Yeremi 37

1Babilonin sina boko Nɛbukanɛsaa u Sedesiasi Yosiasin bii kua sina boko Yudaɔ, Yekonia Yoyakimun biin ayerɔ. 2Sedesiasi wi, ka win bwãabu, ka win tɔmbu ba ǹ Yinni Gusunɔn gari yi swaa daki yi Gusunɔn sɔmɔ Yeremi u bu sɔ̃ɔwa mi. 3- 4N deema saa ye sɔɔ, ba ǹ gina Yeremi pirisɔm doke. U ra dewa mi u kĩ, win tɔmbun suunu sɔɔ. Yera sina boko Sedesiasi u Yukali Selemian bii ka Sofoni Maaseyan bii wi u sãa yãku kowo gɔra win mi, bu ka nùn sɔ̃ u bu Gusunɔ ben Yinni kana u ka bu nɔnu geu mɛɛri. 5Saa yera Babilonigibu ba Yerusalɛmu tarusi. Ye ba nua ma Egibiti sunɔn tabu kowobu ba Yerusalɛmugii be somiru sisi, yera ba yarina ba doona min di. 6- 7Saa yera Gusunɔ Isireliban Yinni u Yeremi sɔ̃ɔwa u nɛɛ, a Yudaban sina boko wi u nun gɔrima nɛn mi sɔ̃ɔwɔ a nɛɛ, wee, Egibiti sunɔn tabu kowo be ba raa wee bu ka nùn somi ba gɔsirɔ ben temɔ. 8Tɛ̃, Babilonigii be, ba koo maa wurama bu Yerusalɛmu wɔri bu ye mwa, bu dɔ̃ɔ sɔku. 9Yen sɔ̃, amɛniwa nɛ, Yinni Gusunɔ na gerua. Na nɛɛ, bu ku tii nɔni wɔ̃ke bu nɛɛ, Babilonigii be, ba tonda. Adama ba n yɛ̃ ma ba ǹ gam de. 10Baa bà n Babilonin tabu kowo be kamia, kpa n tie be ba mɛɛra kua, ka mɛ, ba koo se saa ben kuu bekuruginun di bu wuu ge dɔ̃ɔ mɛni. 11Sanam mɛ Babilonigibun tabu kowo be, ba yarina ba Yerusalɛmu deri Egibiti sunɔn tabu kowo ben sɔ̃, 12yera Yeremi u kĩ u yari Yerusalɛmun di u da Bɛnyamɛɛn temɔ u ka win baa sua tubi ye ba bɔnu mɔ̀ sɔɔ. 13Sanam mɛ u yariɔ u kɔnnɔ tura ge ba mɔ̀ Bɛnyamɛɛ, ma u deema ben kɔ̃sobun tɔnwero wi ba mɔ̀ Yirɛya Selemian bii, Hananian debubu u yɔ̃ mi. Ma u nùn yɔ̃rasia u nɛɛ, a tii Babilonigibu wɛ̃. 14Yera u nɛɛ, aawo, na ǹ nɛn tii Babilonigibu wɛ̃. Adama durɔ wi, u ǹ win gari yi wure. Ma u nùn mwa u ka da wirugibun mi. 15Yera wirugii ben mɔru ya seewa ba nùn mwa ba so ba pirisɔm doke Yonatam dirɔ wi u sãa tire yoro. N deema ba win dii te gɔsiawa pirisɔm diru. 16Nge mɛya ba ka nùn pirisɔm doke dirɔ wɔru sɔɔ sere n ka tɛ. 17Sɔ̃ɔ teeru, sina boko Sedesiasi u gɔra u nɛɛ, bu Yeremi sokuma. Ye u na, ma u nùn gari bikia asiri sɔɔ u nɛɛ, Yeremi, a gari gɛɛ mɔ yi yi wee Yinni Gusunɔn min di a man sɔ̃? Ma u nùn wisa u nɛɛ, oo. Yinni Gusunɔ u koo de Babilonin sina boko u nun nɔma turi. 18Ma Yeremi u maa nùn bikia u nɛɛ, tora terà na bɛɛ tora wunɛ ka wunɛn bwãabu ka sere wunɛn tɔmbu kpuro i ka man mwa i pirisɔm kpɛ̃ɛ. 19Mana bɛɛn sɔmɔ be, ba wãa be ba bɛɛ gari sɔ̃ɔwa ba nɛɛ, Babilonin sina boko kun nun wɔrim wee u sere tem mɛ mwa. 20Tɛ̃, nɛn yinni sina boko, a man swaa dakio kpa a nɛn kanaru nɔ, kpa a man kua ye na kĩ. A ku maa de n wura Yonatam tire yoron diru mi, kpa n ku ra ka gbi. 21Yera sina boko Sedesiasi u wooda wɛ̃ u nɛɛ, bu nùn yiiyo pirisɔm dirun yaaraɔ kpa ba n da nùn pɛ̃ɛ kuse teeru wɛ̃ baadomma ye wuun pɛ̃ɛ kowoba ra ko sere wuu nukurun pɛ̃ɛ yu ka kpe. Nge mɛya u ka sina pirisɔm dirun yaara mi.

will be added

X\