Yeremi 2

1Yinni Gusunɔ u man sɔ̃ɔwa u nɛɛ, 2n doo n bɛɛ Yerusalɛmugibu sɔ̃ n nɛɛ, u yaaye nge mɛ i nùn kĩa yellu nge kurɔ kpao, i ka nùn swĩi gbabu tèn mi gãanu ku ra kpi. 3Bɛɛ Isireliba, i raa wãawa wi turon sɔ̃. I sãawa win arumani ye u tii gɔsia. Wi u na u bɛɛ gura, wahala ya ra yɛ̃ro deemɛwa. Wi, Yinni Gusunɔwa u yeni gerua. 4Tɛ̃, bɛɛ Isireliba, bɛɛ be i sãa Yakɔbun bweseru, i swaa dakio i nɔ. 5Yinni Gusunɔ u nɛɛ, tora terà bɛɛn sikadoba ba nùn waasi ba ka nùn deri, ba da ba kam swĩi, ma ben tii ba kam kua. 6Ba ǹ tii bikie bu nɛɛ, mana wi, Yinni Gusunɔ u wãa, wi, wi u bu yarama Egibitin di. Mana u wãa, wi, wi u ka bu da gbaburɔ mi gãanu ku ra kpi. Gbabu te sɔɔ, nim sari, dɔkɔ kpirina nu yiba, wãara maa sɛ̃ mi. Yen sɔ̃na goo kun wãa mi, goo ku ra maa sĩ mi. 7Yen biru, u ka bu da mi tem gem wãa, kpa bu ka mɛn dãa bii duronu ka mɛn dĩa geenu di. Adama ye ba tura mi, ba tem mɛ sanka, ba mu disi doke. 8Ben yãku kowobu ba ǹ bikie bu nɛɛ, mana Yinni Gusunɔ u wãa. Mɛya maa wooda yɛ̃robu ba ǹ nùn gie. Ben wirugibu ba nùn seesi. Bũu wi ba mɔ̀ Baali, win gariya Gusunɔn sɔmɔbu ba swĩi ba ka gari mɔ̀. Ma ba da ba bũnu sãwa ni nu ǹ bu arufaani gaa wɛ̃ɛmɔ. 9Yen sɔ̃na u koo bɛɛ ka bɛɛn bibun bweseru siribu soku. 10I be ba wãa nim wɔ̃kun tem bure te ba sokumɔ Sipu mɛɛrio. I goo gɔrio Kedaaɔ u mɛɛri sãa sãa u ka wa bà n mɔ̀ nge bɛɛ, 11u ka wa bweseru garu tà n ten bũnu kɔsire baa mɛ nu ǹ sãa gem, nge mɛ bɛɛ, i Gusunɔ deri wi u sãa bɛɛn bɛɛrɛ. Ma i wura yè sɔɔ i ǹ arufaani gaa wasi. 12Yinni Gusunɔ u nɛɛ, bɛɛ wɔllugibu, i biti sooro yenin sɔ̃, kpa i wɛ̃nu wura. 13Wee win tɔmbu ba durum yiru kua. Ba nùn deri, wi, wi u sãa nge nim gem mɛ mu koo nɔrura, ma ba da ba bũnu swĩi ni nu sãa nge dɔkɔ kpiri ni nu ǹ nim nɛnumɔ. 14Isireliba, i ǹ sãa yobu. Ba ǹ bɛɛ mara yoru sɔɔ. Ǹ n mɛn na, mban sɔ̃na bɛɛn yibɛrɛba ba bɛɛ naa swĩi nge gbeeku yɛɛ. 15Wee ba bɛɛ kukirisi nge gbee sinansu. Ba bɛɛn tem yãnu gura, ma ba bɛɛn wusu dɔ̃ɔ mɛniki, goo maa sari mi. 16Nɔfu ka Tapanɛsigibun tii ba koo bɛɛ kɔni bu pɔɔru woka bu ka bɛɛ yoru mwɛɛri. 17Yeni ya koo bɛɛ deema, domi i Gusunɔ bɛɛn Yinni deri sanam mɛ u bɛɛ kpare swaa gea sɔɔ. 18Ì n da i tii Asirigibu ǹ kun mɛ Egibitigibu wɛ̃, i ben daarun nim nɔrumɔ, mba i ko wa. 19I n yɛ̃ ma bɛɛn nuku kɔ̃suru ka bɛɛn naanɛ sariru ta koo bɛɛ nɔni sɔ̃. Saa ye sɔɔra i ko wa, kpa i gia ma gãa kɔ̃suna i kua mi, ye i ka man deri, i ǹ maa man nasie. Nɛ, Gusunɔ wɔllu ka tem Yinniwa na yeni gerua. 