Yeremi 10

1Bɛɛ Isireliba, i swaa dakio i nɔ ye Yinni Gusunɔ u bɛɛ sɔ̃ɔmɔ. U nɛɛ, 2i ku bwese tukunun yira swĩi. I ku wurura wɔllun yĩre nin sɔ̃, ni bwese tukunu nù n wa, nu ra nande. 3Domi bwese nin sãaru ta sãawa kam dirum. Nu ra sewa nu da dãa sɔ̃ɔwɔ nu dãa bura. Kpa dãa dãko u ka ye bwãaroku ko. 4Kpa bu gu buraru kua, bu gu sii geesu ka wura pote. Kpa bu gira bu kulumba kpare ka matalaka, gu ku ka wɔruman sɔ̃. 5Bwãarokunu nu ra n sãawa nge nare ye ba ra ko gberɔ. Nu ǹ gari mɔ̀, ba ra n nu sɔɔwawa, domi nu ǹ kpɛ̃ nu ka tii sĩ. Yen sɔ̃, i ku nin bɛrum ko. Nu ǹ kpɛ̃ nu bɛɛ kɔ̃sa ǹ kun mɛ gea kua. 6Ma Yeremi u Gusunɔ siara u nɛɛ, Yinni Gusunɔ, a kpã. Goo sari wi u ka nun weenɛ. Ma a yĩsiru yara wunɛn dam saabu. 7Wuna a sãa bwesenu kpuron sina boko. Wara u ǹ koo nun nasia. Wuna a yiiko kpuro mɔ. Bwesenu kpuron bwisigibu sɔɔ, goo sari wi u ka nun weenɛ. 8Be kpuro ba ǹ bwisi mɔ. Ben yɛ̃ru ta sãawa kam. Domi dãra ba ra dãku ba n sãamɔ. 9Kpa bu tu sii geesu pote, si ba ka na Taasisin di, ǹ kun mɛ wura ye ya wee Ufasin di, kpa bu tu yabe gaaduragiru ka wunɔmgiru sebusia. Yeba kpuro ya sãawa tɔnun nɔman sɔmburu. 10Adama wunɛ Yinni Gusunɔ, a sãawa Yinni, wuna n weenɛ bu sã. A wãawa. Kaa n maa bandu diiwa sere ka baadommaɔ. Wunɛn mɔru yà n seewa, tem mu ra yĩiriwa, kpa bwesenu kpuro nu kpana nu yɔ̃ra wunɛn wuswaaɔ. 11Bɛɛ bwese tukunu, i swaa dakio i nɔ, bɛɛn bũu ni, nu ǹ wɔllu ka tem taka kue. Nin tii nu koo kam kowa mam mam. 12Yinni Gusunɔwa u tem taka kua ka win dam, ka win yɛ̃ru, ma u wɔllu tɛria ka win bwisi. 13Wiya u ra de bukɔ gu se wɔllɔ, kpa u woo seeyama saa gen wãa yerun di, kpa guru winu nu nim kpaasina, kpa guru maakinu nu koora, kpa gura yu nɛ. 14Tɔnu ù n ye kpuro mɛɛra, u ra biti soorewa. Sekuru ta ra maa sekobu mwɛwa bà n ben bwãaroku ni wa. Domi nu ǹ kpɛ̃ nu ko mɛ, nu ǹ wɛ̃siaru mɔ. 15Ba nu kuawa bu ka tɔmbu nɔni wɔ̃ke. Nu ǹ sãa gãanu. Nu koo kam ko sɔ̃ɔ teeru, dɔma te Yinni Gusunɔ u koo nu siri. 16Gusunɔ, Isireliban Yinni u ǹ sãa nge ni. Domi wiya u kpuro taka kua. Wiya u sãa win tɔmbun arumani. Win yĩsira Gusunɔ, wɔllu ka tem Yinni. 17Yeremi u nɛɛ, bɛɛ Yerusalɛmugibu, wee, yibɛrɛ ba bɛɛ tarusi. I seewo i bɛɛn yãnu kpaasina. 18Domi Yinni Gusunɔ u nɛɛ, u koo de yibɛrɛ be, bu bɛɛ wɔri, kpa bu bɛɛ gura bu ka bɛɛ da mi n toma. 19Yerusalɛmugibu ba wuri wɔri ba mɔ̀, sa kam kua. Wee, bɛsɛn bosu kpɛ̃a, bɛsɛn nɔni swãara banda. Sa raa nɛɛ, kɔ̃sa yà n sun deema, sa ko kpĩ su ye ma. 20Adama bɛsɛn dia ya wɔruka. Yen wɛ̃ɛ kpuro kasikira. Ma ba bɛsɛn bibu gura kpuro. Goo sari wi u koo maa bɛsɛn wuu seeya. 21Yera Yeremi u nɛɛ, bɛɛn kparobu ba kua gari bakasu. Ba ǹ Yinni Gusunɔ kasu. Yen sɔ̃na ba ǹ kuure, ma bɛɛ kpuro i yarina. 22Wee damu gagu ga nɔɔramɔ. Tɔn dabira wee saa sɔ̃ɔ yɛ̃san nɔm geu gian di, bu ka Yudaban wusu kpeerasia, kpa su ko gbeeku bɔ̃nun wãa yeru. 23Yinni Gusunɔ, na yɛ̃ ma tɔnu kun kpɛ̃ u win tii kpara nge mɛ n weenɛ. Goo sari wi u koo kpĩ u win tii swaa gea sure. 24Yinni Gusunɔ, a man sɛɛyasio saka sɔɔ, n kun ka mɔru, kpa a ku ra man kam koosia. 25A wunɛn mɔru sureo bwese ni nu ǹ nun mɛm nɔɔwammɛn mi, ni, ni nu ǹ nun sãamɔ. Domi nu wunɛn tɔmbu Yakɔbun bweseru kpeerasiamɔ, nu ben tem bansu koosiamɔ.

will be added

X\