Yeremi 3

1Yinni Gusunɔ u maa nɛɛ, goo ù n win kurɔ yina, ma kurɔ wi, u da u durɔ goo sua, durɔ guro wi, u ra maa kurɔ wi naa de? Aawo. Ù n kua mɛ, ya koo win tem disi doke. Adama bɛɛ Isireliba, i kua mɛ. I da i bũu dabiru sãamɔ, ma i kĩ n maa bɛɛ mwaama. Nɛ, Yinni Gusunɔwa na yeni gerua. 2I seewo i mɛɛri guunu gia, kpa i wa nge guuru gara wãa tèn mi i ǹ bũnu sãwa. Wee, i ra bũnu kasu nge mɛ kurɔ tanɔ u ra win kĩnasibu kasu. I sãa nge Daarubu swaa dio be ba ra n tɔmbu mara swɛɛ sɔɔ. Ma i tem mɛ disi doke bɛɛn bũu gasiribu ka bɛɛn nuku kɔ̃surun sɔ̃. 3Yen sɔ̃na gura kun tãramɔ bu sere nɛɛ, ya koo nɛ. Adama ka mɛ, i bũnu gasirimɔ i dɔɔwa. Sekura kun bɛɛ mɔ̀. 4Wee tɛ̃, i man nɔɔgiru suemɔ i mɔ̀, i man nɔɔgiru mɔ̀ i gerumɔ nɛna na sãa bɛɛn baaba, i maa man kĩwa saa bɛɛn piiburun di. 5Ma i bikiamɔ, ko na n ka bɛɛ mɔru sãawa sere ka baadommaɔ? Bɛɛ Isireliba, yeniwa i ra n gerumɔ, adama i kɔ̃sa mɔ̀ i dɔɔ nge mɛ̀n nɔɔ i kĩ. 6Yudaban sina boko Yosiasin waati sɔɔ, Yinni Gusunɔ u Yeremi sɔ̃ɔwa u nɛɛ, a wa ye Isireliba ba mɔ̀? Ba sãawa mɛm nɔɔ sariba. Wee, ba da mi gungunu ka dãa kubenu wãa kpuro, ba bũnu sãamɔ. 7Ma nɛ, Yinni Gusunɔ na tii sɔ̃ɔwa na nɛɛ, bà n yeniba kpuro kua, ba koo wurama nɛn mi. Adama ba ǹ wuramɛ. Ben mɛro bisibu, Yudan bweseru te ta sãa nge kurɔ naanɛ sarirugii, ben tii ba wa mɛ. 8- 10Isireliba ba tem mɛ disi doke ben bũu gasiribun sɔ̃ ka ben sekuru sarirun sɔ̃ te baawure u gerumɔ. Ma ba bũu sãamɔ kpenu ka dãnun nuurɔ. Yen sɔ̃na na bu yina ma na bu yinabun tireru wɛ̃. Ka mɛ, na wa Yudaba ba ǹ bɛrum kue. Ba dawa ba bũnu gasira ben tii. Ba ǹ wuramɛ nɛn mi ka ben gɔ̃ru kpuro. Weesu sɔɔra ba yɔ̃. 11Yinni Gusunɔ u maa Yeremi sɔ̃ɔwa u nɛɛ, baa mɛ Isireliba ba sãa mɛm nɔɔ sariba, ba sanɔ bo ka sere Yudaba. 12Yen sɔ̃, a doo sɔ̃ɔ yɛ̃san nɔm geu gia a Isireliba gari yini sɔ̃ a nɛɛ, bu wurama, na ǹ ka bu nɔnu kɔ̃su mɛɛrimɔ. Domi na sãawa wɔnwɔndugii. Na ku ra mɔru ko n ka tɛ. 13Bu gesi ben durum wuro. Bu wuro ma ba ǹ ka man yɔ̃re, nɛ, Gusunɔ ben Yinni. Domi ba da ba bũnu gasira dãa kubenɔ. Ba yina bu nɛn gari swaa daki. Nɛ, Yinni Gusunɔwa na yeni gerua. 14Bu wurama nɛn mi, be, bii mɛm nɔɔ sariba. Domi na sãawa ben Yinni. Kon be ba tie yarama wuu sìn mi ba wãa kpuron di, baa ǹ n tɔn turon na, ǹ kun mɛ yiru. Kpa n ka bu wurama nɛn mi Siɔniɔ. 15Saa ye sɔɔ, kon bu kparobu wɛ̃ be nɛn gɔ̃ru ga kĩ. Kpa bu bu kpara ka bwisi, ka laakari. 16Ba koo marura bu dabia tem mɛ sɔɔ. Sanam mɛ sɔɔ, ba koo man gia. Ba ǹ maa nɛn woodan kpakororun gari mɔ̀. Goo kun maa ten bwisikunu mɔ̀. Goo kun maa tu yaayamɔ u nɛɛ, mana ta wãa. Goo kun maa ten kɔsire mɔ̀. 17Saa ye sɔɔ, nɛn sina gɔna ya ko n wãawa Yerusalɛmuɔ. Kpa bwese ni nu tie kpuro nu maa mɛnna mi, nɛn yĩsirun sɔ̃. Ba ǹ maa ben bwisi kɔ̃si swĩimɔ. 18Saa ye sɔɔ, Yudaba ka Isireliba ba koo mɛnna bu ko tia. Domi ba koo wurama sannu saa sɔ̃ɔ yɛ̃san nɔm geu gian di. Kpa bu sina tem mɛ sɔɔ mɛ na ben baababa wɛ̃ ba tubi di. 19Nɛ, Yinni Gusunɔ na gerua na nɛɛ, kon daa bɛɛ Isireliba kowa nɛn bii kĩnasibu, kpa n bɛɛ tem gem wɛ̃ mɛ mu buram bo handunia yeni sɔɔ. Na raa tamaa i ko man sokuwa bɛɛn Baaba, kpa i ku maa man deri. 20Adama i man tɔnu kam kom kua nge mɛ kurɔ naanɛ sarirugii u ra win durɔ kue. Nɛ, Yinni Gusunɔwa na yeni gerua. 21Wee, nɔɔ gagu ga nɔɔra guuru wɔllɔ. Ase Isirelibara ba kuuki mɔ̀ ba bũnu kanamɔ, domi ben sanu sanusu kpuro su sankira, ba nɛ, Gusunɔ ben Yinni duari. 22Bɛɛ, bii mɛm nɔɔ sariba, i wurama nɛn mi. Kon bɛɛ bɛɛn mɛm nɔɔbu sariru suuru kua. Ma Isireliba ba nɛɛ, Gusunɔ, wuna a sãa bɛsɛn Yinni. Bɛsɛ wee, wunɛn miya sa wee. 23Geema bũu ni sa raa sãamɔ guunu wɔllɔ sa kuuki mɔ̀, nu sãawa weesu. Adama Gusunɔ bɛsɛn Yinni, wuna a sãa bɛsɛ Isireliban faaba kowo. 24Wee, saa bɛsɛn birun di sa waamɔ bũu wi ba mɔ̀ Baali, wiya u bɛsɛn baababan gbean dĩanu di kpuro, ka maa ben yãanu ka ben kɛtɛba ka sere ben bibu. Ma ba sekuru wa. 25Su kpuna sekuru sɔɔ kpa su bɛsɛn bɛɛrɛ sariru wukiri nge bekuru. Domi bɛsɛ ka bɛsɛn baababa sa wunɛ Gusunɔ bɛsɛn Yinni torari. Saa bɛsɛn birun di n ka gisɔ girari sa ǹ wunɛn gere wure.

will be added

X\