Yeremi 33

1Yinni Gusunɔ u kpam ka Yeremi gari kua sanam mɛ u wãa pirisɔm sɔɔ. 2U nɛɛ, nɛ wi na ra n wãa, nɛ wi na tem taka kua ma na mu nɛni, nɛna na nɛɛ, 3a man sokuo, kon nun wurari. Kon nun gãa baka asiriginu sɔ̃ɔsi ni a ǹ yɛ̃. 4Nɛ Gusunɔ, Isireliban Yinni, na gãanu mɔ ni na kĩ a nɔ, Yerusalɛmun dia ka sere Yudaban sina kpaanun sɔ̃, ni Babilonigiba wɔri ba surura. 5Ma be ba ka Babilonigii be tabu kua, ben gonu yiba wuu ge sɔɔ, nɛn mɔru bakan sɔ̃, domi Yerusalɛmugibu ba kɔ̃sa kua sere na ǹ maa kĩ n wuu ge wa. 6Wee, saa gaa sisi yè sɔɔ kon gu nɔɔri nge barɔ. Kon gu bɛkia n bwãa dorasia, kpa n de gen tɔmbu ba n wãa bɔri yɛndu sɔɔ. 7Kon de be ba yoru mwɛɛra Yudan di, ben wãaru tu kɔsi, kpa n bu swĩi nge yellu. 8Kon bu ben durum kpuro wɔka ye ba man koosi. Kon ben tora ni ba man torari sanam mɛ ba man seesi suuru kua. 9Saa ye sɔɔ, na kon nuku dobu mɔ Yerusalɛmun sɔ̃, kpa ya n nɛn yĩsiru bɛɛrɛ wɛ̃ɛmɔ, kpa bwese tukunu nu n man siaramɔ. Bwese ni, nù n wa durom bakam mɛ kon ye kua ka doo nɔɔ te kon ye wɛ̃, nu koo biti ko sere nu diiri. 10Yinni Gusunɔ u nɛɛ, bɛɛ Yudaba, i nɛɛ, bɛɛn tem mu kua bansu. Tɔmbu ka yɛɛ maa sari mi. Ma Yerusalɛmu ka Yudaban wusun swɛɛ yi kua swɛɛ gonu yi goo ku ra maa sĩ. 11Adama ba koo wure bu nuku dobun kuuki nɔ ka tɔ̃ɔ bakarugii. Ba koo kurɔ kpaanun womusu nɔ. Ba koo maa wure bu womu geni nɔ, ge ga nɛɛ, i Gusunɔ, wɔllu ka tem Yinni siaro. Domi u sãa tɔn geo. Win kĩru ta ǹ nɔru mɔ. Mɛya ba koo maa tɔn be ba ka yãkunu na sãa yerɔn womusu nɔ. Domi kon de tɔn be ba raa yoru mwɛɛra mi, bu wurama tem mɛ sɔɔ, kpa n bu wesia nge yellu. Nɛ, Yinni Gusunɔwa na yeni gerua. 12Yinni Gusunɔ u maa Yeremi sɔ̃ɔwa u nɛɛ, tem mɛ, mu raa kua bansu mi goo sari, yaa sabenu sari mɛn wusu kpuro sɔɔ. Adama tɛ̃, yãa kparobu ba koo wãa yeru wa mi, kpa ben yaa sabenu nu wɛ̃ra. 13Yãa kparobu ba koo maa yãanu kpara baama kpuro wuu si su wãa guunun bera gia ka si su wãa wɔwi sɔɔ, ka si su wãa sɔ̃ɔ yɛ̃san nɔm dwaru gia, ka Bɛnyamɛɛn temɔ ka Yerusalɛmun baru kpaanɔ ka Yudaban wusɔ. Nɛ, Yinni Gusunɔwa na yeni gerua. 14Yinni Gusunɔ u nɛɛ, tɔ̃ra sisi tè sɔɔ kon nɛn nɔɔ mwɛɛ gee ni yibia ni na Isireliba ka Yudaba kua. 15Saa ye, yà n tunuma, kon goo seeya nge dãa kpii pɔtura Dafidin bweseru sɔɔ u n sãa gemgii, kpa u tɔmbu kpara gem sɔɔ. 16Yen tɔ̃ɔ te, Yuuba ba koo faaba wa kpa Yerusalɛmu ya n wãa bɔri yɛndu sɔɔ, kpa bu ye yĩsiru kɛ̃, Yinni Gusunɔn miya bɛsɛn gem wãa. 17Yinni Gusunɔ u maa nɛɛ, Dafidi sina boko u ǹ goo biamɔ wi u koo sina win bweserun sina gɔnaɔ Isireliɔ sere ka baadommaɔ. 18Mɛya maa Lefiba be ba sãa yãku kowobu, ba ǹ kɔsire biamɔ ben bweseru sɔɔ bu ka man yãku dɔ̃ɔ mwaararuginu kua, kpa bu man turare dɔ̃ɔ dokea kpa ba n da yãkunu ko tɔ̃ɔ baatere. 19Yinni Gusunɔ u maa Yeremi sɔ̃ɔwa u nɛɛ, 20nɛna na ka sɔ̃ɔ sɔɔ ka wɔ̃kuru arukawani bɔkua. Ì n ko i kpĩ i yen gaa yɔ̃rasia yu ku maa sɔmburu ko yen saa sɔɔ, kpa yu nɛn arukawani ye kusia, 21saa yera nɛn tii, kon maa nɛn arukawani kusia ye na ka Dafidi nɛn sɔm kowo bɔkua, kpa u kɔsire bia win bweseru sɔɔ wi u koo bandu di. Kon maa nɛn arukawani kusia ye na ka yãku kowobu Lefin bweseru bɔkua be ba ra sɔmburu ko nɛn sãa yerɔ. 22Adama n ǹ koorɔ mɛ. Kon Dafidin bweseru ka yãku kowobun bweseru dabiasiawa nge kperi, ǹ kun mɛ nge yani sɛɛri yi yi wãa daarun goorɔ yi ba ǹ kpɛ̃ bu gari. 23Yinni Gusunɔ u maa Yeremi sɔ̃ɔwa u nɛɛ, 24a ǹ nɔɔmɔ ye tɔmba gerumɔ? Ba mɔ̀, na Isireliban bweseru ka Yudaban bweseru ni na gɔsa biru kisi. Yen sɔ̃na ba bu gɛma, ba ǹ bu garisi bweseru. 25Adama wee ye na gerumɔ, nɛ wi na ka sɔ̃ɔ sɔɔ ka wɔ̃kuru arukawani bɔkua, ma na wɔllu ka tem wooda yiiya, 26nɛna kon Isireliban bweseru ka Dafidi nɛn sɔm kowon bweseru biru kisi? Kpa na kun win bweseru sɔɔ goo gɔsa u bandu di Aburahamu ka Isaki ka Yakɔbun bweserun suunu sɔɔ? Aawo. Kon ben wɔnwɔndu ko be ba yoru mwɛɛra mi, kpa n de bu wurama.

will be added

X\