Yeremi 14

1Sanam mɛ nim gɔ̃ɔra wãa, Yinni Gusunɔ u Yeremi sɔ̃ɔwa u nɛɛ, 2Yudaba ba gɔɔ wooru sɔ̃. Goo maa sari ben wuu marosun kɔnnɔsɔ. Wee ba wɔruka temɔ ba nuki sankire. Ma Yerusalɛmugibu ba nɔɔgiru sue ba faaba kanamɔ. 3Damgibu ba bwɛ̃ɛbwɛ̃ɛbu gɔrimɔ bu nim kasuma. Adama bà n dɔkɔ da ba ku ra nim wa. Ba ra gɔsiramɛwa ka koto gbebusu, kpa seku bakaru ta n bu mɔ̀, ba n wuswaa gãanu wukiri. 4Tem mu bɛsikira yèn sɔ̃ gura kun nɛmɔ. Ma sekura gbee wukobu mɔ̀ ba wuswaa gãanu wukiri. 5Yaka bekusu sari. Batuma sɔɔra nɛnnu ra ma kpa nu doona nu binu deri. 6Wee gbeeku kɛtɛkunu nu wãa guunu wɔllɔ, nu wom gabirimɔ nge gbeeku bɔ̃nu. Nin nɔni tonda yèn sɔ̃ yakasu sari. 7Yudaba ba gerumɔ ba mɔ̀, baa mɛ sa taarɛ mɔ bɛsɛn durum sɔ̃, Yinni Gusunɔ, a sun somiɔ wunɛn yĩsirun bɛɛrɛn sɔ̃. Wee sa kua mɛm nɔɔ sariba, ma sa nun torari. 8Wunɛ wi bɛsɛ Isireliba sa naanɛ sãa, wuna a ra sun faaba ko wahalan saa sɔɔ. Mban sɔ̃na kaa n sãa nge sɔɔ wi u sarɔ bɛsɛn temɔ u kpuna wɔ̃ku teeru tɔna. 9Mban sɔ̃na kaa n sãa nge wi ba wɔri subaru sɔɔ, ǹ kun mɛ nge tabu durɔ wi u kpana u sun faaba ko, a sere wãa bɛsɛn suunu sɔɔ. Yinni Gusunɔ, ma sa wunɛn yĩsiru sɔɔwa, a ku sun deri. 10Wee ye Yinni Gusunɔ u gerua win tɔmbun sɔ̃. U nɛɛ, ba ra kã ba n yaayaare mɔ̀. Ba ku ra kpĩ bu sina bu tii nɛnɛ. Ba ǹ maa nùn wɛ̃remɔ. U ben durum yaaye. Yen sɔ̃na u bu sɛɛyasiamɔ. 11Ma Yinni Gusunɔ u Yeremi sɔ̃ɔwa u nɛɛ, a ku tɔn be kanaru kua n ka bu gea kua. 12Domi baa bà n nɔɔ bɔkua, na ǹ ben kanaru nɔɔmɔ. Bà n maa yãku dɔ̃ɔ mwaararuginu ka kɛ̃nu ganu kua, na ǹ nu mwaamɔ. Kon de bu gbiwa gɔ̃ɔrun sɔ̃ ka kɛ̃si kɛ̃si bararun sɔ̃ ka maa tabu sɔɔ. 13Ma Yeremi u wisa u nɛɛ, Yinni Gusunɔ, wee wunɛn sɔmɔbu ba wunɛn tɔmbu sɔ̃ɔmɔ ba mɔ̀, ba ǹ tabu wasi. Gɔ̃ɔra kun maa duɔ ben temɔ. Kaa de ba n wãawa bɔri yɛndu sɔɔ ka toro sindu. 14Yinni Gusunɔ u maa nùn sɔ̃ɔwa u nɛɛ, weesa ba gerumɔ ka nɛn yĩsiru. Na ǹ bu gɔre, na ǹ bu wooda gaa wɛ̃. Mɛya na ǹ maa bu gari gɛɛ sɔ̃ɔwa. Kãsinu ka sian gari ka ben gɔ̃rusun gari yi ba gerumɔ, ye kpuro weesa. 15Yen sɔ̃, sɔmɔ be na ǹ gɔre mi, ba ka tɔmbu sɔ̃ɔmɔ ba mɔ̀, ba ǹ tabu wasi ben temɔ, gɔ̃ɔra kun duɔ mi, kon de bu gbi tabu sɔɔ, ka gɔ̃ɔrun sɔ̃. 16Kpa tɔn be ba maa weesun gari sɔɔmɔ mi, ba n wɔruka Yerusalɛmun swɛɛ sɔɔ gɔ̃ɔ te, ka taa bin sɔ̃. Ba ǹ goo wasi wi u koo bu sike, be ka ben kurɔbu ka bibu. Kon de ben nuku kɔ̃suru tu wɔriwa ben tii sɔɔ. 17Yeremi u nɛɛ, Gusunɔ u man sɔ̃ɔwa n tɔn be sɔ̃ n nɛɛ, nɛn nɔni yĩresu su kokumɔ bururu ka yoka, su ǹ yɔ̃re. Domi wahala baka ya nɛn tɔmbu deema. Ba bu so ba mɛɛra kua. 18Nà n yara na da yakasɔ, na ra tɔn be ba go tabu sɔɔn gonu wawa nu kpĩ. Nà n maa wurama wuuɔ, kpa n deema tɔmba barɔ gɔ̃ɔrun saabu. Gusunɔn sɔmɔbu ka yãku kowobu ba ra n den sirenɛwa tem mɛ sɔɔ. Ba ǹ yɛ̃ ye ba mɔ̀. 19Yinni Gusunɔ, a bɛsɛ Yudaba biru kisiwa mam mam? A sun bwɛ̃ra yarawa? Mban sɔ̃na a sun sɛɛyasiamɔ a mɛɛra mɔ̀ ye ya ǹ bɛkuramɔ. Sa bɔri yɛndu mara, adama sa ǹ tu wa. Sa mara a sun bɛkia, adama nɔni swãaru sɔɔra sa wãa. 20Yinni Gusunɔ, sa durum kua wunɛn mi. Sa tuba ma nuku kɔ̃sura sa kua, bɛsɛ ka bɛsɛn baababa. 21A wunɛn arukawani yaayo ye a ka sun bɔkua. Wunɛn yĩsirun sɔ̃, a ku sun gɛm. A ku maa Yerusalɛmu funɛ wĩa mi a wunɛn sina gɔna yiikogia yii. 22Bũu goo sari wi u koo kpĩ u gura nɛɛsia, wɔllun tii, ta ǹ kpɛ̃ tu gura nɛɛsia. Gusunɔ bɛsɛn Yinni, wuna a ra de gura yu nɛ. Wuna sa maa naanɛ sãa. Domi wuna a ra ye kpuro ko.

will be added

X\