1 Sanam mɛ Yeremi u gari yi tɔn be ba wãa mi kpuro sɔ̃ɔwa, yi Gusunɔ ben Yinni u nɛɛ, u bu sɔ̃, 2 yera Asaria, Hoseen bii, ka Yokanani, Karean bii, be kpuro ba Yeremi wisa ka tɔn piiburu ba nɛɛ, ye a gerua mi, weesa. Gusunɔ bɛsɛn Yinni kun nun sɔ̃ɔwa a sun sɔ̃, su ku Egibiti da. 3 Adama Baruku, Nɛriyan biiwa u nun bɔriemɔ a ka sun sɔ̃ su ku da mi, domi u kĩwa Babilonigibu bu sun mwɛɛri bu go, ǹ kun mɛ bu sun yoru mwa bu ka da ben temɔ. 4 Nge mɛya Yokanani, Karean bii, ka tabu sinambu kpuro ka ben tɔmbu kpuro ba yina bu Yinni Gusunɔn gari nɔ ye u nɛɛ, bu de bu sina ben tem mi. 5 Yera Yokanani ka tabu sinam be, ba ka Yuda be ba tie da Egibitiɔ, be, be ba raa kpikiru da tem tukumɔ ba wurama, 6 tɔn durɔbu ka tɔn kurɔbu ka bibu ka sina bokon bii wɔndiaba, be kpuro gesi be Nɛbusarada, kɔ̃sobun wirugii, u Gedalia, Akikamun bii, Safanin debubu deria. Ma ba ka Yeremin tii da ka maa Baruku Nɛriyan bii. 7 Ba da ba wãa Egibitin wuu ge ba mɔ̀ Tapanɛsiɔ. Nge mɛya ba ǹ ka Gusunɔn gere mɛm nɔɔwɛ. 8 Sɔ̃ɔ teeru Yinni Gusunɔ u Yeremi sɔ̃ɔwa Tapanɛsiɔ u nɛɛ, 9 a kpee bakanu suo kpa a da a nu sike Yudaba kpuron wuswaaɔ mi ba ra birikiba wɔ̃ ye ya wãa Egibitin sina kpaarun kɔnnɔwɔ Tapanɛsiɔ. 10 Kpa a Yudaba sɔ̃ a nɛɛ, amɛniwa nɛ, Gusunɔ Isireliban Yinni, nɛ wi na wɔllu ka tem mɔ, na gerua. Na nɛɛ, wee, kon de bu Nɛbukanɛsaa, nɛn sɔm kowo kasum da kpa n win bandu swĩi kpee ni a sikuan wɔllɔ kpa u win sina gɔna tɛria mi, 11 kpa u Egibitigibu sɛɛyasia. Be u koo go, u go, be u koo mwɛɛri u ko yobu kpa u mwɛɛri, be u koo maa sakiri ka takobi, kpa u sakiri. 12 Kpa u ben bũu dia dɔ̃ɔ mɛni, kpa u bũu nin tii gura kpa u maa ben yãnu gura ya kun nùn sɛ̃sie kpa u yari min di ka bɔri yɛndu, nge mɛ naa kparo u ra win kpara yaberu sebe u n doonɔ. 13 U koo Bɛti Semɛsin bwãarokunu kɔsuku, kpa u bũu dia ye ya tie dɔ̃ɔ mɛni Egibiti mi.
