Yeremi 26

1Ye Yoyakimu, Yosiasin bii Yudan sina boko u bandu di, yen sɔ̃ɔ mɛɛ tera Yinni Gusunɔ u ka Yeremi gari yini kua u nɛɛ, 2amɛniwa nɛ, Yinni Gusunɔ na gerua na nɛɛ, a yɔ̃ro sãa yerun yaara mini. Tɔn be ba koo na saa Yudan wusu kpuron di bu ka man sã, kpa a bu gari yi kpuro sɔ̃ yi na nɛɛ, a bu sɔ̃. Baa yin tia a ku ra bure. 3Bà n wura ba nun swaa daki, ma ba wura ben dɔɔ sɔɔ, ba ben kom kɔ̃sum deri, kɔ̃sa ye na raa gɔ̃ru doke n bu kua, kon ye deri. 4A bu sɔ̃ɔwɔ a nɛɛ, amɛniwa nɛ, Yinni Gusunɔ na gerua. Na nɛɛ, bu man swaa dakio bu nɛn woodaba swĩi ye na bu wɛ̃, 5kpa bu ku nɛn gɔrobun gari atafiiru ko. Na ra be bu gɔrie saa yellun di, adama ba ǹ bu swaa daki. 6Yen sɔ̃, kon sãa yee te kam koosia nge mɛ na Silogiru kua, kpa n de bwesenu kpuro nu wuu gen yĩsiru sia nù n bɔ̃rumɔ. 7Yãku kowobu ka Gusunɔn sɔmɔbu ka wuun tɔmbu ba Yeremin gari yi nua yi u gerumɔ Yinni Gusunɔn sãa yerɔ. 8Ye u gari yi gerua u kpa yi Yinni Gusunɔ u nùn yiire u tɔn be kpuro sɔ̃ mi, yera yãku kowo be, ka Gusunɔn sɔmɔ be, ka sere wuun tɔn be ba tie kpuro ba na ba nùn sɛ̃re. Ba gbãsukumɔ ba mɔ̀, kaa gbiwa. 9Tɔmbu kpuro ba na ba Yeremi mɛnnɛ Yinni Gusunɔn sãa yeru mi, ba mɔ̀, mban sɔ̃na a gerumɔ ka Yinni Gusunɔ yĩsiru a mɔ̀, sãa yee teni ta koo kam kowa nge Silogiru, kpa Yerusalɛmu yu ko bansu. 10Ye Yudan wirugibu ba nua mɛ, yera ba seewa sina kpaarun di ba da Yinni Gusunɔn sãa yerɔ, ma ba sina sãa yee ten kɔnnɔwɔ ge ba sokumɔ kɔnnɔ kpɔɔ. 11Ma yãku kowo be, ka Gusunɔn sɔmɔ be, ba wirugibu ka tɔn be ba tie kpuro sɔ̃ɔwa ba nɛɛ, n weenɛwa bu durɔ wini go. Domi gari kamwa u wuu geni gerusimɔ. Bɛɛn tii i maa yi nua ka bɛɛn swaa. 12Ma Yeremi u wirugii be ka tɔn be kpuro sɔ̃ɔwa u nɛɛ, Yinni Gusunɔwa u man gɔrima n ka gari ko sãa yee teni ka wuu genin sɔ̃, nge mɛ i nua kpuro. 13I gɔ̃ru gɔsio kpa i kom kɔ̃sum deri. I Gusunɔ bɛɛn Yinnin gari swaa dakio, kpa u kɔ̃sa ye deri ye u raa kĩ u bɛɛ kua. 14Adama nɛ wee bɛɛn nɔmaɔ, i ka man koowo nge mɛ n bɛɛ dɛnde. 15I yɛ̃ ma na ǹ taarɛ gaa mɔ. Yen sɔ̃, ì n man go, nɛn yɛm mu kua bɛɛ ka bɛɛn wuu gen sɔmunu. Domi ka gem Yinni Gusunɔwa u man gɔrima n ka bɛɛ gari yini kpuro sɔ̃. 16Yera wirugii be, ka tɔn be ba tie ba yãku kowo be, ka sɔmɔ be sɔ̃ɔwa ba nɛɛ, n ǹ weenɛ su durɔ wi go domi ka Gusunɔ bɛsɛn Yinnin yĩsira u gari yini gerua. 17Ma wuu gen guro gurobu gabu ba seewa ba tɔn wɔru ge sɔ̃ɔwa ba nɛɛ, 18Misee Mɔresɛtigii u raa Gusunɔn gari gerua Yudan sina boko Esekiasin waati u nɛɛ, amɛniwa Gusunɔ, wɔllu ka tem Yinni u gerua. U nɛɛ, ba koo Yerusalɛmu bwiiya nge gberu, kpa yu ko nge kpee ni ba suba, kpa guu tèn wɔllɔ ba Yinni Gusunɔn sãa yee te bana, tu dãnu kpi n ko dãa sɔ̃ɔ bɔkɔ. 19Yudaba ka ben sina boko Esekiasi wi, ba Misee wi go? Esekiasi wi, u ǹ Yinni Gusunɔ nasie? Nge u ǹ Yinni Gusunɔ suuru kanɛ ro? Ma Yinni Gusunɔ u kɔ̃sa ye deri ye u raa kĩ u bu kua. Yera i ko de bɛsɛ, su tii durum baka yeni sɔbi? 20- 21N deema Yoyakimun waati ye sɔɔ, durɔ goo maa wãa wi ba mɔ̀ Uri, Semaya Kiriati Yarimugiin bii. Durɔ wi, u ra gari gere ka Yinni Gusunɔn yĩsiru. Ma u gari tee yi gerua win tii, wuu genin sɔ̃ nge mɛ Yeremi u gerua mi. Ma Yoyakimu ka win tabu durɔbu ka maa win sina asakpɔbu ba gari yi nua. Yera sina boko wi, u kasu u Uri go. Ye Uri u nua mɛ, u bɛrum soora, ma u kpikiru sua u da Egibitiɔ. 22Yera Yoyakimu u Ɛlinatani Akaborin bii gɔra Egibitiɔ ka tɔmbu gabu sannu bu ka Uri mwaama. 23Ma ba Uri wi mwaama ba ka nùn na sina bokon mi. Ma u dera ba nùn go ka takobi. Yera ba win goru kare mi ba ra tɔn dirobu sike. 24Adama Akikamu Safanin bii u yɔ̃rawa ka Yeremi ma u yina bu tɔn be Yeremi nɔmu bɛria bu go.

will be added

X\