Yeremi 17

1Yudaban durum ya yorua ben gɔ̃rusɔ. Ya maa sɔ̃ɔsire ben yãku yenun kãanu sɔɔ. Ma n sãare ba ye yorua mi, ka yorutii sisugia ka kpee te ta bɔbunu bo. 2Ya sãawa seeda ye ya bu taarɛ wɛ̃ɛmɔ. Nge mɛya ben bũu turanu ka ben bwãarokunu ka ben dãa kubenu ka ben gungunu mi ba ra bũu wi ba mɔ̀ Asitaate sã, ya maa bu taarɛ wɛ̃ɛmɔ. 3Yen sɔ̃na nɛ, Yinni Gusunɔ, kon nɛn guu tèn mi ba ra man sã, ka ben dukia ka ben gbea ka gungunu mi ba ra bũnu sã yibɛrɛba nɔmu bɛria, ben durum yen saabu ye ba kua ben tem mɛ kpuro sɔɔ. 4Ben toranun sɔ̃na ba koo ben tem bia mɛ mu sãa ben tubi. Kon bu ko ben yibɛrɛban yobu, kpa bu da tem mi ba ǹ yɛ̃. Domi ba dera nɛn mɔru ya yabura nge dɔ̃ɔ. Ya ko n maa yaburewa sere ka baadommaɔ. 5Nɛ, Yinni Gusunɔwa na nɛɛ, bɔ̃rigiiwa wi u win gɔ̃ru sĩiya nɛn min di, ma u tɔnu naanɛ sãa, u tãsa wi sɔɔ. 6U ko n wɔnwɔndu soorewa nge dãa kiki si su wãa mi gãanu ku ra kpi. U ǹ nuku dobu wasi. U ko n wãawa tem saaramɔ mi goo sari. 7Adama domarugiiwa wi u win naanɛ doke nɛ, Yinni Gusunɔ sɔɔ, ma win toro sindu ta wãa nɛ sɔɔ. 8Yɛ̃ro ko n sãawa nge dãa te ta yɔ̃ daarun goorɔ, tèn gbini yi ku ra nim bie. Dãa ten bweseru ta ku ra n yam susuru gara. Ten wurusu ra n bekusu sãawa saa kpuro. Sɔ̃ɔ sãrerun saa yà n na, ta ku ra gbere, baa wɔ̃ɔ ge gbebura yɔ̃ra. Mɛya ta ku ra maa marubu yɔ̃re. 9Tɔnun gɔ̃ru ga ra kɔ̃sa berewa. Mɛya gen barara ku ra bɛkure. Goo u wãa wi u koo kpĩ u gen bwisikunu gia? 10Nɛ, Yinni Gusunɔwa na ra tɔnun gɔ̃ru ka win bwisikunu wɛ̃ɛri, n ka nùn ye u kuan are wɛ̃. 11Wi u dukia guramɔ ka swaa kɔ̃sa, u sãawa nge kusu ge ga sĩa tuka wee ye ga ǹ ka. Dukia ye, ya koo nùn deriwa win wãarun suunu suunuka sɔɔ, kpa u n sãa nge gari bɔkɔ win wãa dãakiru sɔɔ. 12Bɛsɛn sãa yee dɛɛraru ta sãawa nge sina kita yiikogiru te ta wɔlle suare yellun di. 13Yinni Gusunɔ, wuna bɛsɛ Isireliba sa yĩiyɔ. Be ba nun biru kisi, ba koo sekuru wa. Be ba ka nun tondinɛ, ba koo bu duari. Ba ko n sãawa nge bèn yĩsa ba yorua tua sɔɔ. Domi ba wunɛ Yinni Gusunɔ deri, wunɛ wi a sãa nge bwia yèn nim mu wãaru wɛ̃ɛmɔ. 14Yinni Gusunɔ, a man bɛkio, kpa n wa n bɛkura mam mam. A man faaba koowo kpa n faaba wa. Domi wunɛ turowa na ra n siaramɔ. 