20Yinni Gusunɔ u nɛɛ, saa yellun di, i tii yoru yara, i sugu ka yɔni yi ba raa bɛɛ doke kasuka. Ma i nɛɛ, i ǹ maa kĩ i man yoru diiya. Ma i da gungunu wɔllɔ ka dãa kubenɔ i bũnu gasirimɔ i sãamɔ. 21Yellu, na bɛɛn bweseru duurawa nge resɛm dãa geeru te ta kpuro kere, adama tɛ̃, i kɔsa i kua nge resɛm dãa te ta yina. 22Baa ì n wobura ka werem mɛ mu gɛm durom mɔ, ka mɛ, ko na n bɛɛn disi yi waamɔwa. Nɛ, Yinni Gusunɔwa na yeni gerua. 23Amɔna i ko kpĩ i siki i nɛɛ, i ǹ tii disi koosi, i ǹ bũu wi ba mɔ̀ Baali sãwa. I bɛɛn naasun yira mɛɛrio wɔwa sɔɔ. I de i wura ye i kua, bɛɛ be i sãa nge yooyoo niu ge ga bɔsu ga durɔbu kasu. 24Bɛɛ be i sãa nge gbeeku kɛtɛku niu ge ga gbaburun dɔɔnɛ mɔ. Gen yɔɔbun saa sɔɔ, ga ra n yɔ̃ɔkumɔwa, goo kun kpɛ̃ u gu yɔ̃rasia. Kɛtɛku dwaa ye ya gu kasu kpuro, ya ku ra wasire yu ka gu wa. Domi ya ra gu deemɛwa gen yɔɔbun saa sɔɔ. 25Bɛɛ Isireliba, na nɛɛ, i ku bũnu gasiri sere bɛɛn baranu nu diira, kpa nim nɔru gu bɛɛ go. Adama i ǹ wure. Ma i nɛɛ, n ǹ koorɔ, domi niya i kĩ, i ko maa nu swĩi i sãwa. 26Nge mɛ sekuru ta ra gbɛnɔ mwɛ bà n nùn mwa subaru sɔɔ, nge mɛya bɛɛ Isireliba ka bɛɛn sinambu ka bɛɛn wirugibu ka bɛɛn yãku kowobu ka Gusunɔn sɔmɔbu i ko i sekuru wa. 27Domi i bũu dãru sokumɔ bɛɛn baaba, ma i maa kperu sokumɔ bɛɛn mɛro. Wee bɛɛ Isireliba kpuro i man biru kisi, i ǹ maa man mɛɛrimɔ. Adama ì n wãa wahala sɔɔ, i ra nɛɛwa, n seema n bɛɛ faaba ko. 28Bɛɛ Yudaba, bɛɛn bwãaroku ni i tii sekua nu ka bɛɛn wusu geeru nɛ mi, mana nu wãa. Nu seewo nu bɛɛ faaba ko wahalan saa sɔɔ nù n koo kpĩ. 29Mban sɔ̃na i ka man sikirinamɔ. Wee bɛɛ kpuro i ǹ ka man yɔ̃re. 30Kam sɔɔra na bɛɛ sɛɛyasia. I ǹ nɛn sɛɛyasia bi garisi gãanu. I Gusunɔn sɔmɔbu wɔri i go nge mɛ gbee sunɔ ga ra yaa wɔri gu go. 31Bɛɛ Isireliba, bɛɛ be i tie, i nɛ, Yinni Gusunɔn gari swaa dakio i nɔ. Na bɛɛ sãawɛwa nge tem mi gãanu ku ra kpi? Na bɛɛ sãawɛwa nge yam wɔ̃ku nanumgiru? Mban sɔ̃na bɛɛ nɛn tɔmbu i gerumɔ i mɔ̀, i tii mɔ, i ǹ gɔsiramamɔ nɛn mi. 32Wɔndia u ra win bura yãnu duari ro? Kurɔ kpao u ra win sɔnditia duari? Amɔna bɛɛ nɛn tɔmbu i ka man duari n ka tɛ mɛ, na ǹ mam yen tɔ̃nun geeru yɛ̃. 33I durɔ dama bwisi mɔ sere kurɔ tanɔbu ba yi giamɔ bɛɛn min di. 34Wee tɔn be ba ǹ toren yɛm mu yiba bɛɛn yabenɔ be, be i ǹ ka gãa kɔ̃sunu ganu mwɛ. 35Ka mɛ, i tii sokumɔ be ba dɛɛre. Ma i mɔ̀, nɛ, Yinni Gusunɔn mɔru yu bɛɛ doonari. Adama kon bɛɛ siribu soku yèn sɔ̃ i mɔ̀, i ǹ durum mɔ. 36Mban sɔ̃na i sirenɛ i ka swaa kɔsi. Egibitigiba koo bɛɛ sekuru doke nge mɛ Asirigiba bɛɛ kua. 37Kpa i yari min di i n tuke. Domi nɛ, Yinni Gusunɔ na be i naanɛ sãa mi yina. I ǹ maa somiru garu wasi ben min di.

will be added

X\