Yeremi 16

1Yinni Gusunɔ u Yeremi sɔ̃ɔwa u nɛɛ, 2a ku kurɔ sua, kpa a ku bibu ma tem mini. 3Wee ye ya koo bii be ba koo marura tem mɛ sɔɔ deema, ka ben mɛrobu ka ben tundobu. 4Barara ta koo bu go. Ba ǹ bu gɔɔ swĩiyammɛ. Ba ǹ maa bu sikumɔ. Ba koo kowa taaki tem sɔɔ. Be ba tia kpa bu bu go tabu sɔɔ, ǹ kun mɛ, gɔ̃ɔru tu bu go, kpa gbeeku yɛɛ ka gunɔsu ben gonu di. 5Yinni Gusunɔ u maa nɛɛ, a ku du diru mi ba gɔɔ wooru sɔ̃ a ka bu duura. Domi na nɛn bɔri yɛndu wuna tɔn ben min di. Na ǹ ben kĩru mɔ, mɛya na ǹ maa ben wɔnwɔndu mɔ̀. 6Damgibu ka bwɛ̃ɛbwɛ̃ɛbu ba koo gbiwa. Ba ǹ bu sikumɔ, ba ǹ maa ben gɔɔ wooru sinamɔ. Goo kun tii muririmɔ, goo kun maa kɔnimɔ ben gɔɔn nuku sankiranun sɔ̃. 7Bèn tɔmba gu mi, ba ǹ goo wasi wi u koo ka bu dĩanu naawa u ka bu nukuru yɛmiasia. Goo maa sari wi u koo ka bu tam naawa u ka bu dam kɛ̃, baa ǹ n ben mɛron na u gu, ǹ kun mɛ, ben tundo. 8Yinni Gusunɔ u maa Yeremi sɔ̃ɔwa u nɛɛ, yɛnu mi ba tɔ̃ɔ baka dim mɔ̀, a ku du mi, i di i nɔ ka be sannu. 9Domi nɛ, Gusunɔ Isireliban Yinni, nɛ wi na wɔllu ka tem mɔ, na kon yam min nuku dobu kpeerasia bɛɛn nɔni biru. Ba ǹ maa nuku dobun womusu ka be ba suanamɔn nɔɔgiru nɔɔmɔ mi. 10Sanam mɛ kaa tɔn be gari yi nɔɔsia, ba koo nun bikia bu nɛɛ, mban sɔ̃na nɛ, Yinni Gusunɔ na bu nɔni swãa tenin bweserun gari sɔ̃ɔmɔ. Mba ba nɛ, Gusunɔ ben Yinni torari. 11Saa ye sɔɔra kaa bu wisi a nɛɛ, ben baababa ba man deri, ma ba da ba bũnu sãwa ba yiira nin nuurɔ, ma ba man biru kisi, ba ǹ nɛn woodaba mɛm nɔɔwɛ. 12Ma ben tii ba kɔ̃sa kua n kere ben baaba be. Wee ben baawure u yɔ̃rari u win gɔ̃run kĩru kankam swĩi. Ba ǹ nɛn gari swaa dakimɔ. 13Yen sɔ̃, kon bu yara tem minin di, kpa bu da tem mi ben baababa ka ben tii ba ǹ yɛ̃. Miya ba koo bũnu sã sɔ̃ɔ sɔɔ ka wɔ̃kuru. Domi na ǹ maa bu durom gam kuammɛ. 14Yinni Gusunɔ u nɛɛ, yen sɔ̃na tɔ̃nu ganu sisi nì sɔɔ ba ǹ maa bɔ̃rumɔ bu nɛɛ, ka Yinni Gusunɔn wãaru wi u Isireliba yarama Egibitin di. 15Adama ba koo bɔ̃rewa bu nɛɛ, ka Yinni Gusunɔn wãaru wi u Isireliba yarama saa sɔ̃ɔ yɛ̃san nɔm geu gian di ka sere tem mi u raa bu yarinasian di. Domi kon de bu wurama ben temɔ mɛ na raa ben baababa wɛ̃. 16Yinni Gusunɔ u nɛɛ, wee, kon yibɛrɛba seeya bu Isireliba mwɛɛri nge mɛ susure kowobu ba ra swɛ̃ɛ mwɛɛri. Yeniban biru, kon maa yibɛrɛ gabu seeya bu bu wɔri bu go gungunu wɔllɔ ka guunɔ, ka sere maa kpee baaba sɔɔ nge mɛ taasobu ba ra yɛɛ wɔri bu go. 17Domi nɛn nɔni yi ben sanu sanusu mɛɛra, sin gasu kun berua nɛn nɔni sɔɔ. Mɛya na maa ben toranu kpuro waamɔ. 18Kon bu ben durum are wɛ̃ mam mam. Domi ba nɛn tem disi doke mɛ mu sãa nɛn arumani, ma ba dera mu ben bũun bwãarokunu yiba ni nu ǹ wãaru mɔ. 19Yeremi u nɛɛ, Yinni Gusunɔ, a sãawa nɛn dam ka nɛn kuku yee damgiru, nɔni swãarun saa. Wunɛn miya handunian goonu nnɛ kpuron tɔmbu ba koo na, kpa bu nɛɛ, weesa ben baababa ba swĩi. Ben bũnu nu ǹ gãanu sosi, nu sãawa kam dirum. 20Tɔnu u koo kpĩ u tii kua ye u koo sã. Adama ka gem, nu ǹ sãa Gusunɔ. 21Yen sɔ̃na, wunɛ Yinni Gusunɔ a nɛɛ, kaa bu wunɛn dam sɔ̃ɔsi, kpa bu gia ma wuna a sãa Yinni Gusunɔ.

will be added

X\