Yeremi 27

1Ye Sedesiasi Yosiasin bii, Yudaban sina boko u bandu di u kpa, n tɛ fiiko, yera Yinni Gusunɔ u ka Yeremi gari kua u nɛɛ, 2Yeremi, a tii suguba kuo ka maa wɛ̃ɛ a ye sɔbe, 3kpa a ye sɔmɔbu wɛ̃ be sinam beni, Edɔmuban sunɔ, ka Mɔabuban sunɔ, ka Amɔniban sunɔ, ka Tirin sunɔ, ka Sidonin sunɔ ba gɔra Yerusalɛmuɔ Sedesiasi, Yudaban sina bokon mi, kpa ben baawure u ka ye win yinni daawa. 4Kpa a maa bu sɔ̃ bu ben yinnibu sɔ̃ bu nɛɛ, nɛ, Gusunɔ, wɔllu ka tem Yinni, wi Isireliba ba sãamɔ, na nɛɛ, 5nɛna na tem taka kua ka tɔmbu ka yɛɛ yi yi wãa mɛ sɔɔ, ka nɛn dam bakam. Wi na kĩ, wiya na ra mu wɛ̃. 6Wee tɛ̃ kon bɛɛn tem mɛ kpuro nɛn sɔm kowo Nɛbukanɛsaa, Babilonin sina boko wɛ̃. Kpa n de sere ka gbeeku yɛɛyɔ yi nùn sɔmburu kua. 7Bwesenu kpuro nu koo wi ka win bibu, ka win debuminu sã. Adama saa gaa koo na yè sɔɔ bwese damginu ni nu sinam damgibu mɔ, nu koo ra win tii ka win temgibu yoru mwa. 8Bweseru garu tà n yina tu Nɛbukanɛsaa sã tu nùn yoru diiya, nɛ, Yinni Gusunɔ, kon de u bwese te tabu wɔri. Kon maa tu bararu ka gɔ̃ɔru kpɛ̃ɛ, u ka kpĩ u tu kpeerasia. 9Ǹ n mɛn na, bɛɛ, i ku maa bɛɛn sɔmɔbu swaa daki, ka bɛɛn sɔrobu ka bɛɛn tiin dosusu, ka bɛɛn gɔri sokobu, be, be ba ra bɛɛ sɔ̃ bu nɛɛ, i ǹ ko Babilonin sina boko sã. 10Domi weesa ba gerumɔ, ye ya koo de n bɛɛ tondasia bɛɛn tem di kpa n bɛɛ kpeerasia. 11Adama bwese te ta wura tu Babilonin sina bokon sugu sɔbe, tu nùn yoru diiya, kon bwese te deri ten tem sɔɔ kpa tu gbea ko mi, ta n wãa. Nɛ, Yinni Gusunɔwa na yeni gerua. 12Ma Yeremi u maa gari tee yi Sedesiasi sɔ̃ɔwa. U nɛɛ, Sedesiasi, wunɛ ka wunɛn tɔmbu, i Babilonin sina bokon sugu dokeo, i nùn yoru diiya, wi ka win tɔmbu, kpa i wa i n wãa. 13Mban sɔ̃na kaa de bu wunɛ ka wunɛn tɔmbu go tabu sɔɔ, ǹ kun mɛ i gbi gɔ̃ɔru ka baranun sɔ̃ nge mɛ Yinni Gusunɔ u gerua. U nɛɛ, bwese te ta yina tu Babilonin sina boko wiru kpĩiya ta koo gbiwa nge mɛ. 14U maa nɛɛ, i ku sɔmɔ ben gari swaa daki, be, be ba bɛɛ sɔ̃ɔmɔ ba mɔ̀, i ǹ Babilonin sina boko yoru diiyammɛ. Domi gari weesugiiya ba mɔ̀. 15N ǹ nɛ, Yinni Gusunɔ na bu gɔra. Ba gari mɔ̀wa ka nɛn yĩsiru adama weesa ba mɔ̀. Ì n bu swaa daki, kon bɛɛ girawa, kpa i gbi, bɛɛ ka be sannu. 16Ma Yeremi u maa yãku kowobu ka tɔn be ba mɛnnɛ mi, gari yi sɔ̃ɔwa. U nɛɛ, wee ye Yinni Gusunɔ u gerua. U nɛɛ, i ku bɛɛn sɔmɔbun gari swaa daki, be ba gerumɔ ba mɔ̀, ba koo ka Yinni Gusunɔn sãa yerun dendi yãnu wurama saa Babilonin di n ǹ tɛɛmɔ. Domi gari weesugiiya ba mɔ̀ mi. 17I ku bu swaa daki. I Babilonin sina boko wiru kpĩiyɔ, kpa i wa i n wãa. Mban sɔ̃na i ko i de bɛsɛn wuu geni gu ko bansu. 18Yeremi u maa nɛɛ, sɔmɔ be, bà n sãan na Gusunɔn sɔmɔbu ka gem ma win gariya ba kparamɔ, bu nùn kanɔ, wi, wɔllu ka tem Yinni, u ku de bu yãa ni gura ni nu tie win sãa yerɔ ka Yudaban sina kpaarɔ ka Yerusalɛmu sɔɔ kpuro, bu ka da Babiloniɔ. 19- 20Domi sanam mɛ Babilonin sina boko u Yoyakini, Yoyakimun bii, Yudaban sina boko yoru mwa ka win sina asakpɔbu, u ǹ gina dendi yãa nini gure, gbereba, ka boo sii ganduguu, ka gen sɔwaritii, ka dendi yãa ni nu tie Yerusalɛmuɔ. 21Wee ye Yinni Gusunɔ u gerua dendi yãa nin sɔ̃. 22U nɛɛ, ni kpurowa ba koo gura bu ka da Babiloniɔ. Miya nu ko n wãa sere win tii u ra ka de bu ka nu wurama min di.

will be added

X\