15Yinni Gusunɔ, wee, tɔmba man bikiamɔ ba mɔ̀, mana nɔni swãarun gari yi a bu sɔ̃ɔwa mi, yi woo. I den bu wɔrima. 16Adama na ǹ yinɛ n wunɛn tɔmbu kpara. N ǹ nɛ, na sɛnde nɔni swãa ten tɔ̃ru tu ka na. Wunɛn tii, a yɛ̃ mɛ. A maa yɛ̃ gari yi na yara nɛn nɔɔn di kpuro. 17Yen sɔ̃, a ku de na n maa bɛrum soore wunɛn sɔ̃, wunɛ wi a sãa nɛn kuku yeru nɔni swãarun saa. 18A de be ba man nɔni sɔ̃ɔmɔ bu sekuru wa. Kpa nɛ, na kun tu wa. A de bu diiri, kpa nɛ, na n wãa ka toro sindu. A de nɔni swãaru tu bu deema, kpa a bu sɛɛyasia n kpã. 19Yinni Gusunɔ u nɛɛ, Yeremi, a seewo a da a yɔ̃ra kɔnnɔwɔ ge ba mɔ̀ tɔmbun kɔnnɔ mi Yudaban sinambu ba ra ka du kpa bu ka yari, kpa a maa da a yɔ̃ra kɔnnɔ si su tien mi. 20Kpa a bu sɔ̃ a nɛɛ, be, Yudaba ka ben sunɔ ka be, Yerusalɛmugibu, be kpuro be ba dumɔ kɔnnɔ sin min di, bu nɛ Yinni Gusunɔgia swaa dakio bu nɔ. 21Na nɛɛ, ba n tii sɛ kpa bu ku raa sɔmunu sɔbe tɔ̃ɔ wɛ̃rarugiru sɔɔ. Bu ku raa maa nu duusia Yerusalɛmun gbãra kɔnnɔsun di. 22Bu ku raa mam nu yara ben yɛnusun di. Bu ku sɔmburu garu ko. Adama bu sanam mɛ yiiyo nɛ, Yinni Gusunɔn sɔ̃ nge mɛ na ben baababa yiire. 23Geema, ben baaba be, ba swaa taaya. Ba ǹ man swaa daki. Ba nɛn sɔ̃ɔsinu yina. 24Adama be, bà n man swaa daki ka gem, ma ba ǹ sɔmunu ganu duusie Yerusalɛmun kɔnnɔsun di tɔ̃ɔ wɛ̃rarugiru sɔɔ, ma ba tɔ̃ɔ te yi nɛ, Yinni Gusunɔn sɔ̃, ma ba ǹ sɔmburu garu kue te sɔɔ, 25saa yera sinam be ba sɔ̃ Dafidin sina gɔnaɔ ka ben sina asakpɔbu ba koo du saa Yerusalɛmun kɔnnɔ sin min di, ba n tabu kɛkɛba dua, be dumi gawe, kpa gabu ba n dumi sɔni. Mɛya Yudaba kpuro ka Yerusalɛmugibu kpuro ba koo maa du mi, kpa Yerusalɛmu ya n tɔmbu yiba sere ka baadommaɔ. 26Tɔmba koo na nɛn sãa yerɔ Yudan wusu ka Yerusalɛmun baru kpaanu kpuron di ka Bɛnyamɛɛn tem di, ka sere maa guunun di ka wɔwin di, ka sɔ̃ɔ yɛ̃san nɔm dwaru gian di, tem mɛ kpuron di gesi, bu yãku dɔ̃ɔ mwaararuginu ko ka siarabun yãkunu, kpa bu ka kɛ̃nu na, kpa bu turare dɔ̃ɔ doke mi. 27Adama bà kun nɛn gari swaa daki, yi na nɛɛ, bu man tɔ̃ɔ wɛ̃rarugii te yiiya, ma ba dumɔ Yerusalɛmun kɔnnɔsun di, ba n sɔmunu sɔɔwa, tɔ̃ɔ wɛ̃rarugii te sɔɔ, saa yera kon wuu ge dɔ̃ɔ doke wi u ǹ gbimɔ kpa be kpuro bu dɔ̃ɔ mwaara.

will be added

X\