Yeremi 28

1Sedesiasin bandun wɔ̃ɔ nnɛse te sɔɔ, yen suru nɔɔbuse sɔɔ, Hanania, Asurin bii, wi u sãa Gusunɔn sɔmɔ Gabaoniɔ, u ka Yeremi gari kua yãku kowobu ka tɔmbu kpuron wuswaaɔ, Yinni Gusunɔn sãa yerɔ. 2U nɛɛ, amɛniwa Gusunɔ, Isireliban Yinni wi u wɔllu ka tem mɔ u gerua. U nɛɛ, u koo wigibu yara Babilonigibun yorun di, te ta sãa nge sugu ben wĩinɔ. 3N ka ko wɔ̃ɔ yiru u koo de Nɛbukanɛsaa u ka wi, Yinni Gusunɔn sãa yerun dendi yãa ni wurama, ni u raa gura u ka da Babiloniɔ. 4U koo maa de Yoyakini, Yoyakimun bii, Yudaban sina boko u wurama, ka sere Yudaban tɔn be ba ka da Babiloniɔ. Domi u koo bu yara Babilonin yorun di. 5Yera Yeremi u Gusunɔn sɔmɔ Hanania wisa yãku kowobu ka tɔn be ba wãa Yinni Gusunɔn sãa yeru mi kpuron wuswaaɔ, 6u nɛɛ, ami. Gusunɔ u de yu koora nge mɛ a gerua. Kpa u de tɔn be kpuro bu wurama Babilonin di ka Yinni Gusunɔn sãa yerun dendi yãa ni. 7Adama Hanania, a gari yini swaa dakio a nɔ, yi na gerumɔ wunɛn wuswaaɔ ka tɔn ben wuswaaɔ. 8Gusunɔn sɔmɔ be ba gbia ba na yellun di, sa sere na, nɔni swãaru ka tabu ka baranun gariya ba bwese bakanu ka sina bokobu sɔ̃ɔwa. 9Tɛ̃ Gusunɔn sɔmɔ goo ù n seewa u bɔri yɛndun gari mɔ̀, amɔna tɔmba koo ka tubu ma Gusunɔwa u yɛ̃ro gɔrima, ma n kun mɔ ye u gerua mi, ya koora. 10Yera Gusunɔn sɔmɔ Hanania u Yeremi sugu ye wuna ma u ye bɔɔka. 11Ma u tɔmbu kpuro sɔ̃ɔwa u nɛɛ, amɛniwa Yinni Gusunɔ u gerua. U nɛɛ, n ka ko wɔ̃ɔ yiru u koo Babilonigibun dam mɛ bua nge mɛ na sugu ye bɔɔka. Ma Yeremi u win swaa mwa u n doonɔ. 12Sanam mɛ Hanania u sugu dãa ye wuna Yeremin wĩirun di u bɔɔka u kpa, yera Yinni Gusunɔ u Yeremi sɔ̃ɔwa u nɛɛ, 13a doo a Hanania sɔ̃ a nɛɛ, u kpĩa u sugu dãagia ye bɔɔka, adama u koo yen kɔsire wa ye ya sãa sisugia. 14Nɛ Gusunɔ, Isireliban Yinni, nɛ wi na wɔllu ka tem mɔ, na nɛɛ, wee na sugu sisugia dokemɔ bwese ni kpuron wĩinɔ, kpa nu ka Nɛbukanɛsaa, Babilonin sina boko yoru diiya. Baa ka gbeeku yɛɛyɔ, kon nùn ye nɔmu bɛriawa. 15Yera Yeremi u Hanania sɔ̃ɔwa u nɛɛ, a swaa dakio a nɔ, Yinni Gusunɔ kun nun gɔre. Ka mɛ, a da a tɔmbu gari weesugii sɔ̃ɔwa, ma ba yi naanɛ kua. 16Yen sɔ̃, tɛ̃, wee ye Yinni Gusunɔ u gerua. U nɛɛ, u koo nun wuna tem minin di, domi wunɛn gari yi dera tɔmba nùn seesi. Kaa gbi gisɔku ge. 17Ma Gusunɔn sɔmɔ Hanania wi, u gu wɔ̃ɔ gen suru nɔɔba yiruse sɔɔ.

will be added

X\