Yeremi 4

1Yinni Gusunɔ u nɛɛ, bɛɛ Isireliba, ì n kĩ i wurama nɛn mi, i ko kpĩ i wurama. Ì n bɛɛn bũu sãaru deri, i ǹ maa yaayaare mɔ̀, 2ì n da bɔ̃re gem sɔɔ ka gɔ̃ru dɛɛrɔ, i nɛɛ, ka Yinni Gusunɔn wãaru, saa yera bwese tukunu nu koo domaru wa nɛn min di, kpa bu woo kana nɛn sɔ̃. 3Nɛ, Yinni Gusunɔwa na bɛɛ Yudaba ka Yerusalɛmugibu sɔ̃ɔmɔ na mɔ̀, i gbee kpaanu kasirio, i dãa dɔ̃ɔ go. I ku ra maa bɛɛn dĩanu duure sãki sɔɔ. 4Geema, i bango sãa wasi sɔɔ. Adama n tiewa i man tii wɛ̃, kpa nɛn mɔru yu ku raa yabura nge dɔ̃ɔ, wi goo kun kpɛ̃ u go, domi bɛɛn nuku kɔ̃suru ta kpã. 5Yeremi u nɛɛ, i Yudaba sɔ̃ɔwɔ kpa i gbãra Yerusalɛmuɔ. I kɔba soowo tem mɛ kpuro sɔɔ. I nɔɔgiru suo ka dam i nɛɛ, bu mɛnnama bu da wuu si su gbãranu mɔ sɔɔ. 6Bu gidi bɔra sueyo Siɔni gia bu duki yakuro bu ku yɔ̃ra. Domi Gusunɔ u koo de kɔ̃sa yu na saa sɔ̃ɔ yɛ̃san nɔm geu gian di. 7Yibɛrɛ be ba ra bwesenu kam koosie ba seewa ben wãa yerun di nge gbee sunɔ ge ga tii dɛmiamɔ gen bweun di, ba wee bu ka tem mɛ kam koosia. Bɛɛ Yudaba, ba koo bɛɛn wusu kɔsuku kpa su ko bansu. 8I saaki sebuo nuku sankiranun sɔ̃ kpa i swĩ i weeweenu ko, domi Yinni Gusunɔn mɔru kun sun doonarimɔ. 9Ma Yinni Gusunɔ u nɛɛ, yen tɔ̃ɔ te sɔɔ, sina boko ka win sina asakpɔbu ba koo mwia kpana kpa yãku kowobu bu biti soora, kpa Gusunɔn sɔmɔbu bu nɔsu nɛnɛ, 10bu nɛɛ, nɛ, Yinni Gusunɔ na be, Yudaba ka Yerusalɛmugibu nɔni wɔ̃kua ye na nɛɛ, ba koo bɔri yɛndu wa. Wee tɛ̃ ba woburu sɔndi ben wĩinɔ. 11Saa ye sɔɔ, kon bu sɔ̃ n nɛɛ, wee, woo ga wee saa gbaburun guunun di, gu ka nɛn tɔmbu Yudaba swee. Woo ge, ga ǹ sãa fɛrɛ fɛrɛ nge ge ba koo ka dobi sara. 12Ga ko n dam mɔwa. Nɛ, Yinni Gusunɔwa na gu sokusiamɔ. Tɛ̃wa kon bu siri. 13Ma Yudaba ba nɛɛ, gbera sun di, domi sa kam kua. Wee, wi u koo sun kam koosia u sĩimɔ nge guru wiru. Win tabu kɛkɛ yi sãa nge guru woo. Ma win dumi yi gunɔ bakeru sãabu kere. 14Yinni Gusunɔ u nɛɛ, bɛɛ Yerusalɛmugibu, sere saa yerà i kĩ i n kɔ̃sa bwisikumɔ. I bɛɛn gɔ̃rusu dɛɛrasio, kpa i faaba wa. 15I swaa dakio gari yi ba ka na Danun tem di ka Efaraimun guunun di ba nɛɛ, kɔ̃sa wee. 16I ye bwesenu kpuro nɔɔsio. Kpa i ye Yerusalɛmugibu sɔ̃ i nɛɛ, yibɛrɛba ba wee saa tontonden di. Ba koo Yudaban wusu tabun kuuki koosi. 