1 Yinni Gusunɔ u Yeremi sɔ̃ɔwa u nɛɛ, 2 a seewo kpa a da mɔmɔn yɛnuɔ. Miya kon nun gari sɔ̃. 3 Ma u seewa u da mɔmɔn yɛnu mi. U deema wee u wekeru mɔ̀. 4 Weke te u mɔ̀ mi, ta ǹ gea kue. Ma u ten sɔn te sua u ka weke kpaaru kua te ta nùn wɛ̃re. 5 Yera Yinni Gusunɔ u nɛɛ, 6 mban sɔ̃na na ǹ kpɛ̃ n ka bɛɛ Isireliba ko nge mɛ. Wee nge mɛ mɔmɔ wi, u sɔndu sua u nɛni win nɔmuɔ, nge mɛya i maa wãa nɛn nɔmuɔ. 7 Gasɔ, na ra gere bweseru garun sɔ̃ n nɛɛ, kon tu wuka n sura nge dãa, kpa n tu kam koosia. 8 Adama bwese te, tà n ten daa kɔsa ta nuku kɔ̃suru deri, na ra tu deriwa na kun maa tu kɔ̃sa kue. 9 Mɛya gasɔ, na ra maa gere bweseru garun sɔ̃ n nɛɛ, kon tu seeya. 10 Adama bwese te, tà n kɔ̃sa mɔ̀ ma ta ǹ nɛn gere swaa sue, na ku ra maa tu gea ye kue ye na raa gɔ̃ru doke mi. 11 Yen sɔ̃, a Yudaba ka Yerusalɛmugibu sɔ̃ɔwɔ a nɛɛ, nɛ, Yinni Gusunɔ na sɔɔru mɔ̀ n ka bu kɔ̃sa kua. Na yen kpunaa yi. Ǹ n mɛn na, ben baawure u win daa kɔ̃sa derio u wurama nɛn mi. 12 Adama ba koo gere bu nɛɛ, mban sɔ̃na ba koo kɔsi. Ben baawure u koo win bwisiku kɔ̃sunu swĩiwa u ko ye u kĩ. 13 Yinni Gusunɔ u nɛɛ, Isireliba ba gãa kɔ̃sunu kua n sara. I bwesenu kpuro bikio, wara u yenin bweseru nɔɔre. 14 Nim mu ra kokubu kpe Libanin guunu wɔllun di? Daa te ta kokumɔ, ta ra nim gem kpe? 15 Adama nɛn tɔmbu ba man duari ba da ba bũnu turare dɔ̃ɔ dokeammɛ. Ya dera ba ǹ yɛ̃ ye ba mɔ̀ ben swɛɛ sɔɔ. Ba ben yellun swaa dosu derimɔ, ma ba swaa kisi swĩi. 16 Ba dera ben tem mu sankira. Ma tɔmbu ba bu yɛ̃ɛmɔ baadomma. Wi u sarɔ mi gesi, ù n mu wa, u ra wiru kparewa. 17 Yen sɔ̃na kon de bu yarina yibɛrɛban wuswaaɔ nge tua ye sɔ̃ɔ yari yerun woo ga yarinasia. Kon bu biru kisi. Na ǹ bu mɛɛrimɔ sanam mɛ ba nɔni sɔ̃ɔre. 18 Yera tɔn be, ba nɛɛ, su Yeremi nɔɔ tia kua su nùn mwa. Domi wooda kun gbimɔ baa yãku kowobu bà kun wãa. Bwisi kun kpeemɔ baa bwisigibu bà kun wãa. Gusunɔn gari kun gbimɔ yèn sɔ̃ win sɔmɔba sari. Ǹ n mɛn na, i na su nùn wɔri su yaa kasiki, kpa su ku maa win gari nɔ su sere yi laakari ko. 19 Saa yera Yeremi u Yinni Gusunɔ kana u nɛɛ, Yinni Gusunɔ, a man swaa dakio. A nɛn yibɛrɛban gari yi nɔɔwɔ. 20 Kaa de gea yu gɔsira kɔ̃sa? Wee ba dɔkɔ kpiriru gba bu ka man kpɛ̃ɛ sɔɔ. A yaayo ma na yɔ̃ra wunɛn wuswaaɔ ben sɔ̃, na ka nun gari kua kpa a ku maa ka bu mɔru ko. 21 Yen sɔ̃, a de gɔ̃ɔru tu ben bibu go. A de bu gbisuku tabu sɔɔ, kpa kurɔbu bu durɔbu ka bibu bia, kpa bu ko gɔminibu. A de baranu nu durɔ be go, kpa bu ben aluwaasiba go tabu sɔɔ. 22 A de tabu kowo wuunu nu bu wɔri. Kpa wuri yi nɔɔra ben yɛnusɔ. Domi ba dɔkɔ kpiriru gba bu ka man kpɛ̃ɛ te sɔɔ. Ba man yina bɛria nɛn swaa sɔɔ. 23 Adama wunɛ, Yinni Gusunɔ, a ben nɔɔsinaa kpuro yɛ̃, ye ba kua bu ka man go. Yen sɔ̃, a ku bu ben toranu wɔka. A ku ben durum ye duari. A de bu fukura wunɛn wuswaaɔ. A bu sɛɛyasio wunɛn mɔrun saa sɔɔ.
