Yeremi 46

1Gari yiniwa Yinni Gusunɔ u Yeremi sɔ̃ɔwa bwese tukunun sɔ̃. 2Babilonin sina boko u Egibitin sunɔ Nɛko ka win tabu kowobu kamia Kaakemisiɔ, Efaratin daarun bɔkuɔ. N deema saa ye sɔɔ, Yoyakimu, Yosiasin bii, Yudaban sina bokon bandun wɔ̃ɔ nnɛse sɔɔra mi. Saa ye sɔɔra Yinni Gusunɔ u gari yini gerua Egibitin sina boko ka win tabu kowobun sɔ̃ u nɛɛ, 3wee Egibitin tabu sinambu ba kuuki mɔ̀ ba mɔ̀, i tɛrɛnu sɔɔru koowo, bakanu ka piiminu, kpa i se i tabu da. 4I bɛɛn tabu kɛkɛ be dumi gawe sɔɔru koowo. Bɛɛ maasɔbu, i bɛɛn dumi yɔɔwo, kpa i bɛɛn tabu furɔsu doke. I bɛɛn yaasi sunkuo yi balli, kpa i bɛɛn tarakpenu sebe. 5Adama mba Yinni Gusunɔ u sere waamɔ ya kooramɔ ben suunu sɔɔ. U nɛɛ, be wee ba mwia kpana ba biruku yira wuramɔ. Ba ben tabu durɔbu kamia. Ma ba duki mɔ̀, ba ǹ mam biru mɛɛrimɔ. Tem mɛ kpuro mu bɛrum duura. 6Kam sɔɔra be ba sãu ba duki mɔ̀. Baa tabu durɔ damgibu bà n duki sua kama. Domi sɔ̃ɔ yɛ̃san nɔm geu gia, Efaratin daarun bɔkuɔ, dabiru ta sokuramɔ ta wɔrukumɔ. 7Wara u ka daa te ba mɔ̀ Nilu weenɛ tà n yiba. Wara u ka tu weenɛ sanam mɛ ten tora bɔ. 8Egibitigiba ba ka tu weenɛ. Domi ba nɛɛ, nge mɛ Nilun nim mu ra tɛrie ka dam tem sɔɔ, nge mɛya ben tabu kowobu ba koo maa tɛria tem sɔɔ, kpa bu wusu ka sin tɔmbu kam koosia. 9Wee ba mɔ̀, ben maasɔbu bu seewo fuuku. Be ba tabu kɛkɛ be dumi gawe dua, bu duki doo. Ben tabu durɔbu bu seewo. Puti ka Kusin tabu durɔbu be ba tɛrɛ piiminu nɛni, ka sere Ludiba be ba sãa tɛn towobu, bu seewo. 10Adama tɔ̃ɔ teni, ta ko n sãawa Gusunɔ, wɔllu ka tem Yinnigiru. Ta ko n sãawa tè sɔɔ u win yibɛrɛba mɔru kɔsiemɔ. Takobi ya koo tɔmbu di, kpa yu yɛm debu. Tɔn dabi te ya koo go, Gusunɔ wɔllu ka tem Yinnin sɔ̃, ta ko n kpĩ nge yãku yaa Efaratin daarun goorɔ, sɔ̃ɔ yɛ̃san nɔm geu gia. 11Bɛɛ Egibitigibun tabu kowobu, baa ì n seewa i da Galadiɔ i tim kasu, kama. Bɛɛn mɛɛra ya ǹ kpeemɔ. 12Bwesenu kpuro nu koo nɔ nge mɛ ba bɛɛ sekuru doke. Domi ba koo bɛɛn dɛsirun kuuki nɔ baama. Bɛɛn tabu durɔbu ba ko n bãarimɔwa. Bà n yinna, ba koo wɔrukuwa sannu. 13Gari yiniwa Yinni Gusunɔ u Yeremi sɔ̃ɔwa sanam mɛ Babilonin sina boko, Nɛbukanɛsaa u na u Egibiti wɔri. U nɛɛ, 14a Egibitigibu nɔɔsio ka be ba wãa yen wuu si ba mɔ̀ Migidoli, ka Mɛnfisi, ka Tapanɛsi sɔɔ, a nɛɛ, ben baawure u seewo u sɔɔru ko. Domi ba bu tabu wɔrima baaman di. 15Ben tabu durɔ damgibu ba wɔruka. Ba ǹ kpĩa ba ka tii yinɛ. Nɛ, Yinni Gusunɔwa na bu fuka. 16Na dera ben tabu kowo dabiru ta sokura ta wɔruka. Ma ba mɔ̀, bu seewo bu wura ben temɔ mi ba bu mara, mi tabu sari. 17Nɛ, Yinni Gusunɔ na nɛɛ, bu Egibitin sunɔ yĩsi kpaaru kɛ̃ɛyɔ bu nɛɛ, woo kanɔ. U dera saa gea nùn doonari. 