Yeremi 1

1Tire ten gari yi sun sɔ̃ɔmɔ ye Yeremi Hilikiyan bii u kua ka gari yi Yinni Gusunɔ u nùn sɔ̃ɔwa. Hilikiya wi, u sãawa yãku kowo goo Anatɔtuɔ, Bɛnyamɛɛn temɔ. 2Yudaban sina boko Yosiasi Amɔɔn biin bandun wɔ̃ɔ wɔkura itase sɔɔra Yinni Gusunɔ u ka Yeremi wi gari kua. 3U maa ka nùn gari kua Yoyakimu wi u sãa Yosiasin bii Yudaban sina bokon waati sɔɔ, ka maa Sedesiasi Yosiasin biin waati sɔɔ sere n ka girari win bandun wɔ̃ɔ wɔkura tiasen suru nɔɔbuse. Saa ye sɔɔra ba Yerusalɛmugibu yoru mwɛɛra ba ka da Babiloniɔ. 4Sɔ̃ɔ teeru Yinni Gusunɔ u ka nɛ, Yeremi gari kua u nɛɛ, 5u sere man mɔmɛ nɛn mɛron nukurɔ, u man yɛ̃ saa ba ǹ man marubu kpa. U man gɔsa u yi nɛnɛm n ka ko win gɔro handunian bwesenun mi bu sere man ma. 6Ma na nùn wisa na nɛɛ, Yinni Gusunɔ, wee na ǹ kpɛ̃ n gari gere tɔn dabinun wuswaaɔ, domi nɛ biiwa. 7Adama Yinni Gusunɔ u man sɔ̃ɔwa u nɛɛ, n ku gere mɛ. Domi bèn mi u man gɔriɔ kpuro kon dawa. Ye u maa man sɔ̃ɔwa kpuro kon ye gerewa. 8N ku ben bɛrum ko. Domi u ko n ka man wãa, kpa u man wɔra karin di. Wi, Yinni Gusunɔwa u yeni gerua. 9Ma u win nɔmu dɛmia u nɛn nɔɔ baba u nɛɛ, wee u win gari doke nɛn nɔɔwɔ. 10Yen biruwa u maa nɛɛ, wee gisɔ, u man yiiko wɛ̃ bwesenu ka nin sinambu kpuron wɔllɔ n ka nu wukiri n sura, kpa n maa wure n nu gira nge dãa. Mɛya n maa ka nu kɔsuku n kam koosia, kpa n maa wure n nu seeya. 11Yinni Gusunɔ u maa man bikia u nɛɛ, mba na waamɔ mi. Ma na nùn wisa na nɛɛ, dãru garun kãasa na waamɔ. 12Ma u nɛɛ, na wawa dee dee, domi u ko n tii sɛ u ka win nɔɔ mwɛɛru yibia. 13Ma u kpam man bikia u nɛɛ, mba na maa waamɔ mi. Na nùn wisa na nɛɛ, wekera na wa sɔ̃ɔ yɛ̃san nɔm geu gia ta man nɔɔ sike ta swɛ̃ɛ ta gbisimɔ. 14Ma Yinni Gusunɔ u nɛɛ, geema saa sɔ̃ɔ yɛ̃san nɔm geu gian diya wahala ya koo na yu tem mɛn tɔmbu kpuro wɔri. 15U koo sinam be ba wãa sɔ̃ɔ yɛ̃san nɔm geu gia seeyama bu na bu Yerusalɛmu ka Yudan wuu si su tie tabu wɔri kpa bu Yerusalɛmu ye tarusi bu sina yen gbãra kɔnnɔsɔ nge siri kowobu. 16U koo win tɔmbu sɛɛyasia ben kɔ̃sa yen sɔ̃ ye ba ka nùn deri, ba bũnu turare dɔ̃ɔ dokea, ma ba bwãaroku ni ben nɔmu ga kua yiira ba sãwa. 17Adama nɛ, n be sɔɔru koowo, n kpaka sɛ̃ka kpa n se n bu sɔ̃ kpuro ye u koo man yiire. U nɛɛ, n ku de nɛn tororu tu kara ben suunu sɔɔ, kpa u ku raa man bɛrum sosia n diiri ben wuswaaɔ. 18- 19Wee tɛ̃, Yudaban sinambu ka ben wirugibu ka ben yãku kowobu ka sere tɔn be ba tie kpuro ba koo ka man tabu ko. Adama ba ǹ kpɛ̃ bu man kamia. Domi saa ye sɔɔ, u koo man dam wɛ̃ nge wuu ge ba gbãraru toosi, ǹ kun mɛ nge gbere ye ba kua ka sisu, ǹ kun mɛ nge gbãra te ba kua ka sii gandu. U ko n wãawa ka nɛ u ka man wɔra ben nɔman di. Wi, Yinni Gusunɔwa u yeni gerua.

will be added

X\