Yeremi 44

1Yinni Gusunɔ u Yuda be ba wãa Migidoliɔ ka Tapanɛsiɔ ka Mɛnfisiɔ ka Paturɔsiɔ Egibitin temɔ sɔ̃ɔwa saa Yeremin min di u nɛɛ, 2wee, ye nɛ Gusunɔ, wɔllu ka tem Yinni na gerua. Na nɛɛ, i kɔ̃sa ye kpuro wa ye na Yerusalɛmu kua ka Yudan wuu si su tie. Wee, su kua bansu. Goo maa sari mi. 3Domi ba kɔ̃sa kua ba nɛn mɔru seeya ye ba ka da ba bũnu yãkunu kuammɛ ni bɛɛ ka bɛɛn baababa i ǹ daa yɛ̃. 4Na bɛɛ nɛn sɔmɔbu gɔria saa yellun di bu ka bɛɛ sɔ̃, i ku sãa kɔ̃su nini ko, ni nɛn tii na tusa. 5Adama i ǹ man swaa daki. I ǹ bɛɛn kom kɔ̃sum deri. I ǹ maa bũu yãku kobu deri. 6Ma na ka bɛɛ mɔru kua gem gem. Na Yudan wusu ka Yerusalɛmun swɛɛ kpeerasia ma ye kpuro ya kua bansu, nge mɛ i waamɔ gisɔ. 7Yen sɔ̃ tɛ̃, amɛniwa nɛ, Gusunɔ Isireliban Yinni, nɛ wi na wɔllu ka tem mɔ, na gerua. Na nɛɛ, mban sɔ̃na i tii durum baka yeni sɔbimɔ ye i ka dera ba kurɔbu ka durɔbu ka bibu ka bii wɛ̃ɛnu go sere goo kun maa tie. 8I kĩwa i nɛn mɔru seeya ka bɛɛn bũu yãku kookoo si i mɔ̀ Egibitiɔ mi i wãa? I kĩwa i tii kam ko, kpa i ko bɔ̃rigibu ka sekurugibu handunia ye sɔɔ? 9I duariwa kɔ̃sa ye bɛɛn baababa ka bɛɛn sinambu ka ben kurɔbu ka bɛɛn tii ka bɛɛn kurɔbu i kua Yudaɔ ka Yerusalɛmuɔ? 10Wee, sere ka tɛ̃ i ǹ tii kawe i gɔ̃ru gɔsie. I ǹ man nasie, i ǹ maa nɛn woodaba swĩi ye na bɛɛ ka bɛɛn baababa wɛ̃. 11Yen sɔ̃na nɛ, Gusunɔ Isireliban Yinni, nɛ wi na wɔllu ka tem mɔ na bɛɛ biru kisi ma na bɛɛ kɔ̃sa kua n ka bɛɛ Yudaba kpuro kam koosia. 12Kon Yuda be ba kpikiru da Egibitiɔ kam koosia. Egibiti miya ba koo gbi kpuro. Ba ǹ goo buremɔ. Ba koo gbiwa tabu sɔɔ, ka gɔ̃ɔru sɔɔ kpa bu bu gɛm bu sekuru wa, kpa ba n da ben yĩsiru sie bu ka goo bɔ̃rusi, ǹ kun mɛ bu nùn gãa kɔ̃sunu gerusi. 13Kon bu sɛɛyasiawa nge mɛ na Yerusalɛmugibu sɛɛyasia ka tabu, ka gɔ̃ɔru, ka maa baranu. 14Kon de ben fiiko bu kpikiru su. Be baasi, goo kun kisiramɔ. Goo kun maa wee Yudan temɔ baa mɛ ba ko n kĩ bu wurama amɛn biru. 15Yera be kpuro be ba yɛ̃ ma ben kurɔbu ba ra bũnu turare dɔ̃ɔ dokeye ka tɔn kurɔ dabinu kpuro be ba wãa mi, ka tɔn dabi te ta tie Paturɔsiɔ, Egibitin tem mi, ba Yeremi sɔ̃ɔwa ba nɛɛ, 16sa ǹ gari yi mɛm nɔɔwammɛ yi a gerua a nɛɛ, yi weewa Yinni Gusunɔn min di. 17Sa ko kowa nge mɛ sa gerua, su bũu wi ba mɔ̀ Asitaate turare dɔ̃ɔ dokea, kpa su maa nùn tam tãra nge mɛ sa ra raa ko, bɛsɛ ka bɛsɛn baababa, ka bɛsɛn sinambu ka bɛsɛn wirugibu Yudan wusu sɔɔ ka Yerusalɛmun swɛɛ sɔɔ. Domi saa ye sɔɔra sa ra wa su di su debu, sa n nuku dobu mɔ kpa sa kun wahala gaa wa. 18Adama saa dɔma tèn di sa ǹ maa bũu wi turare dɔ̃ɔ dokeare, sa ǹ maa nùn tam tãrare, saa min diya sa kpuro bia. Tabu sun di, ma gɔ̃ɔra sun go. 19Ma tɔn kurɔ be, ba gerua ba nɛɛ, sanam mɛ sa bũu wi yãkunu kuammɛ, ka bɛsɛn durɔbun yɛ̃ra. Ba yɛ̃ ma sa ra bũu wi kiraru kue su ka nùn bɛɛrɛ wɛ̃, kpa su nùn tam tãra temɔ. 20Ma Yeremi u tɔn be kpuro wisa, kurɔbu ka durɔbu, u nɛɛ, 21bɛɛ ka bɛɛn baababa ka bɛɛn sinambu ka bɛɛn wirugibu, i ra bũu yãkunu kue Yudan wusu sɔɔ ka Yerusalɛmun swɛɛ sɔɔ. Nge weesa? I tamaa Yinni Gusunɔ kun ye yɛ̃? Nge i tamaa u ye duariwa. 22Aawo, u ǹ ye duari. U ka bɛɛ wasirawa bɛɛn kom kɔ̃sum sɔ̃ ka daa kɔ̃sa ye i kuan sɔ̃. Yen sɔ̃na bɛɛn tem mu kua bansu. Goo maa sari mɛ sɔɔ. Ma mu kua tem bɔ̃ruram nge mɛ sa waamɔ gisɔ. 23Wahala ye, ya bɛɛ deemamɔwa gisɔ yèn sɔ̃ i bũnu yãkuru kua ma i Yinni Gusunɔ torari i ǹ win gere wure, i ǹ maa win sɔ̃ɔsinu ka win woodaba ka win kirɔba swĩi. 24Yeremi u maa tɔn be kpuro, kurɔbu ka durɔbu, sɔ̃ɔwa u nɛɛ, bɛɛ Yudaba, bɛɛ be i wãa Egibitiɔ, i swaa dakio i nɔ ye Yinni Gusunɔ u gerua. 25Wee ye Gusunɔ Isireliban Yinni wi u wɔllu ka tem mɔ u gerua. U nɛɛ, bɛɛ ka bɛɛn kurɔbu, i nɛɛ, i ko i bɛɛn nɔɔ mwɛɛnu yibia ni i bũu tɔn kurɔ wi ba mɔ̀ Asitaate kua. Wiya i ko i turare dɔ̃ɔ dokea, kpa i maa nùn tam tãra temɔ. Wee, i maa ye kua. 26Yen sɔ̃ tɛ̃, i swaa dakio i nɔ ye wi, Yinni Gusunɔ u bɛɛ sɔ̃ɔmɔ. U bɔ̃rumɔ ka win yĩsi bakaru ma Egibitin tem kpuro sɔɔ, Yuda goo kun maa bɔ̃rumɔ ka win yĩsiru u nɛɛ, sere ka Yinni Gusunɔn wãaru. 27U koo dewa kɔ̃sa yu bɛɛ deema, n ǹ mɔ gea. Yuda be ba wãa Egibitiɔ kpuro, ba koo gbiwa tabu sɔɔ ka gɔ̃ɔru sɔɔ. 28Ka mɛ, bɛɛn fiiko ba koo kisira tabun di, kpa bu wurama Yudaɔ. Saa yera, bɛɛ be i da mi kpuro i ko i gia ǹ n nɛn garin na yi koora, ǹ n maa bɛɛgiin na yi koora. 29U koo bɛɛ deema Egibiti mi, kpa u bɛɛ yĩreru wɛ̃ te ta koo bɛɛ sɔ̃ɔsi ma kɔ̃sa ye u raa gerua ya koo nawa ka gem. Yĩre tera, 30u koo Egibitin sunɔ Hofara win yibɛrɛba nɔmu bɛria be ba kasu bu nùn go, nge mɛ u Yudaban sina boko Sedesiasi Nɛbukanɛsaa nɔmu bɛria, wi, wi u kasu u nùn go. Yinni Gusunɔwa u yeni gerua.

will be added

X\