Yeremi 21

1- 2Sina boko Sedesiasi u Pasuri, Maakiyan bii, ka Sofoni, yãku kowo Maseyan bii gɔra Yeremin mi, bu nùn sɔ̃ bu nɛɛ, u bu bikiaru kuo Yinni Gusunɔn mi, domi Nɛbukanɛsaa, Babilonin sina boko, u ka bu tabu mɔ̀. Sɔrɔkudo Yinni Gusunɔ u koo nùn maamaaki gaa kpare ben sɔ̃, kpa u wa u bu deri. Yera Yinni Gusunɔ u ka Yeremi gari kua. 3Ma Yeremi u tɔn be wisa u nɛɛ, bu doo sina boko Sedesiasin mi bu nɛɛ, 4amɛniwa Gusunɔ Isireliban Yinni u gerua. U nɛɛ, wee, u koo de ben tabu kowo be ba ka Babilonin sina boko ka win tɔmbu sannamɔ wuun biruɔ bu duki su bu wura wuu ge sɔɔ. 5Kpa wi, Gusunɔn tii u ka be Yudaba sanna ka mɔru u bu win dam sɔ̃ɔsi, 6u de bara kɔ̃suru tu hunde koniba kpuro wɔri tu go wuu ge sɔɔ, tɔmbu ka yaa sabenu. 7Yen biruwa u koo sina boko Sedesiasi, Nɛbukanɛsaa nɔmu bɛria, wi ka win sɔm kowobu ka win tɔn be ba wãa wuu ge sɔɔ, be ba gesi yara bararun di, ka tabun di, ka gɔ̃ɔrun di. Be kpurowa Nɛbukanɛsaa u koo go. U ǹ ben wɔnwɔndu mɔ̀. U ǹ maa goo derimɔ. 8Wee ye Yinni Gusunɔ u maa Yeremi sɔ̃ɔwa win tɔmbun sɔ̃. U nɛɛ, wee, u bu swaa yiru yiiyammɛ, swaa yèn mi wãara wãa, ka yèn mi gɔɔ u wãa. 9Wi u koo gesi yɔ̃ra wuu ge sɔɔ, u koo gbiwa tabu sɔɔ, ǹ kun mɛ ka gɔ̃ɔru, ǹ kun mɛ ka bararu. Adama wi u yara u tii Babilonigibu wɛ̃ be ba bu tarusi, yɛ̃ro koo win wãaru wɔra. Teya ta ko n sãa win arumani ye u kpĩa u yara. 10Domi u yɔ̃rariwa u wuu ge kɔ̃sa kua, n ǹ mɔ gea. U koo gu Babilonin sina boko nɔmu sɔndiawa u gu dɔ̃ɔ mɛni. 11Yinni Gusunɔ u nɛɛ, amɛniwa wunɛ Yeremi kaa Yudaban sina bokon bweseru sɔ̃. A nɛɛ, bu nɛ, Yinni Gusunɔn gari nɔɔwɔ. 12Be, Dafidin bweseru, ba n da gem swĩi baadomma. Kpa bu be ba dam dɔre yakia be ba bu dam dɔremɔn nɔman di. Bà kun kue mɛ, nɛn mɔru ya koo bu yabure ben kom kɔ̃sum sɔ̃. Ba ǹ maa kpɛ̃ bu ye go. 13Kon Yerusalɛmugibu wɔri. Be, be ba wãa wɔwa sɔɔ kperun wɔllɔ, baa bà n gerumɔ ba mɔ̀, wara u koo kpĩ u du ben wãa yerɔ, u ben kuku yeru turi. 14Kon bu sɛɛyasia nge mɛ ben kookoosu nɛ. Kon ben sina kpaaru dɔ̃ɔ mɛni te ba bana ka dãa ye ba mɔ̀ sɛduru, kpa ye ya ka tu sikerenɛ kpuro yu dɔ̃ɔ mwaara.

will be added

X\