Yeremi 48

1Wee ye Gusunɔ Isireliban Yinni wi u wɔllu ka tem mɔ, u gerua Mɔabuban sɔ̃. U nɛɛ, Nɛbo ya kam kua domi wee ba yen yãnu gura. Kiriataimu ya wãa sekuru sɔɔ domi ba ye mwa. Misigabu ya wãa sekuru sɔɔ, domi ba ye kɔsuka. 2Mɔabun bɛɛrɛ ya kpa. Ma ba bwisikumɔ bu Hɛsiboni kam koosia. Ba mɔ̀, su da su ye kam koosia kpa ya kun maa wãa handunia sɔɔ. Wunɛ Madimɛni, kaa ko bansu, domi wee ba nun tabu wɔrimam wee. 3Ba faaba kanamɔ saa Koronaimun di, ba mɔ̀, wee ba bɛsɛn yãnu guramɔ. Wee ba kpuro kɔsukumɔ. 4Ba Mɔabu kam koosia. Ma bibun nɔɔ ga nɔɔramɔ. 5Ba wuri wennɛ guu te ba mɔ̀ Lusitiɔ, ma nuku sankiranun kuuki yi saramamɔ saa Koronaimun guurun di. 6Ba mɔ̀, i duki yakuro, i bɛɛn wãaru wɔra, kpa i da i n wãa nge gbeeku kɛtɛkunu gbaburɔ. 7Domi i bɛɛn naanɛ dokewa bɛɛn nɔman sɔmburu ka bɛɛn arumaniba sɔɔ. Wee, tɛ̃ ba koo bɛɛn tii mwɛɛri kpa bu bɛɛn bũu wi ba mɔ̀ Kemɔsi ka win yãku kowobu ka win wirugibu yoru mwa bu ka doona. 8Be ba koo bu kam koosia mi. Ba koo duwa wuu baagere sɔɔ. Gen gaga kun kisiramɔ ben nɔman di. Ba koo kpuro kam koosiawa wɔwi sɔɔ ka tem tɛɛri sɔɔ. Yinni Gusunɔwa u yeni gerua. 9U maa nɛɛ, i Mɔabuban sika sɔɔru koowo, domi ben gɔɔ turuku kua. Ben wusu su koo ko bansu. Goo kun ko n maa wãa si sɔɔ. 10Be ba Gusunɔn sɔmburu mɔ̀ ka atafiiru, u bu bɔ̃rusio. Be ba yinamɔ bu tɔmbu go ka takobi, Gusunɔ u bu bɔ̃rusio. 11Wee, saa yellun di, Mɔabuba ba wãa bɔri yɛndu sɔɔ. Ba ǹ yoru diire gam. Ba sɔ̃wa kpɛtɛɛ nge tam kɔrɔru. Ba ǹ bu gɔsiare gam sɔɔ nge tam. Ben dobu ka ben wani kun kɔsa. 12Yen sɔ̃na nɛ, Yinni Gusunɔ na nɛɛ, tɔ̃ru gara sisi tè sɔɔ kon bu tɔmbu surema bu bu gɔsie wekenu ganu sɔɔ, kpa bu weke ni kɔsuku. 13Mɔabu be, ba koo sekuru wa ben bũu wi ba mɔ̀ Kemɔsin sɔ̃, nge mɛ Isireliba ba sekuru wa bũu wi u wãa Betɛliɔn sɔ̃, domi wi sɔɔra ba ben naanɛ doke. 14Bɛɛ Mɔabuba, amɔna i ko i ka kpĩ i gere i nɛɛ, i sãawa tabu durɔbu be ba wãa tabun sɔ̃. 15Domi wee, i kam kua. Bɛɛn wusu su dɔ̃ɔ mwaara. Ma yibɛrɛba ba bɛɛn aluwaasi damgibu mwɛɛra ba sakira. Yeniwa sina boko u gerua. Win yĩsira Gusunɔ, wɔllu ka tem Yinni. U nɛɛ, 16Mɔabun kam kobu turuku kua. Nɔni swãa te ba koo wa, ta wee fuuku fuuku. 17Bɛɛ be i wãa ben turuku, i ka bu gɔɔ sinɔ. Bɛɛ be i bu yɛ̃, i bu bikio i nɛɛ, amɔna n koosina ba ka ban tenin dam bakam mɛ kpeerasia mɛ. 18Bɛɛ maa Dibonigibu, i bɛɛn sin yee bɛɛrɛginu derio, kpa i na i sina temɔ. Domi be ba Mɔabuba kam koosia, ba wee bu bɛɛ wɔri, kpa bu bɛɛn gbãra damginu kɔsuku. 19Bɛɛ Aroɛɛgibu, i doo swaaɔ i mɛɛri, kpa i Mɔabu be ba kpikiru sua bikia i nɛɛ, mba n koora. 20Ba koo bɛɛ wisi bu nɛɛ, ba wãawa sekuru sɔɔ ba diirimɔ. I kuuki koowo, i gbãra, kpa i baawure nɔɔsia Aanɔɔwɔ ma ba Mɔabuba gura. 21Yinni Gusunɔwa u bu sɛɛyasiamɔ be ba wãa wɔwa sɔɔ ka yen wuu sini sɔɔ, si ba mɔ̀, Holoni ka Yahasi ka Mɛfati, 22ka Diboni ka Nɛbo ka Bɛti Dibilataimu, 23ka Kiriataimu ka Bɛti Gamulu ka Bɛti Mɛɔni, 24ka Keriɔtu ka Botisira, Mɔabuban wusu kpuro gesi, si su wãa turuku ka tontondeɔ. 