Yeremi 47

1Egibitin sina boko u sere Gasa tabu wɔri, wee ye Yinni Gusunɔ u Yeremi sɔ̃ɔwa Filisitiban sɔ̃. U nɛɛ, 2wee, yibɛrɛba ba wee saa sɔ̃ɔ yɛ̃san nɔm geu gian di, ba tɛriamɔ tem sɔɔ nge daa te ta nim yibumɔ ta bɔ̃ɔ saramɔ. Ma ba tem ka ye ya wãa mɛ sɔɔ wukiri ka mɛn wusu ka tɔn be ba wãa si kpuro sɔɔ. Tɔn be kpuro ba kuuki mɔ̀, ba weeweenu mɔ̀. 3Dumin naa damu damusu ka tabu kɛkɛban uruuban wɔkinu nɔɔramɔ. Baababa ba ben bibu derimɔ, domi ben gɔma kpuro dwiiya. 4Saa ya tunuma yè sɔɔ ba koo Filisitiba kpuro go, ka tɔn be ba koo kpĩ bu Tirigibu, ka Sidonigibu somi, ka tɔn be ba tie ba wãa tem bure te ba mɔ̀ Kafitoriɔ. 5Gasagibu ba wãawa nuku sankiranu sɔɔ ba wii pɔɔnu pote. Asikalonigibu ka be ba wãa wɔwaɔ ba nɔɔ maari. Bɛɛ be i tie, sere saa yerà i ko i n wãa i n tii muririmɔ i ka gɔɔ swĩ. 6Wee, i gerumɔ i mɔ̀, Yinni Gusunɔn takobi, domma kaa wɛ̃ra. A wuro wunɛn kararɔ, kpa a n wãa mi sɛ̃ɛ. 7Amɔna ya koo ka wɛ̃ra. Domi Yinni Gusunɔn tiiwa u ye wooda wɛ̃, yu ka Asikalonigibu ka nim wɔ̃kun goonugibu wɔri.

will be added

X\