Yeremi 19

1Yinni Gusunɔ u Yeremi sɔ̃ɔwa u nɛɛ, a doo mɔmɔn mi a boo dwe ge ba kua ka sɔndu. Kpa a yãku kowo be ba bukure ka wuun guro gurobu mɛnna, 2kpa i da wɔwa ye ba mɔ̀ Bɛni Hinɔmuɔ ye ya wãa kɔnnɔ gen mi gia, mi ba ra wekenu mɔm. Miya kaa nɔɔgiru sua a gari gere yi kon nun sɔ̃. 3Kaa Yudaban sinambu ka Yerusalɛmugibu sɔ̃ bu swaa dakio bu nɔ ye nɛ Gusunɔ, Isireliban Yinni, nɛ wi na wɔllu ka tem mɔ na gerua. Kon de nɔni swãaru tu na Yerusalɛmuɔ sere wi u ten gari nua kpuro, win swasu su sikari. 4Domi ba man deri, ma ba yam mi disi doke. Ba bũnu turare dɔ̃ɔ dokea mi, ni be ka ben sikadoba ka ben sinambu ba ǹ yɛ̃. Ma ba tɔn dabinu go mi, be ba ǹ gãanu kue. 5Ba bũu wi ba mɔ̀ Baali yãku yeru bania gunguru wɔllɔ. Miya ba ra ka ben bibu yãku dɔ̃ɔ mwaararugiru ko, yãku tèn bweseru na ǹ bu yiire, na ǹ mam ten bwisikunu koore. 6Yen sɔ̃na nɛ, Yinni Gusunɔ na nɛɛ, tɔ̃nu ganu sisi nì sɔɔ ba ǹ maa wɔwa ye sokumɔ Tofɛti ǹ kun mɛ Bɛni Hinɔmu. Ba koo ye sokuwa tɔn goo yeru. 7Wɔwa yen miya kon Yudaba ka Yerusalɛmugibun nɔɔ tia ye ba kua kam koosia, kpa n de yibɛrɛba bu bu go tabu sɔɔ. Kon de gbeeku yɛɛ ka gunɔsu ben gonu di. 8Kpa n de Yerusalɛmu yu ko bansu si ba koo yɛ̃ɛ. Wi u sarɔ mi kpuro, ù n ye wa, u biti soora u wia ko nɔni swãa ten sɔ̃. 9Kon de yibɛrɛ be, bu bu nɔni sɔ̃ sere bu ben berusebu ka ben bibun gonun yaa di. 10Yen biruwa wunɛ Yeremi kaa boo ge kɔra tɔn be ba ka nun da min wuswaaɔ. 11Kpa a nɛɛ, nɛ Gusunɔ, wɔllu ka tem Yinni na nɛɛ, kon bu yarinasia kpa n wuu ge kɔsuku nge boo ge, ge ba ǹ kpɛ̃ bu maa sɔmɛ. Tofɛtin wɔwa miya ba koo tɔmbu sike yèn sɔ̃ ba ǹ maa ayeru wasi gam. 12Mɛya kon tem mɛ ka mɛn tɔmbu kua, kpa Yerusalɛmu yu ko nge Tofɛti. 13Yerusalɛmugibun yɛnusu ka Yudaban sinambun yɛnusu, yɛnusu kpuro gesi mi ba ra bũnu turare dɔ̃ɔ dokeye ka mi ba ra suru ka kperi ka sɔ̃ɔ sã, ka sere mi ba ra maa bũnu ganu sã, si kpuro su koo disi duurawa nge Tofɛti. 14Yen biru, Yeremi u gɔsirama Tofɛtin di mi Yinni Gusunɔ u nùn gɔra u win gari gere. Ma u na u yɔ̃ra Yinni Gusunɔn sãa yerun yaaraɔ u tɔmbu kpuro sɔ̃ɔwa u nɛɛ, 15Gusunɔ Isireliban Yinni wi u wɔllu ka tem mɔ u nɛɛ, wee u koo de kɔ̃sa ye u raa gerua kpuro yu Yerusalɛmu ka yen wuu si su tie deema. Domi sin tɔmba swaa taaya, ba ǹ win gere nua.

will be added

X\