ba kuura ma ba dam kua. 28Ba dĩa geenu di ma ba bɔria. Ba ra kɔ̃sa kowa yu banda. Ba ku ra ka gobeku yinɛ, ǹ kun mɛ sãaro. Ba ku ra bu ben gem wɛ̃. Kpa ben tii ba n kuuramɔ. 29Mban sɔ̃na na ǹ kon bwese teni mɔru kɔsie, kpa n bu sɛɛyasia yenin sɔ̃. 30Wee, nɛn tɔmba gãa kɔ̃sunu mɔ̀ tem mɛ sɔɔ. 31Ben sɔmɔbu ba gari weesugii mɔ̀. Ma yãku kowobu ba ben tiin arufaani kasu. Ma nɛn tɔmbu ba bu yen dam kɛ̃mɔ. Sanam mɛ kpuro ya koo nɔru ko, amɔna ba koo ko.

will be added

X\