25Ba Mɔabuban dam bua, ma ben yiiko ya kpa. Yinni Gusunɔwa u yeni gerua. 26Mɔabuba ba tii sua Gusunɔn wuswaaɔ. Yen sɔ̃, bu bu tam taasio sere bu mu siruku kpa bu bu yɛ̃ɛ. 27Bɛɛ Mɔabuba, i yaayo ma i raa Isireliba yɛ̃ɛ. I raa bu wii gimanu koosi nge be i gbɛna mwa. 28Tɛ̃, i yario bɛɛn wusun di kpa i da i n wãa kpee baaba sɔɔ, kpa i kpee goominu saari, i bɛɛn wãa yenu ko kpee baaba sɔɔ. 29Sa Mɔabuban tii suabun gari nua, ka ben tɔn biaru, ka sere maa ben woo kanabu, ka ben degangam, ka ben nɔni yɔnnu. 30Yinni Gusunɔ u nɛɛ, nɛn tii, na yɛ̃ ma ba ra tii sue ben gari gerubu sɔɔ. Adama ye ba mɔ̀ kpuro, ya ku ra n arufaani gaa mɔ. 31Yen sɔ̃na na Mɔabuba kpuro gɔɔ swĩiyammɛ. Ma na Kiri Herɛsigibu weeweenu kuammɛ. 32Sibiman resɛm gbaaru, na wuri mɔ̀ wunɛn sɔ̃. Nɛn wuri yi, yi Yasɛɛgibugii kere. Yellu, wunɛn dãa kãasi yi nim wɔ̃ku saramɔ. Yi mam Yasɛɛn daarun nim dɛkamɔ. Adama wee, kam koosio u yin marum wɔri u kam koosia. 33Nuku dobun womusu kun maa wãa Mɔabuban gbeaɔ. Goo ku ra maa tam gamɛ mi. Tam sari wekenu sɔɔ. Nuku dobun kuuki kun maa nɔɔramɔ mi, ma n kun mɔ tabugii. 34Hɛsibonigibu ba nɔɔgiru sue ba somiru kanamɔ. Ba ben nɔɔ nɔɔmɔ Elealeɔ, ka Yahasiɔ, ka Soariɔ, ka Koronaimuɔ, ka Egalati Selasiɔ. Domi baa Nimurimun daaru ta kam kua. 35Yinni Gusunɔ u nɛɛ, kon den Mɔabuba kpeerasia, be, be ba yɔɔmɔ ben bũu turanɔ ba nu turare dɔ̃ɔ dokeammɛ. 36Yen sɔ̃na nɛn gɔ̃ru ga sumɔ nge guuru Mɔabuba ka Kiri Herɛsigibun sɔ̃. Domi ben dukia ye ba gura kpuro ya kam kua. 37Tɔmbu kpuro ba ben seri ka ben toba kɔna, ba tii murura nɔma yiru kpuro, ba saaki deewa ben nuku sankiranun sɔ̃. 38Ba gɔɔ wuri mɔ̀ yɛnu baagere sɔɔ ka sere mi ba ra mɛnnɛ kpuro gesi domi na Mɔabuban tem kɔsuka nge weke te goo kun maa kĩ. Nɛ, Yinni Gusunɔwa na yeni gerua. 39I gɔɔ swĩiyɔ, Mɔabuba ba wɔruma. Ba biruku yira wura. Anna a sekuru wa. Be ba ka bu sikerenɛ kpuro, ba bu yɛ̃ɛmɔ. 40Yinni Gusunɔ u nɛɛ, wee, yibɛrɛba ba koo na nge yaberekunu ni nu bɛllimɔ wɔllɔ. 41Kpa bu wuu ge ba mɔ̀ Keriɔtu mwa, bu gen gbãranu kɔsuku. Mɔabun tabu durɔ damgibu ba koo nanda nge tɔn kurɔ wi u yiire u kĩ u ma. 42Ba koo Mɔabuba kpeerasia. Ben bwesera koo nɔru ko, domi ba nɛ, Yinni Gusunɔ seesi. 43Wee, ba bu yina ka taa ka suura bɛrie. 44Wi u duka mɔ̀ bɛrum sɔ̃, u koo wɔriwa suura ye sɔɔ. Wi u maa yara suura yen di, kpa u taa mwaara. Domi kon de Mɔabun sɛɛyasiabun tɔ̃ru tu na. Nɛ, Yinni Gusunɔwa na yeni gerua. 45Be ba kpikiru sua ba ǹ maa dam tie, ba wɛ̃ra yeru kasu Hɛsiboniɔ. Adama dɔ̃ɔ yari yi koo yari yen sina boko Sihonin dirun di, yi da yi Mɔabuban tem nɔɔ bura yenu ka mɛn guunu di. 46Bɛɛ, Mɔabuba, i kam kuawa. Bɛɛ Kemɔsigibu, i kpeerawa. Wee, ba koo bɛɛn bibu yoru mwɛɛri bu ka doona. 47Adama saa gaa sisi yè sɔɔ kon ka Mɔabu be ba yoru mwɛɛra mi wurama ben temɔ. Nɛ, Yinni Gusunɔwa na yeni gerua. Nge mɛya kon ka Mɔabuba sɛɛyasia.

will be added

X\