Yeremi 20

1Yera sɔ̃ɔ teeru, Pasuri Imɛrin bii wi u sãa yãku kowo u ka maa sãa Yinni Gusunɔn sãa yerun kɔ̃sobun tɔnwero u nua ma Yeremi u yeniban gari gerua. 2Yera u dera ba nùn so, ma ba nùn dãa doke nge wiiro Yinni Gusunɔn sãa yerɔ, kɔnnɔ ge ba sokumɔ Bɛnyamɛɛn kɔnnɔn bera gia. 3Adama yen sisiru bururu, Pasuri u Yeremi dãa ye wuna. Ma Yeremi u nùn sɔ̃ɔwa u nɛɛ, Yinni Gusunɔ kun maa nun sokumɔ Pasuri. Yĩsi ten tubusiana bɔri yɛnda ka nun sikerenɛ. Adama tɛ̃, u nun sokumɔ Magɔɔ Misabibu. Yen tubusiana nandabu ka nun sikerenɛ. 4Domi Yinni Gusunɔ u gerua u nɛɛ, u koo wunɛ ka wunɛn bɔrɔba nandabu kpɛ̃ɛ. U koo de bɛɛn yibɛrɛba bu bɛɛn gabu go tabu sɔɔ, kpa a ye wa ka wunɛn nɔni. Kpa Babilonin sina boko u Yudaba go kpa u gabu yoru mwɛɛri u ka da Babiloniɔ. 5U koo de yibɛrɛba bu Yerusalɛmun arumani gura, ka sɔma ye tɔmba kuan are kpuro, ka sere gãa gee ni nu wãa ye sɔɔ. U koo de bu Yudaban sinambun arumani gura, kpa bu ka ye kpuro da Babiloni mi. 6Pasuri, wunɛ ka wunɛn yɛnugibu, ba koo bɛɛ yoru mwa bu ka da Babiloniɔ. Miya i ko i gbi, wunɛ ka be a gari weesugii kua, kpa bu bɛɛ sike mi. 7Yinni Gusunɔ, a man kɔkura, ma na wunɛn gari wura. A man sɛ̃re a kamia. Wee tɔ̃ru baatere tɔmbu kpuro ba ra n man yɛ̃ɛmɔwa, kpa ba n man gari bɔkɔ mɔ̀. 8Nà n kĩ n gari gere, sere n nɔɔgiru sua ka dam n nɛɛ, yibɛrɛba ba wee bu sun dam dɔre, kpa bu sun kam koosia. Yinni Gusunɔ, tɔmba ra n man yɛ̃ɛmɔwa wunɛn garin sɔ̃ baadomma. 9Nà n nɛɛ, kon nun deriwa, na ǹ maa wunɛn gari kparamɔ, n da n sãawa nge dɔ̃ɔ u wãa nɛn wasi sɔɔ u nɛn kukunu mɛnimɔ. Kpa n kookari ko n ka tii marisi, adama na ku ra kpĩ. 10Na nɔɔmɔ tɔn dabinu nu man kɔ̃sa bwisikusimɔ. Ba mɔ̀, nandabu wãa baama. Su ka win gari da wirugibun mi. Be ba raa ka man nɔɔ tia sãa ba mɛɛrimɔ nà n kon sokura. Ba mɔ̀, sɔrɔkudo kon de bu man samba ko. Kpa bu wa bu man mwa bu mɔru kɔsie. 11Adama na yɛ̃ ma wunɛ Yinni Gusunɔ, a wãa ka nɛ nge tabu durɔ damgii. Yen sɔ̃na be ba man nɔni sɔ̃ɔmɔ ba koo sokura. Ba ǹ kpɛ̃ bu man kamia. Yen sɔ̃na ba koo sekuru wa kpa ba n tu yaaye sere ka baadommaɔ. 12Wunɛ Gusunɔ wɔllu ka tem Yinni, wunɛ wi a ra tɔnu wɛ̃ɛri, a ka wa ù n sãa gemgii, kpa a n win bwisikunu ka win gɔ̃run gari yɛ̃, wuna kon de a nɛn yibɛrɛba mɔru kɔsie. Domi wuna na tii nɔmu sɔndia. 13I Yinni Gusunɔ siaro ka womusu. Domi u ra wɔnwɔndo wɔre saa tɔn kɔ̃son nɔman di. 14Tɔ̃ɔ bɔ̃rigira tɔ̃ɔ tè sɔɔ ba man mara. Tɔ̃ɔ te, tu ku domaru wa. 15Bɔ̃rurowa wi u da u nɛn tundo sɔ̃ɔwa u nɛɛ, wee, ba nùn bii tɔn durɔ marua. Ma labaari ye, ya nùn nuku doo bakabu wɛ̃. 16Durɔ wi, u kam koowo nge wuu si Yinni Gusunɔ u kam koosia u ǹ sin wɔnwɔndu kue. Kpa u wuri nɔ bururu, kpa u tabun wurenu nɔ sɔ̃ɔ sɔɔ gbãara. 17Mban sɔ̃na Gusunɔ u ǹ yande dere n gbi sanam mɛ na wãa nɛn mɛron nukurɔ, kpa nuku te, tu yande ko nɛn sikiru, kpa na n wãa mi sere ka tɛ̃. 18Mban sɔ̃na na yara nɛn mɛron nukurun di, na ka sere wahala yeni ka wasi wuriri bini waamɔ, ma nɛn wãara wiru gooramɔ ka sekuru.

will be added

X\