Yeremi 11

1Gari yiniwa Yinni Gusunɔ u Yeremi sɔ̃ɔwa. U nɛɛ, 2a nɛn arukawanin gari nɔɔwɔ, kpa a Yudaba ka Yerusalɛmugibu sɔ̃ a nɛɛ, 3nɛ, Yinni Gusunɔ, na gerua na nɛɛ, bɔ̃rurowa wi u yina u nɛn arukawani yenin gari nɔ, 4ye na raa ka bɛɛn baababa bɔkua sanam mɛ na bu yara Egibitin di mi ba raa nɔni sɔ̃ɔre too. Miya na bu sɔ̃ɔwa na nɛɛ, bu nɛn gari swaa dakio, kpa bu ko ye na bu sɔ̃ɔwa. Saa ye sɔɔra ba ko n sãa nɛn tɔmbu, kpa na n maa sãa ben Yinni. 5Nge mɛya kon ka nɛn nɔɔ mwɛɛru yibia te na bɛɛn baababa kua na nɛɛ, kon bu tem wɛ̃ mɛ̀ sɔɔ tim ka bom mu kokumɔ. Tem mɛya i waamɔ gisɔ. Ma Yeremi u Yinni Gusunɔ wisa u nɛɛ, ami. 6Yinni Gusunɔ u maa Yeremi sɔ̃ɔwa u nɛɛ, a gari yini geruo Yudaban wusu kpuro sɔɔ ka Yerusalɛmun nukurun swɛɛ kpuro sɔɔ, a nɛɛ, bu nɛn arukawanin gari swaa dakio kpa bu yi mɛm nɔɔwa. 7Saa dɔma tèn di na ben baababa yarama Egibitin di sere ka gisɔ, na ra n bu sɔ̃ɔmɔwa bu de bu man mɛm nɔɔwa. 8Adama ba ǹ nɛn gari yi swaa daki, bu sere yi mɛm nɔɔwa. Ben baawure u win tiin gɔ̃ru kĩru swĩiwa. Ma na dera bɔ̃ri yìn gari yi wãa arukawani ye sɔɔ, yi bu di. 9Yinni Gusunɔ u maa Yeremi sɔ̃ɔwa u nɛɛ, wee Yudaba ka Yerusalɛmugibu ba nɔɔ tia kua. 10Ba wura ben baababan yira sɔɔ, be, be ba yina bu nɛn gari swaa daki. Ma ba ka bũnu arukawani bɔkua ba nu sãamɔ. Isireliba ka Yudaba ba nɛn arukawani ye kusia ye na ka ben baababa bɔkua. 11Yen sɔ̃na nɛ, Yinni Gusunɔ, kon de kɔ̃sa yu bu wɔri. Ba ǹ yariɔ kɔ̃sa yen min di. Ba koo man nɔɔgiru sue adama na ǹ bu swaa dakimɔ. 12Yudaba ka Yerusalɛmugibu ba koo da bu bũnu soku ni ba yãkunu koosimɔ. Adama bũu ni, nu ǹ bu faaba mɔ̀ wahalan saa sɔɔ. 13Bɛɛ Yudaba, nge mɛ bɛɛn wusu su geeru nɛ, nge mɛya bɛɛn bũnu nu geeru nɛ. Nge mɛ Yerusalɛmun swɛɛ yi geeru nɛ, nge mɛya yen sãa yenu nu geeru nɛ, mi i ra bũu wi ba mɔ̀ Baali sã. 14Adama wunɛ Yeremi, a ku kanaru ko tɔn ben sɔ̃. Domi baa bà n man soka ben wahalan saa sɔɔ, na ǹ bu wurarimɔ. 15Yinni Gusunɔ u maa nɛɛ, bɛɛ nɛn tɔn be na kĩ, mba i kasu nɛn sãa yerɔ. Domi murafitira i ra n mɔ̀. I tamaa kon maa bɛɛn yãkunu mwa, kpa i kun maa nɔni sɔ̃ɔre? I tamaa kon de i yari wahalan di? 16Yellu i sãa nge nɛn dãa geeru, te ta kpare ta maa bii geenu marumɔ. Adama tɛ̃ kon dãa te ka ten kãasi kpuro dɔ̃ɔ mɛni subaru sɔɔ. 17Nɛ, Gusunɔ wɔllu ka tem Yinniwa na raa bɛɛ gira nge dãa. Nɛna kon de kɔ̃sa yu bɛɛ deema bɛɛ Isireliba ka bɛɛ Yudaba, kɔ̃sa ye i kua i ka nɛn mɔru seeyan sɔ̃. Domi i bũu wi ba mɔ̀ Baali yãkunu koosimɔ. 18Yinni Gusunɔ u man sɔ̃ɔsi ye nɛn tɔmbu ba man bɔkuammɛ. U man ben sanu sanusu sɔ̃ɔsi. 19Na raa bu naanɛ sãawa nge yãa te ba ka dɔɔ bu go. Na ǹ yɛ̃ kɔ̃sa ba man bwisikusimɔ, ba mɔ̀, bu de bu dãa te sura ka ten marum. Bu tu wuna wasobun suunu sɔɔn di kpa bu ku maa ten yĩsiru nɔ. 20Adama wunɛ Gusunɔ, wɔllu ka tem Yinni, a sãawa wi u ra siri dee dee. Wuna a tɔnun gɔ̃ru ka win bwisikunu yɛ̃. Wuna na nɛn weeweenu nɔmu sɔndia. Na marawa n wa mɔru ye kaa bu kɔsia. 21Ma Yinni Gusunɔ u nɛɛ, wee ye u koo Anatɔtugibu kua, be, be ba kasu bu nɛn wãaru wuna ba mɔ̀, n ku Gusunɔn gari gere ka win yĩsiru. Nà n maa yina, ba koo man go. 22Yen sɔ̃na wi, Gusunɔ wɔllu ka tem Yinni u koo bu mɔru kɔsia. Ben aluwaasiba ba koo gbi tabu sɔɔ, kpa ben bii tɔn durɔbu ka tɔn kurɔbu bu gbi gɔ̃ɔrun sɔ̃. 23Domi u koo Anatɔtugibu nɔni swãaru kpɛ̃ɛwa wɔ̃ɔ gè sɔɔ u koo bu mɔru kɔsia kpa goo kun tiare be sɔɔ.

will be added

X\