Yeremi 30

1Gusunɔ, Isireliban Yinni, u Yeremi sɔ̃ɔwa u nɛɛ, 2a gari yi kpuro yoruo tireru sɔɔ yi na nun sɔ̃ɔwa. 3Na nɛɛ, tɔ̃ru gara sisi tè sɔɔ kon nɛn tɔmbu Isireliba ka Yudaba yakiama yorun di, n ka bu wurama ben temɔ. Kon de bu wurama tem mɛ na ben baababa wɛ̃ sɔɔ, kpa mu ko begim. 4Wee ye Yinni Gusunɔ u Yeremi sɔ̃ɔwa Isireliba ka Yudaban sɔ̃. 5U nɛɛ, na nandabun kuuki nɔɔmɔ. Tɔmba bɛrum soore, ba ǹ bɔri yɛndu mɔ. 6I bikio kpa i nɔ tɔn durɔ ù n da yiire u ma. Ǹ n mɛn na, mban sɔ̃na na tɔmbu wa ba ben gãanu nɛni nge tɔn kurɔ wi u yiire u kĩ u ma. Mban sɔ̃na be kpuron wuswaa burisinɛ. 7Anna a wahala baka wa ya wee. Tɔ̃ɔ te, tɔ̃ɔ kɔ̃sura. Ta ǹ ka tɔ̃ru garu weenɛ. Te sɔɔra Isireliba ba koo nɔni swãa bakaru wa. Adama ka mɛ, kon bu faaba ko. 8Yen tɔ̃ɔ te, nɛ, Yinni Gusunɔ, nɛ wi na wɔllu ka tem taka kua, kon ben sugu wuna saa ben wĩinun di n bɔɔku kpa n wɛ̃ɛ yi ba raa ka bu sɔri kasuku, n ben yoru kpeesia. Ba ǹ maa tɔn tukobu sãamɔ. 9Nɛ, Gusunɔ ben Yinniwa ba koo sã, ka sere maa Dafidin kɔsire wi kon swĩi ben sina gɔnaɔ. 10Bɛɛ Isireliba, Yakɔbun bweseru, bɛɛ be i sãa nɛn sɔm kowobu, i ku nanda, i ku diiri. Wee, kon bɛɛ yakiama saa tem tukum di mi i yoru dii, bɛɛ ka bɛɛn bibun bweseru. I ko i wurama kpa i wɛ̃ra i n wãa bɔri yɛndu sɔɔ. Goo kun maa bɛɛ tɔ̃ya mɔ̀. 11Domi ko na n ka bɛɛ wãa kpa n bɛɛ faaba ko. Kon bwesenu kpuro kpeerasia nìn mi i raa yarinɛ i wãa. Adama bɛɛ, na ǹ bɛɛ kpeerasiamɔ. Kon bɛɛ sɛɛyasiawa nge mɛ n weenɛ. Domi na ǹ kpɛ̃ n bɛɛ deri n nɛɛ, i ǹ gãanu kue. 12Wee ye nɛ, Yinni Gusunɔ na maa bɛɛ Yerusalɛmugibu sɔ̃ɔmɔ. Na nɛɛ, bɛɛn barara kpã, bɛɛn mɛɛra ya ǹ bɛkuramɔ. 13Goo kun bɛɛn wɔnwɔndu mɔ̀ u bɛɛn mɛɛra ye tim doke. Tim gam sari mɛ mu koo bɛɛn mɛɛra ye bɛkia. 14Be ba raa ka bɛɛ arukawani bɔkua, ba ǹ maa bɛɛ kasu, domi na bɛɛ sowa nge mɛ ba ra yibɛrɛ so. Na bɛɛ sɛɛyasia ka dam bɛɛn durum dabinun sɔ̃. 15Mban sɔ̃na i mɛɛran weeweenu mɔ̀ ye i wa bɛɛn toranun sɔ̃. I n yɛ̃ ma bɛɛn durum bakan sɔ̃na na bɛɛ yeni kua. 16Adama be ba bɛɛ wɔri ba di, kon ben tii wɔriwa n di. Be ba sãa bɛɛn yibɛrɛba kpuro ba koo bu yoru mwɛɛriwa. Be ba bɛɛn yãnu guramɔ, kon de bu maa ben tiin yãnu gura. 17Adama bɛɛ, be ba raa mɔ̀ i kam kua, ma goo kun bɛɛn laakari mɔ̀, kon bɛɛn mɛɛran bosu bɛkia. Nɛ, Yinni Gusunɔwa na yeni gerua. 18Na wure na nɛɛ, wee, kon bɛɛ Isireliba Yakɔbun bweseru yara yorun di, kpa i wura bɛɛn yɛnusɔ. Kon bɛɛn yɛnusun wɔnwɔndu ko, kpa n bɛɛn wuu bani gen bansɔ n bɛɛn sina kpaaru seeya n swĩi mi ta raa wãa. 19I ko i siarabun womusu ko ka nuku dobun kuuki. Kon bɛɛ dabiasia, i ǹ maa kaaramɔ. Kon de bu bɛɛ bɛɛrɛ wɛ̃, kpa bu ku bɛɛ gɛm. 20I ko i n sãawa nge yellu, kpa i n da bɛɛn mɛnnɔsu ko nɛn wuswaaɔ. Kpa n be ba bɛɛ dam dɔremɔ kpuro sɛɛyasia. 21Bɛɛn turowa koo ko bɛɛn sunɔ. Kpa n de u man susima, domi goo kun kãkɔ u man susi, ma n kun mɔ na nùn soka. Nɛ, Yinni Gusunɔwa na yeni gerua. 22Saa ye sɔɔra i ko i n maa sãa nɛn tɔmbu, kpa n ko bɛɛn Yinni. 23Wee, nɛ, Yinni Gusunɔn mɔru ya wee nge guru woo bɔkɔ, kpa yu tɔn kɔ̃sobu wɔri. 24Nɛn mɔru ye, ya ǹ suremɔ ma n kun mɔ ya nɛn himba yibia. Amɛn biru kpa yu bɛɛ yeeri.

will be added

X\