Yeremi 24

1Ye Nɛbukanɛsaa, Babilonin sina boko u Yoyakini, Yoyakimun bii, Yudaban sina boko mwa ka win sina asakpɔbu ka ben dãa dãkobu ka ben sekobu, u ka bu da Babiloniɔ, saa ye sɔɔra Yinni Gusunɔ u Yeremi figie bii ni ba doke birenu yiru sɔɔ sɔ̃ɔsi sãa yerun kɔnnɔwɔ. 2Bire nin teeru ta figie bii geenu yiba ni nu sãa nge yen marum gbiikum. Ma teera ma bii kɔ̃sunu yiba ni nu ǹ diirɔ. 3Ma Yinni Gusunɔ u Yeremi bikia u nɛɛ, Yeremi, mba a waamɔ mi. Ma u wisa u nɛɛ, birenu yiruwa na waamɔ, ni nu figie binu yiba. Ganu gea sãa, ma ganu kɔ̃sunu sãa, nu ǹ diirɔ. 4Yera Yinni Gusunɔ u nùn sɔ̃ɔwa u nɛɛ, 5wee ye na gerua, nɛ, Gusunɔ Isireliban Yinni. Na nɛɛ, nge mɛ figie bii gee ni, nu ra tɔmbu wɛ̃re, nge mɛya kon Isireli be ba yoru mwɛɛra ba ka da Babiloniɔ mɛɛri ka nɔnu geu. 6Kon de bu wurama ben tem mini. Na ǹ maa bu suramɔ, kon bu tãsisiawa. Na ǹ maa bu wukamɔ, kon bu girawa n sire. 7Kon bu gɔ̃ru kpɔɔ wɛ̃, kpa bu gia ma nɛna na sãa kpuron Yinni. Ba koo wurama nɛn mi kpa ba n sãa nɛn tɔmbu ba n man sãamɔ. 8Adama Sedesiasi, Yudaban sina boko ka win sina asakpɔbu ka tɔn be ba tie Yerusalɛmuɔ ka be kpuro be ba sɔ̃ tem mɛ sɔɔ, ka sere be ba kpikiru da Egibitiɔ, kon dewa ba n sãa nge figie bii kɔ̃su ni nu ǹ diirɔ mi. 9Tɔmbu bà n bu wa ba koo biti soora. Gee kon bu yarinasia kpuro, ba koo bu yɛ̃ɛwa bu bu yaakoru koosi kpa ba n wãa sekuru sɔɔ kpa ba n da ka ben yĩsiru tɔmbu bɔ̃rusi. 10Kon bu tabu surema ka gɔ̃ɔru ka baranu sere bu ka gbi tem mɛ kpuro sɔɔ, mɛ na be ka ben baababa wɛ̃.

will be added

X\