17Kpa bu Yerusalɛmu sikerena nge be ba gberu kɔ̃su. Domi yen tɔmbu ba man seesi. Nɛ, Yinni Gusunɔwa na yeni gerua. 18Bɛɛ Yudaba, geema wahala ya bɛɛ nɔni sɔ̃ɔwa sere bɛɛn woo sɔndɔ. Adama ya sãawa bɛɛn kom kɔ̃sum ka bɛɛn nuku kɔ̃surun are. 19Yeremi u nɛɛ, nɛn nuki man wuririmɔ ma nɛn torora kara. Na ǹ kpɛ̃ n nɔɔ mari wahala yenin sɔ̃. Na tabun kɔba nɔɔmɔ. Bu wee. 20Ba sun nɔɔsiamɔ ma ba wuu dabinu kɔsuka. Tem mɛ kpuro mu kam kobu dɔɔwa. Subaru sɔɔra ba na ba bɛsɛn tabu kowobun kuu bekuruginu wukura. Ma ba nu gura ba ka doona. 21Sere domma na kon yibɛrɛban gidi bɔra waamɔ, kpa na n kɔban swĩi nɔɔmɔ tãa tãa. 22Ma Yinni Gusunɔ u nɛɛ, wee, nɛn tɔmbu ba ǹ bwisi mɔ. Mɛya ba ǹ man yɛ̃. Ba sãawa gari bakasu. Ba kɔ̃san kobun bwisi mɔ, adama ba ǹ gean kobu yɛ̃. 23Na tem mɛɛra ma mu sãa bitam, gãanu sari mɛn wɔllɔ. Na maa wɔllu mɛɛra, na deema yam bururam sari mi. 24Na guunu mɛɛra, na wa wee, nu wɔruma. Ma gungunu nu bãarimɔ. 25Na maa mɛɛra na wa wee, tɔnu sari tem sɔɔ. Ma gunɔsu su yarina kpuro. 26Na tem mɛɛra mɛ mu raa sãa tem gem. Na deema wee, mu kua tem saaram. Ma wuu si su wãa mi, su wɔruka. Yinni Gusunɔwa u ye kua win mɔrun saabu. 27Yinni Gusunɔ u nɛɛ, u koo tem mɛ gɔsia tem saaram, adama u maa nɛɛ, u ǹ derimɔ mu n sãa mɛ ka baadommaɔ. 28Yen sɔ̃, tem mu ko n gɔɔ wooru sɔ̃, kpa wɔllu tu yam tĩra. Domi u himba yi kɔ, u ǹ maa biru wurɔ. 29Ye wusu kpuron tɔmbu ba maasɔbu ka tɛn towobun wɔkinu nua, yera ba duki yakikira kpuro. Gaba wɔriki dãa sɔ̃sɔ ma gaba dua kpee baaba sɔɔ. Ba wuu si deri su kua bansu. 30Wunɛ Yerusalɛmu, buraru mba kaa maa tii kua. Kaa tii beku wunɔmgiru kasuawa a dewe, kpa a wuran saba sebe, kpa a kiro doke? Kam sɔɔra kaa tii buraru kua. Wee wunɛn kĩnasibu ba nun tusa ba kasu bu nun go. 31Na wuri ka weeweenu nɔɔmɔ nge tɔn kurɔ wi u yiire u kĩ u win bii gbiikoo ma. Ase Yerusalɛmun nɔɔwa ga nɔɔramɔ mi. Ya wom gabamɔ, ya nɔma dɛmiɛ ya mɔ̀, ya kam kuawa. Wee yen yibɛrɛba ba ye sɛ̃re, ya gɔɔ dɔɔ.

will be added

X\