1 Yinni Gusunɔ u Yeremi sɔ̃ɔwa u nɛɛ, na ǹ nɛn tɔmbu Yudaba wɔnwɔndu kuammɛ, baa Mɔwisi ka Samuɛli bà n na nɛn mi, bu ka man suuru kana ben sɔ̃. Kon bu sɔ̃wa n nɛɛ, bu doonɔ nɛn wuswaan di. 2 Bà n maa wunɛ Yeremi bikia ba nɛɛ, mana ba koo da, kpa a bu wisi a nɛɛ, ba koo gbiwa. Gaba koo ben yaron gɔɔ gbi, gɔɔ wiya koo bu sua. Gaba koo gbi tabu sɔɔ, gɔɔ wiya koo bu sua. Gaba koo gbi gɔ̃ɔrun sɔ̃, gɔɔ wiya koo bu sua. Kpa bu maa gabu yoru mwɛɛri, yoo tera ba koo di. 3 Kon de kɛ̃sinu nnɛ yu bu deema. Ba koo gbi tabu sɔɔ, kpa bɔ̃nu nu ben gonu gɛɛri, kpa gbeeku yɛɛ ka gunɔsu bu di mam mam. 4 Biti ka bɛrum koo bwese tukunu mwa bà n wa ye ya bu deema, ye Yudan sina boko Manase Esekiasin bii u kuan sɔ̃ kpuro Yerusalɛmuɔ. 5 Saa ye sɔɔ, Yerusalɛmu, wara u koo wunɛn wɔnwɔndu wa. Wara u koo nun wanyo kua. Wara u koo na u bikia ye n nun mɔ̀. 6 Wee a man deri, ma a biru wura. Yen sɔ̃, kon nun nɔma doke n nun kpeerasia. Domi na wasira ka baadomman wɔnwɔn te na nun kuammɛ. 7 Kon nɛn tɔn be sarawa nge dobi wusun gbãra kɔnnɔsɔ. Kon de bu ben bibu bia, kpa n bu kam koosia. Domi ba yina bu ben swɛɛ kɔ̃si deri. 8 Kon de ben gɔminibu bu yani sɛɛri dabiru kera yi yi wãa nim wɔ̃kun goorɔ. Kon de yibɛrɛba bu na bu ben aluwaasiban mɛrobu wɔri sɔ̃ɔ sɔɔ gbãara. Kpa nuku sankiraru ka bɛrum ben mɛro be deema subaru sɔɔ. 9 Wi ba raa bɛɛrɛ wɛ̃ɛmɔ yèn sɔ̃ u bii tɔn durɔbu nɔɔba yiru mara u wasikiramɔ. U koo mam gbiwa sɛkum ka seku bakaru. Be ba tie, kon de yibɛrɛba bu bu gowa tabu sɔɔ. Nɛ, Yinni Gusunɔwa na yeni gerua. 10 Yeremi u nɛɛ, nɛn mɛro, mban sɔ̃na a man mara. Wee na kua bɔ̃ruro. Domi nɛn sɔ̃na tem mɛn tɔmbu kpuro ba sikirinamɔ ba sannamɔ. Na ǹ goon mi gãanu bɔkure, na ǹ maa goo gãanu bɔkure. Adama ka mɛ, ba man bɔ̃rusimɔwa kpuro. 11 Ma Yinni Gusunɔ u nɛɛ, kon nun yakia wunɛn gean sɔ̃, kpa n nun wunɛn yibɛrɛba kamia wahala ka nuku sankiranun saa. 12 Goo kun kpɛ̃ u sisu bɔɔku, si su wee sɔ̃ɔ yɛ̃san nɔm geu gian di ka sere maa sii gandu. 13 Kon de yibɛrɛba bu na bu tem mɛn arumani kpuro gura nɛn tɔmbun durum sɔ̃ ye ba kua tem mɛ kpuro sɔɔ. 14 Kon de bu ben yibɛrɛba sã tem tukumɔ mi ba ǹ yɛ̃. Domi nɛn mɔru seewawa be sɔɔ nge dɔ̃ɔ. 15 Yera Yeremi u Yinni Gusunɔ wisa u nɛɛ, a kpuro yɛ̃. A man yaayo. A ku man duari. A be ba man nɔni sɔ̃ɔmɔ mɔru kɔsio. A ku man go, wunɛ wi a suuru mɔ. A yɛ̃ ma wunɛn sɔ̃na na sekuru sɔɔwa. 16 Wunɛn gari kpurowa na swaa daki. Ma na yi doke gɔ̃ruɔ. Yiya yi man nuku dobu wɛ̃. Gusunɔ wɔllu ka tem Yinni, a n yɛ̃ ma wunɛn yĩsira na sɔɔwa. 17 Mɛya na ǹ wure n sina ka tɔn yaa kasikiobu su ka nuku dobu ko sannu. Na tii gɔwawa na sɔ̃ nɛ turo, domi a dera nɛn mɔru seewa. 18 Yinni Gusunɔ, mban sɔ̃na na wahala mɔ̀ sere ka tɛ̃. Mban sɔ̃na ya sãa nge boo wi u ku ra kpe. Yinni, kaa n man sãawɛwa nge bwia ye ya ǹ naanɛ mɔ, ǹ kun mɛ nge daa te ta ra nim kpe? 19 Ma Yinni Gusunɔ u Yeremi wisa u nɛɛ, à n gɔsirama nɛn mi, kon de a maa ko nɛn sɔm kowo. À n wura a mɛm saarinu deri kpa a gari arufaanigii gere, kon maa nɛn gari doke wunɛn nɔɔwɔ. N ǹ mɔ wuna kaa gɔsira ben mi, beya n weenɛ bu wurama wunɛn mi. 20 Kon de a n dam mɔ nge gbãra te ba kua ka sii gandu. Ba koo ka nun tabu ko, adama ba ǹ nun kamiamɔ. Domi ko na n ka nun wãa n nun faaba ko. 21 Kon nun yakia tɔn kɔ̃sobun nɔman di. Kpa n nun wɔra be ba nuki sosun nɔman di. Nɛ, Yinni Gusunɔwa na yeni gerua.