18Nɛ Gusunɔ, wɔllu ka tem Yinni, nɛ wi na sãa sina boko, sere ka nɛn wãaru, nge mɛ ba yɛ̃ ma guu te ba mɔ̀ Tabori ta guu ni nu tie gunum kere, ka nge mɛ ba yɛ̃ ma guu te ba mɔ̀ Kaamɛli ta wãa nim wɔ̃kun bɔkuɔ, nge mɛya ba n yɛ̃ kam kam ma yibɛrɛba ba koo na bu bu wɔri. 19Bɛɛ Egibitigibu, i sɔɔru koowo i bɛɛn yãnu gura, ba koo bɛɛ yoru mwɛɛri. Domi wee, Mɛnfisi ya koo ko bansu. Goo kun maa sinamɔ ye sɔɔ. 20Bɛɛ Egibitigibu, i sãawa nge naa gbiiba ye ya wã. Adama wee, daru swãa gaa ya wee saa sɔ̃ɔ yɛ̃san nɔm geu gian di, yu ye wɔri. 21Bɛɛn tabu kowo be ba ra bɛɛ somi gobin sɔ̃, ba bɔɔru nge naa gumgia. Ka mɛ, ben tii ba koo biruku yira wura bu duki yakikira. Domi nɔni swãara koo bu wɔri. Ben sɛɛyasiabun saa ya tura. 22Egibitigiba duki mɔ̀ nge wɛɛ yi yi doonɔ wɔkinu sari. Domi yibɛrɛba ba bu wɔrimɔ ba suririmɔ, nge dãa buro wi u dãa suririmɔ ka gbãa, dãa sɔ̃ɔwɔ. 23Baa mɛ ben dãa sɔ̃ɔ ga kpã sere goo kun kpɛ̃ u du mi, ka mɛ, ba koo gu bɔɔriwa. Domi yibɛrɛ be, ba twee dabiru kere. Goo kun kpɛ̃ u ben geeru gia. Nɛ, Yinni Gusunɔwa na yeni gerua. 24Egibitigiba wãa sekuru sɔɔ. Domi wee, ba bu sɔ̃ɔ yɛ̃san nɔm geugibu nɔmu sɔndia. 25Nɛ, Gusunɔ Isireliban Yinni, nɛ wi na wɔllu ka tem mɔ, na maa nɛɛ, kon bũu wi ba mɔ̀ Amɔɔ sɛɛyasia wi u wãa Tebɛsiɔ, ka Egibitin sunɔ, ka Egibitigibu kpuro ka ben bũnu ka ben sinambu, ka sere maa be ba Egibitin sunɔ wi naanɛ sãa. 26Kon bu Nɛbukanɛsaa, Babilonin sina boko ka win sɔm kowobu nɔmu bɛria, be ba kasu bu bu go. Adama yeniban biru, Egibiti ya koo wurama nge yellu. Yeniwa nɛ, Yinni Gusunɔ na gerua. 27Yinni Gusunɔ u nɛɛ, bɛɛ Isireliba, Yakɔbun bweseru, bɛɛ, nɛn sɔm kowobu, i ku bɛrum ko, i ku maa nanda. Domi kon bɛɛ wɔrama saa tontonden di. Kon bɛɛn bweseru yakiama saa yorun di. I ko i wurama i wɛ̃ra, i n wãa bɔri yɛndu sɔɔ. Goo kun maa bɛɛ nɔni sɔ̃ɔmɔ. 28I ku bɛrum ko. Domi na wãa ka bɛɛ. Kon bwese ni kpuro kpeerasia, nìn suunu sɔɔ na raa bɛɛ yarinasia mi. Adama bɛɛ, na ǹ bɛɛ kpeerasiamɔ. Kon bɛɛ sɛɛyasiawa nge mɛ n weenɛ, domi na ǹ kpɛ̃ na kun bɛɛ sɛɛyasie.

will be added

X\