1 Yinni Gusunɔ, a sãawa gemgii baadomma, na ǹ kpɛ̃ n nun siribu soku. Adama ka mɛ, na kĩ n nun gãanu bikia wunɛn gem mɛ sɔɔ. Ye na bikiamɔ wee. Mban sɔ̃na durumgiin wãaru ta ra n kuuramɔ. Mban sɔ̃na a ra de be ba ǹ nun naanɛ sãa ba n wãa bɔri yɛndu sɔɔ. 2 Wuna a bu duura nge dãru, ma ba nuuru kua, ba kpɛ̃a ba binu marumɔ. Mɛya wunɛn gari ra n wãa ben nɔɔwɔ. Adama yi ǹ wãa ben gɔ̃ruɔ. 3 Yinni Gusunɔ, a man yɛ̃. A man waamɔ ma a nɛn gɔ̃ru wɛ̃ɛra, a wa ma ga wãa ka wunɛ. A tɔn kɔ̃so be wunɔ nge yãa ni ba ra mwɛ bu sake. A bu sɔɔru koowo a yi tɔ̃ɔ te ba koo tɔmbu gon sɔ̃. 4 Sere saa yerà kaa n dera bɛsɛn tem mu n wãa nuku sankiranu sɔɔ. Wee yakasu kpuro gberamɔ, ma gbeeku yɛɛ ka gunɔsu gbimɔ bɛsɛn tem mɛn tɔn kɔ̃sobun sɔ̃. Domi ba gerumɔ ba mɔ̀, a ǹ ben sanu sanusu waamɔ. 5 Yinni Gusunɔ u nɛɛ, Yeremi, à n ka naasugibu duka mɔ̀, ma a bu kpana, a wasira, amɔna kaa ka kpĩ a ka dumigibu duka da. À n bɔri yɛndu mɔ sanam mɛ tem mu alafia mɔ tɔna, amɔna kaa ko Yuudɛnin daaru tà n nim yiba ta yarimɔ. 6 Domi wunɛn mɛro bisibu ka wunɛn yɛnugibu ba nun naanɛ sarirun kom kuammɛ. Wee ba nun nɔɔgiru suemɔ biruɔ. A ku bu naanɛ ko, baa bà n nun gari dori sɔ̃ɔmɔ. 7 Yinni Gusunɔ u nɛɛ, na nɛn sãa yeru deri. Na nɛn tɔmbu biru kisi, be, be ba sãa nɛn arumani. Wee be, be na kĩ mi, na bu yibɛrɛba nɔmu sɔndia. 8 Domi ba man seesi nge gbee sunɔ ge ga kukirimɔ dãa sɔ̃ɔwɔ. Yen sɔ̃na na ǹ maa bu kĩ nge yellu. 9 Ba kua nge gunɔ ge gunɔsu gasu su kasu su di. Kon gbeeku yɛɛ kpuro soku yi na yi di. 10 Yibɛrɛ dabiru ba na nɛn tɔmbun temɔ ba mu sanka, nge mɛ yaa sabenu nu ra gberun dĩanu sanku. Tem mɛ, mu raa wã, adama ba ǹ gãanu deri mi. 11 Ba tem mɛ gɔsia nge tem saaram. Wee mu sãare nge tɔnu wi u gɔɔ sumɔ u nuki sankire. Tem mɛ kpuro mu kam kua. Goo sari wi u mɛn weeweenu kua. 12 Ka guunun wii kpiirɔ kpuro yibɛrɛba ba yɔɔwawa. Na dera tabu bu tem mɛ kpuro wukiri. Goo sari wi u wãa bɔri yɛndu sɔɔ. 13 Wee ba dĩanu duura, ma sãki kpia. Ba tii wahala kua kam. Sekura ba gã nɛ, Yinni Gusunɔn mɔrun sɔ̃. 14 Yinni Gusunɔ u nɛɛ, bwese ni nu ka Isireliba sikerenɛ, nu sãawa tɔn kɔ̃sobu. Nu tem mɛ mwa mɛ nɛ, Yinni Gusunɔ na Isireliba wɛ̃ mu n sãa ben tubi. Wee ye na gerumɔ bwese nin sɔ̃. Na nɛɛ, kon nu wuka saa nin tem di, kpa n Yudaba wuna nin suunu sɔɔn di. 15 Adama sanam mɛ na nu wuka na kpa, kon maa nin wɔnwɔndu ko kpa n de nin baatere tu wura ten temɔ mɛ ta tubi di. 16 Geema ba raa nɛn tɔmbu sɔ̃ɔsi bu bɔ̃re ka bũu wi ba mɔ̀ Baalin yĩsiru, adama bà n gɔ̃ru gɔsia, ba mɔ̀ nge mɛ n weenɛ nɛn tɔmbu bu ko, kpa ba n bɔ̃rumɔ ba n mɔ̀, ka nɛ, Yinni Gusunɔn wãaru. Saa yera kon de bu sina ka nuku dobu nɛn tɔmbun suunu sɔɔ. 17 Adama bwese te ta yina tu man mɛm nɔɔwa, kon tu wukawa kpa n tu kpeerasia. Nɛ, Yinni Gusunɔwa na yeni gerua.
