Yeremi 13

1Yinni Gusunɔ u nɛɛ, nɛ, Yeremi, n doo n kpaka dwe kpa n ye sɛ̃ka pɔraɔ, adama n ku ye doke nim sɔɔ. 2Ma na kpaka ye dwa na sɛ̃ka pɔraɔ nge mɛ u man sɔ̃ɔwa. 3Ma Yinni Gusunɔ u kpam nɛɛ, 4n kpaka ye suo kpa n se n da daa te ba mɔ̀ Efaratiɔ kpa n ye bere mi, kpee wɔru gagu sɔɔ. 5Ma na seewa na da na ye berua mi, nge mɛ u gerua. 6Ye n tɛ, u maa nɛɛ, n wuro Efarati mi, kpa n kpaka ye suama ye u raa nɛɛ, n bere mi. 7Ma na seewa na da na kpaka ye sua mi ya raa beruan di. Adama na deema wee, ya sankira ya ǹ maa garu koorɔ. 8Yera Yinni Gusunɔ u man sɔ̃ɔwa u nɛɛ, 9nge mɛya u koo Yudaba ka Yerusalɛmugibun tii suabu kpeerasia. 10U nɛɛ, ba sãawa tɔn kɔ̃sobu, ba ku ra wure bu win gari nɔ. Ben gɔ̃ru kĩrun gariya ba ra n yɔ̃rari, kpa ba n bũnu yiirammɛ ba n sãamɔ. Ba koo kowa nge kpaka ye, ye ya ǹ maa garu koorɔ mi. 11Nge mɛ ba ra kpaka sɛ̃ke pɔraɔ, nge mɛya u raa Isireliba ka Yudaba kpuro sua u tii sɛ̃ke ba n ka sãa win tɔmbu, ba n win yĩsiru sɔɔwa, ba n sãa win buraru, kpa tɔmba n nùn siaramɔ ben sɔ̃. Adama ba ǹ win gari wure. Wi, Yinni Gusunɔwa u yeni gerua. 12Yinni Gusunɔ u nɛ, Yeremi sɔ̃ɔwa u nɛɛ, n doo n nɛn tɔmbu Isireliba sɔ̃ ma wi, ben Yinni, u gerua u nɛɛ, tam bwãara wãawa tam sɔ̃. Adama bà n wisa ba nɛɛ, ba yɛ̃ mɛ, 13saa yera kon bu sɔ̃ n nɛɛ, mɛsuma wi, Yinni Gusunɔ u gerua. U nɛɛ, u koo de win mɔru yu ko nge tam mɛ mu koo Yerusalɛmun tɔmbu kpuro go, ka sinam be ba sɔ̃ Dafidin sina gɔna sɔɔ, ka yãku kowobu, ka win sɔmɔbu, tem mɛn tɔmbu kpuro gesi. 14Kpa bu soona bu kɔsukuna, baaba ka bii, u ǹ ben goon wɔnwɔndu mɔ̀. Gãanu maa sari ni nu koo nùn yɔ̃rasia sere u ka be kpuro go. 15Bɛɛ, Isireliba, i swaa dakio i nɔ, ye na gerumɔ. I ku maa tii sua, domi Yinni Gusunɔ u ka bɛɛ gari mɔ̀. 16I Gusunɔ bɛɛn Yinni bɛɛrɛ wɛ̃ɛyɔ u sere ka yam wɔ̃kuru na te ta koo de i sokukira guunu wɔllɔ. Mɛya i yam bururam mara, adama u koo de mu tĩra mam mam kpa mu gɔsia yam wɔ̃ku bakaru nge te ta wãa gɔribun wãa yerɔ. 17Ì kun gari yi swaa daki, kon da n swĩ bɔkuɔ bɛɛn tii sua bin sɔ̃. Kon nɔni yĩresu yari n banda. Domi ba koo bɛɛ Yinni Gusunɔn tɔmbu yoru mwɛɛri bu ka da tem tukumɔ. 18Yinni Gusunɔ u man sɔ̃ɔwa u nɛɛ, n sina boko ka win mɛro sɔ̃ɔwɔ n nɛɛ, bu sinɔ temɔ domi ben sina furɔsu wɔruka si su sãa ben buraru. 19Wee, wuu si su wãa sɔ̃ɔ yɛ̃san nɔm dwaru gia Nɛgɛbuɔ, sin tɔmba doona kpuro, ma wuu si, su kɛnua. Goo sari wi u koo maa su kɛnia, domi ba sin tɔmbu Yudaba gura kpuro sem ba ka doona tem tukumɔ. 20Wunɛ Yerusalɛmu, a nɔni seeyo a wa, wee, wunɛn yibɛrɛba ba wee sɔ̃ɔ yɛ̃san nɔm geu gian di. Mana tɔn be na raa nun nɔmu sɔndia ba wãa, bèn sɔ̃ a raa bɛɛrɛ mɔ. 21Be ba raa nun sokumɔ yinni, bà n nun sɛɛyasiabu na, mba kaa gere. Saa ye sɔɔra wuriribu bu koo nun deema nge tɔn kurɔ wi u yiire u kĩ u ma. 22Kaa tii bikia gɔ̃ruɔ a nɛɛ, mban sɔ̃na yeni ya nun deema. Wunɛn tora dabinun sɔ̃na ba wunɛn bekuru pota ka dam ba nun sekuru doke. 23Etiopigii u koo kpĩ u win wasin gɔna kɔsi? Musuku gbeeku ga koo maa kpĩ gu gen sansun bausu kɔsi? Aawo. Nge mɛya bɛɛ be i kɔ̃san dɔɔnɛ mɔ, i ǹ kpɛ̃ i gea ko. 24Yen sɔ̃, kon bɛɛ yarinasiawa nge mɛ woo ga ra yakasu yarinasie gbaburɔ. 25Wunɛ, Yerusalɛmu, yèn sɔ̃ a nɛ, Yinni Gusunɔ duari, ma a wunɛn naanɛ doke weesu sɔɔ, wee ye na nun yiiye. 26Kon wunɛn bekuru gbabia kpa bu wunɛn tereru wa. 27Na waamɔ sakararu ka kuuki yi a mɔ̀, sanam mɛ a bũnu gasirimɔ a sãamɔ guunu wɔllɔ ka yakasɔ. Ya sãawa gãa kɔ̃sunu nɛn nɔni sɔɔ. Yen sɔ̃, wunɛ Yerusalɛmu, kaa kam ko à kun tii dɛɛrasie. Saa yerà a mara, a ka tii dɛɛrasia.

will be added

X\