Yeremi 35

1Yoyakimu, Yosiasin bii, Yudaban sina bokon waati sɔɔ, Yinni Gusunɔ u Yeremi sɔ̃ɔwa u nɛɛ, 2a doo a Rekabun bweseru deema kpa a ka tu na nɛn sãa yerɔ dia ye ya wãa ten yɛ̃si yɛ̃sibun teerɔ kpa a bu tam wɛ̃ mi, bu nɔ. 3Ma Yeremi u da u Yaasania Yeremin bii, Habasinian debubu soka ka win dusibu ka win bibu kpuro, Rekabun bweseru kpuro gesi. 4Ma u ka bu da Yinni Gusunɔn sãa yerun dii teeru mi, tèn mi Hananu, Yigidalian bii, Gusunɔn sɔm kowo u wãa. Dii te, ta wãawa sina asakpɔbun dirun bɔkuɔ, gbãra kɔ̃so, Maaseya, Salumun biin dirun wɔllɔ. 5Ma Yeremi u bu tam bwãanu wɛ̃ ka nɔri u nɛɛ, bu nɔruo. 6Adama ba nùn wisa ba nɛɛ, sa ǹ tam nɔrumɔ. Domi bɛsɛn sikado Yonadabu, Rekabun bii, u sun wooda wɛ̃ u nɛɛ, su ku ra tam nɔ sere ka bɛsɛn bibun bibɔ, 7su ku ra dia bani, su ku ra gbenu ko, su ku ra maa resɛm gbaanu ko, sa ǹ kpɛ̃ sa n mam ye mɔ. Adama sa ko n wãawa kuu bekunuginu sɔɔ bɛsɛn wãaru kpuro sɔɔ. Nge mɛya sa ko ka tɛ tem mɛ sɔɔ, mi sa wãa sa sɔru dimɔ mini. 8Yen sɔ̃, bɛsɛ ka bɛsɛn bibu sa Yonadabu, Rekabun biin gere ye mɛm nɔɔwammɛ. Sa ǹ tam nɔrumɔ bɛsɛn wãarun tɔ̃nu kpuro sɔɔ, bɛsɛ ka bɛsɛn kurɔbu ka bɛsɛn bibu. 9Sa ǹ maa dia banimɔ yè sɔɔ sa ko n wãa. Mɛya sa ǹ gbea mɔ̀, sa ǹ maa resɛm gbaanu mɔ̀. 10Sa wãa kuu bekuruginu sɔɔ. Mɛsuma sa ka bɛsɛn sikado Yonadabun gere ye mɛm nɔɔwammɛ. 11Adama sanam mɛ Nɛbukanɛsaa, Babilonin sina boko u tem mɛ wɔrima, yera sa nɛɛ, su se su da Yerusalɛmuɔ, kpa su Babilonin tabu kowobu ka Sirigibu duka suuri. Yen sɔ̃na sa wãa Yerusalɛmu mini gisɔ. 12Yera Yinni Gusunɔ u Yeremi sɔ̃ɔwa u nɛɛ, 13nɛ Gusunɔ, wɔllu ka tem Yinni, nɛ wi na maa sãa Isireliban Yinni, na nɛɛ, a doo a Yudaba ka Yerusalɛmugibu sɔ̃ a nɛɛ, ba ǹ nɛn kirɔba swaa dakimɔ kpa bu man mɛm nɔɔwa? 14Wee Rekabun bweseru ta Yonadabu, Rekabun biin gere mɛm nɔɔwa ye u nɛɛ, win bibu bu ku raa tam nɔ. Mɛya ba ǹ maa tam mɛ nɔra sere ka gisɔn gisɔ. Ba ben sikado mɛm nɔɔwa. Adama nɛ, na ka be, Yudaba gari kua saa yee yellun di, ma ba ǹ man swaa daki. 15Na bu nɛn sɔmɔbu gɔriama saa yellun di, bu ka ben baawure sɔ̃ u win daa kɔ̃sa deri. Bu ku maa bũnu sã kpa bu wa ba n wãa tem mɛ sɔɔ, mɛ na ben baababa wɛ̃. Adama ba ǹ sɔmɔ be swaa daki, bu sere man mɛm nɔɔwa. 16Yonadabu, Rekabun biin bweseru ta ten sikadon gere mɛm nɔɔwa. Adama be, nɛn tɔmbu, ba ku ra man mɛm nɔɔwɛ. 17Yen sɔ̃na nɛ Gusunɔ, wɔllu ka tem Yinni, nɛ wi na maa sãa Isireliban Yinni, na nɛɛ, wee kon de kɔ̃sa kpuro ye na raa gerua mi yu Yudaba ka Yerusalɛmugibu deema. Domi na ka bu gari kua, ba ǹ man swaa daki. Na bu soka, ba ǹ man wurari. 18Yera Yeremi u Rekabun bwese te sɔ̃ɔwa u nɛɛ, amɛniwa Gusunɔ, wɔllu ka tem Yinni wi u maa sãa Isireliban Yinni u gerua. U nɛɛ, wee i bɛɛn sikado Yonadabun gere ka win yiirebu kpuro mɛm nɔɔwa. 19Yen sɔ̃, Yonadabu, Rekabun bii wi, u ǹ kɔsireba biamɔ win bweseru sɔɔ be ba ko n nɛn sɔmburu mɔ̀.

will be added

X\